લગ્નના રીતરીવાજ મુદ્દે બે જૂથ વચ્ચે પથ્થરમારો

સાબરકાંઠા જિલ્લાના હિંમતનગર નજીક આવેલા બળવંતપુરા ગામ પાસે આજે એક જ સમાજના બે જૂથો વચ્ચે હિંસક અથડામણ થતાં વિસ્તારમાં તંગદિલીનો માહોલ સર્જાયો હતો. પ્રાથમિક તપાસમાં બહાર આવ્યું છે કે આ અથડામણનું મૂળ કારણ સામાજિક રીતરીવાજો અને લગ્નની બાબતે ઊભી થયેલી જૂની અદાવત હતી.

જીવાપુર ગામના લોકોએ કર્યો પથ્થરમારો : 

મળતી માહિતી મુજબ, હિંમતનગરના જીવાપુર ગામના ઓડ સમાજના લોકોએ અન્ય જૂથ પર હુમલો કર્યો હતો. બંને પક્ષોએ સામસામે ઉગ્ર પથ્થરમારો કર્યો હતો, જેના કારણે પરિસ્થિતિ વણસી હતી. આ હિંસક અથડામણનું કારણ લગ્નની બાબત સાથે જોડાયેલા સામાજિક રીતરીવાજોમાં થયેલો વિવાદ હોવાનું જાણવા મળ્યું છે. પથ્થરમારાની આ ઘટનામાં એક યુવતીને ઈજા પહોંચી હતી, જ્યારે હુમલા દરમિયાન એક કારના કાચ પણ તોડી નાખવામાં આવ્યા હતા.

પોલીસનો કાફલો ઘટનાસ્થળે : 

ઘટનાની ગંભીરતાને જોતાં પોલીસની ટીમ તાત્કાલિક બળવંતપુરા પાસે પહોંચી હતી અને પરિસ્થિતિને કાબૂમાં લેવાના પ્રયાસો હાથ ધર્યા હતા. પથ્થરમારામાં ઘાયલ થયેલી યુવતીને તાત્કાલિક હિંમતનગરની સિવિલ હોસ્પિટલ ખાતે સારવાર અર્થે ખસેડવામાં આવી છે. પોલીસ હાલમાં આ સમગ્ર મામલે તપાસ કરી રહી છે કે કયા ચોક્કસ સામાજિક રીતરીવાજને લઈને આ હિંસક અથડામણ થઈ હતી અને જવાબદાર વ્યક્તિઓ સામે કાયદેસરની કાર્યવાહી શરૂ કરી છે.