SURAT : કેડ સમા પાણીમાંથી ચાલતા પસાર થઇને બેભાન દર્દીને એમ્બ્યુલન્સ સુધી લઇ જવો પડ્યો

સુરત શહેરના પર્વત પાટિયા વિસ્તારમાં છેલ્લા ત્રણ દિવસથી પાણી ભરાઈ રહ્યા હોવાથી સ્થાનિક લોકો ભારે પરેશાન છે. વ્રજભૂમિ, ઋષિ વિહાર, સત્યમ શિવમ હાઈટ, નંદનવન, વૃંદાવન અને માધવબાગ સોસાયટીઓના હજારો રહેવાસીઓ ખાડીપૂરથી તંગ છે. લિંબાયતમાં મીઠી ખાડીમાં હજુ પણ પાણી ભરાયેલી હોવાથી લોકોને તકલીફોનો સામનો કરવો પડી રહ્યો છે.

લિંબાયતમાં રહેમાનભાઈના હૃદયમાં દુખાવો થતાં તાત્કાલિક સારવાર માટે ફાયર વિભાગને બોલાવવામાં આવ્યો હતો, પરંતુ બોટની સુવિધા ન હોવાથી સમયસર હોસ્પિટલ પહોંચાડવામાં વિલંબ થયો. 65 વર્ષીય રહેમાનને સ્મીમેર હોસ્પિટલમાં લઈ જવાયા જ્યાં તેમની સારવાર ચાલુ છે.

108 એમ્બ્યુલન્સ સ્ટાફ ઘટના સ્થળે સમયસર પહોંચ્યો છતાં પાણી અને બોટની અછતને કારણે દર્દીને હોસ્પિટલ પહોંચાડવામાં 30 મિનિટનો વિલંબ થયો. આ ઘટના ચોમાસા દરમ્યાન તબીબી કટોકટીમાં તંત્રની સુવિધાઓની તંગી દર્શાવે છે.

 

પર્વત પાટિયા વિસ્તારમાં 1-1.5 કિલોમીટરના રસ્તા પર પાણી ભરાઈ ગયાનું જોવા મળ્યું છે, જેનાથી વાહનચાલકો અને મુસાફરો માટે  ખરાબ પરિસ્થિતિ ઉભી થઈ છે. લોકોને કામ-ધંધા માટે જતાં ભારે તકલીફ પડે છે. ઘણા તો પેડલ રિક્ષા માટે રૂપિયા 100 સુધી ચૂકવીને પાણીમાંથી બહાર આવી રહ્યા છે. પાણીમાંથી પસાર થતી ઘણી વાહનોના બંધ પડવાની પણ ઘટનાઓ નોંધાઈ છે.

સ્થાનિકો તંત્રની પાણીના યોગ્ય નિકાલ માટે નિષ્ફળતાની કડક આક્ષેપ કરી રહ્યા છે. પાલિકા કમિશનર દ્વારા તાજેતરમાં જ આ વિસ્તારની મુલાકાત લીધી હોવા છતાં પરિસ્થિતિમાં કોઈ સુધારો ન થતાં લોકોમાં તંત્ર પ્રત્યે રોષ વ્યાપી ગયો છે.

આ પણ વાંચો--- દક્ષિણ ગુજરાતમાં મેઘમહેર, 4 કલાકમાં 4 ઈંચ વરસાદ!