આજથી ધો. 10 અને 12ની પૂરક પરીક્ષાઓનો પ્રારંભ, 2.08 લાખ વિદ્યાર્થીઓ આપશે પરીક્ષા

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-10 અને 12ની પૂરક પરીક્ષાઓ આજે 23 જૂનથી શરૂ થઈ ગઈ છે. સમગ્ર રાજ્યમાંથી કુલ 2,08,314 વિદ્યાર્થીઓ પૂરક પરીક્ષા માટે નોંધાયા છે.

આ પરીક્ષાઓમાં ખાસ વાત એ છે કે, 13 હજારથી વધુ પાસ થયેલા વિદ્યાર્થીઓ પણ પોતાનું પરિણામ સુધારવા માટે ફરી પરીક્ષા આપી રહ્યા છે. આ ઉપરાંત, બોર્ડ દ્વારા લાવવામાં આવ્યો નવો નિર્ણય મુજબ, આ વખતે ધોરણ-10 અને 12ના નાપાસ થયેલા વિદ્યાર્થીઓને ગમે તેટલા વિષયોમાં પૂરક પરીક્ષા આપવાની છૂટછાટ આપવામાં આવી છે.

પરીક્ષા કેન્દ્ર અને આયોજન

પરીક્ષાને લઈને કુલ 68 ઝોન અને 112 કેન્દ્રો પર પરીક્ષાનું આયોજન કરાયું છે. 646 સ્કૂલોના 6048 વર્ગખંડમાં પરીક્ષા યોજાશે. ભરૂચ જિલ્લામાં 19 કેન્દ્રો પર પરીક્ષા લેવામાં આવશે.

પરીક્ષાનું શિડ્યૂલ

ધોરણ 10ની 23 જૂનથી 1 જુલાઈ સુધી પરીક્ષા યોજાશે, જ્યારે ધોરણ 12 સામાન્ય પ્રવાહની 23 જૂનથી 3 જુલાઈ સુધી પરીક્ષા ચાલશે. તથા ધોરણ 12 વિજ્ઞાન પ્રવાહની 23 જૂનથી 30 જૂન સુધી પરીક્ષા ચાલશે.

વિદ્યાર્થીઓની વિગતવાર નોંધણી

ધોરણ 10માં 1,26,229 વિદ્યાર્થીઓ પરીક્ષા આપશે. જ્યારે ધોરણ 12 સામાન્ય પ્રવાહમાં 51,813 વિદ્યાર્થીઓ  પરીક્ષા આપશે. જ્યાર ધોરણ 12 વિજ્ઞાન પ્રવાહમાં 30,272 વિદ્યાર્થીઓ પરીક્ષા આપશે. જેમાંથી વિજ્ઞાન  પ્રવાહના 10 હજારથી વધુ પાસ વિદ્યાર્થીઓ ફરી પરીક્ષા આપશે. તથા ધોરણ 10ના 2 હજારથી વધુ પાસ થયેલા વિદ્યાર્થીઓનો પણ સમાવેશ થાય છે.

આજે પ્રથમ દિવસે લેવામાં આવનારી પરીક્ષા

ધો. 10માં આજે પ્રથમ ભાષા – ગુજરાતી, હિન્દી, મરાઠી, અંગ્રેજી, ઉર્દુ, સિંધિ, તામીલ, તેલગુ, ઉડિયાની પરીક્ષા લેવાશે. જ્યારે ધો. 12 વિજ્ઞાન પ્રવાહમાં ભૌતિક વિજ્ઞાનની પરીક્ષા લેવાશે. તથા ધો. 12 સામાન્ય પ્રવાહમાં સવારે આંકડાશાસ્ત્ર અને બપોરે ભૂગોળની પરીક્ષા હશે.