ગુજરાતમાં વધુ એક BLOના શંકાસ્પદ મોતની ઘટના સુરતમાંથી આવી છે. સુરત મહાનગરપાલિકામાં ફરજ બજાવતા અને ચૂંટણી સંબંધિત કામગીરીમાં BLO તરીકે નિમાયેલા એક મહિલા અધિકારીનું રહસ્યમય રીતે નિધન થયું છે. મૃતક મહિલા અધિકારીનું નામ ડિન્કલબેન શીંગોડાવાળા છે, જેમની ઉંમર 26 વર્ષ હતી. તેઓ મનપાના વરાછા ઝોનમાં ટેકનિકલ આસિસ્ટન્ટ તરીકે ફરજ બજાવતા હતા અને સુરત શહેરના શાહપોર બૂથના BLO તરીકે કામગીરી કરતા હતા. તેમના આ નિધનના કારણે તેમના પરિવારમાં અને વહીવટી વર્તુળોમાં શોકની લાગણી ફેલાઈ.
બાથરૂમમાંથી બેભાન મળી&nbsp;
પ્રાપ્ત માહિતી અનુસાર, આ દુઃખદ ઘટના ઓલપાડના માસમા ખાતે બની હતી. ડિન્કલબેન શીંગોડાવાળા પોતાના ઘરે બાથરૂમમાંથી બેભાન અવસ્થામાં મળી આવ્યા હતા. પરિવારના સભ્યો દ્વારા તેમને તાત્કાલિક હોસ્પિટલ ખસેડવામાં આવ્યા હતા, પરંતુ ફરજ પરના તબીબોએ તેમને મૃત જાહેર કર્યા હતા. આ ઘટના અંગે સુરતના પ્રાંત અધિકારી અને સુરત ઈસ્ટના ERO નેહાબેને માહિતી આપી હતી. તેમણે જણાવ્યું હતું કે, ડિન્કલબેનનું BLO તરીકેનું કામ ઘણું સારું હતું અને તેમણે તેમની 45 ટકા કામગીરી પૂર્ણ કરી દીધી હતી.
મોત પાછળનું રહસ્ય
પ્રાંત અધિકારીના જણાવ્યા અનુસાર, 'બાથરૂમમાં ગેસ ગીઝર હતું અને વેન્ટિલેશન પણ પૂરતું ન હતું. તેઓ બાથરૂમમાં જ બેભાન થઈ જતાં આ ઘટના બની હતી. ગેસ ગીઝરના ઉપયોગ દરમિયાન અપૂરતા વેન્ટિલેશનને કારણે કાર્બન મોનોક્સાઈડ ગેસનું ઝેર લાગવું એ એક સંભવિત કારણ હોઈ શકે છે. જોકે, મૃત્યુનું ચોક્કસ કારણ પોસ્ટમોર્ટમ રિપોર્ટ આવ્યા બાદ જ સ્પષ્ટ થઈ શકશે. આ ઘટનાને પગલે વહીવટી વર્તુળોમાં BLO &nbsp;પરના કામના ભારણ અંગે પણ ચર્ચા શરૂ થઈ છે. સુરત પોલીસ આ મામલે વધુ તપાસ કરી રહી છે.

ડિન્કલબેનનું શંકાસ્પદ મોત

મહિલા BLO તરીકે નિયુક્ત 26 વર્ષીય ડિન્કલબેન શીંગોડાવાળાનું નિધન થયું

November 25, 2025 | 24:24 IST