અમદાવાદ પ્લેન ક્રેશને લઈને સુરતમાં મૃતકો માટે નર્સિંગ સ્ટાફે શ્રદ્ધાંજલિ અર્પી

સુરત શહેરથી આજે એક ભાવુક દ્રશ્ય સામે આવ્યું છે, જ્યાં અમદાવાદ પ્લેન ક્રેશ દુર્ઘટનામાં મૃત્યુ પામેલા લોકોને સુરત સિવિલ હોસ્પિટલના તબીબો, નર્સિંગ સ્ટાફ અને અન્ય કર્મચારીઓ દ્વારા શ્રદ્ધાંજલિ અર્પણ કરવામાં આવી છે.

સિવિલ હોસ્પિટલના કર્મચારીઓએ હાથમાં મીણબત્તી પ્રજ્વલિત કરી અને દુર્ઘટનામાં જીવ ગુમાવનારી આત્માઓ માટે ભગવાન પાસે શાંતિની પ્રાર્થના કરી. આ સમગ્ર વિધિ શાંતિપૂર્વક અને શોકભાવના સાથે યોજાઈ હતી.

વિમાન દુર્ઘટનામાં અત્યાર સુધીમાં 241 લોકોના મૃત્યુ થયાનું જાણવા મળે છે. દુર્ઘટનામાં BJ મેડિકલ કોલેજના કેટલાક વિદ્યાર્થીઓના કરુણ મૃત્યુ પણ થયા છે, જેના કારણે તબીબી જગત પણ શોકમય છે.

સુરત શહેર અને જિલ્લા મળીને કુલ 11 મુસાફરો પણ આ દુર્ઘટનાગ્રસ્ત વિમાનમાં સવાર હતા. સમગ્ર રાજ્ય અને દેશમાં ઘટનાને લઈ ઘોર શોક વ્યાપ્ત છે.