Sabarkantha: ખેડબ્રહ્મામાં ચોખ્ખાં પાણી માટે વલખાં, સમ્પ પાણીમાં ગરકાવ!

તાજેતરમાં વરસેલા મુશળધાર વરસાદને પગલે ખેડબ્રહ્મા શહેરીજનોને ચોમાસાની ઋતુમાં પીવાના તેમજ વપરાશ માટેના પાણી માટે વલખા મારવાનો વારો આવ્યો છે.એક જ રાતમાં 15 ઇંચ જેટલા ખાબકેલા વરસાદને લઈ ખેડબ્રહ્મા પાલિકાનો પાણીનો સમ્પ વરસાદી પાણીમાં ધરકાવ થયો હતો.જેને પગલે સમ્પની મોટરો સહિત 25 લાખ લીટરના પાણીના સમ્પમાં નદી-નાળા સહિત ગટરના પાણી ભરાઈ જવાને પગલે સાફસફાઈ સહિત ઇલેક્ટ્રિક મશીનરીનું રિપેરિંગ કામ હાથ ધરાયું છે.

સાબરકાંઠા જિલ્લાના ખેડબ્રહ્મા શહેર વચ્ચેથી પસાર થતી હરણાવ નદી પાસે કરોડો રૂપિયાના ખર્ચે પાલિકા દ્વારા બનાવાયેલા મુખ્ય પાણીના સમ્પમાં  ભારે વરસાદે તારાજી સર્જી છે. 25 લાખ લીટર પાણીનું સંગ્રહ કરતા સમ્પમાં નદી,નાળા,સહિત ગટરોના પાણી ભરાઈ જવાને પગલે સમ્પમાં રહેલ ઇલેક્ટ્રિક સાધનો સહિત સમ્પમાં ભારે નુકસાન થવા પામ્યું છે.

છેલ્લા ચાર દિવસ કરતાં વધુ સમયથી ખેડબ્રહ્મા નગરપાલિકાના મોટાભાગના રહેણાક વિસ્તારોમાં પાણીની સમસ્યા સર્જાઈ છે.જેને પગલે હાલના સમયે સ્થાનિકો ટેન્કરો થકી પાણી ભરવા મજબૂર બન્યા છે.પાલિકા તંત્રની બેદરકારીને પગલે સ્થાનિક રહીશો ધરકામ સહિત વપરાશ માટેનુ પૂરતું પાણી ન મળવાને કારણે મોટાભાગના વિસ્તારોમાં જરૂરિયાત માટે ખર્ચ થકી ટેન્કરો લાવી પાણી મેળવી રહ્યા છે.જો કે,સામાન્ય રીતે ઉનાળાની ઋતુમાં પાણીની સમસ્યા સર્જાતી હોય છે.

ખેડબ્રહ્મા શહેરી વિસ્તારમાં ચોમાસાની શરૂઆતથી જ અતિશય ભારે વરસાદ બાદપણ સ્થાનિક લોકો પાણી માટે સ્થાનિકો સાથે ઝઘડા કરી જરૂરિયાત કરતા ખૂબ ઓછું પાણી ટેન્કર થકી મેળવી રહ્યા છે.આવનારા દિવસોમાં પાલિકા દ્વારા સ્થાનિક રહીશોને પીવા તેમજ વપરાશ માટેના પાણીની વૈકલ્પિક વ્યવસ્થા સાથે સાથે પાણીના નળમાં રાબેતા મુજબ પાણી મળે તે પ્રમાણેની આજીજી પણ કરી રહ્યા છે.

એક તરફ નગરપાલિકા દ્વારા કરોડો રૂપિયાના ખર્ચે તૈયાર કરાયેલા પાણીના મુખ્ય સંપમાં વરસાદી પાણી ભરાઈ જવાને પગલે સ્થાનિક લોકોમાં ભારે નારાજગી જોવા મળી છે.જો કે,આ મામલે તાજેતરમાં નવીન વરાયેલી નગરપાલિકા પ્રમુખે વહીવટી શાસન દરમિયાન બનાવેલી દિવાલ મામલે જણાવ્યું હતું કે,પોણા બે લાખ રૂપિયાના ખર્ચે પ્રોટેક્શન દિવાલ બનાવી હતી.તે તૂટતા હાલમાં પાણી બંધ છે.આ સાથે પાણી બંધ હોવાથી સ્થાનિક શહેરીજનોને તકલીફ પડે છે.ત્યારે યુદ્ધના ધોરણે કામગીરી શરૂ કરી હાલમાં પ્રોટેકશન દિવાલ સહિત સંપના સમારકામ મામલે કામગીરી હાથ ધરવામાં આવી છે.તેમજ ટૂંક સમયમાં ખેડબ્રહ્મા શહેરની પૂર્વવત પાણી આપવા તંત્ર કામે લાગ્યું છે.

હાલમાં ખેડબ્રહ્મા વિસ્તારમાં પાણીની તકલીફ સર્જાયા બાદ મોટાભાગના દરેક લોકો ફરી એકવાર ટેન્કરથી પાણી લેવા મજબૂર બન્યા છે.તેમજ ટેન્કર લેવા જતા સ્થાનિક કક્ષાએ વ્યાપક ઝઘડાઓ પણ વધ્યા છે.પાણીના મામલે ખેડબ્રહ્મા નગરપાલિકાના સ્થાનિક આગેવાને જણાવ્યું હતું કે,વહીવટી શાસનકાળ દરમિયાન થયેલા મોટાભાગના કામોમાં વ્યાપક ભ્રષ્ટાચાર થયો છે.જેનું જીવતું જાગતું ઉદાહરણ સંપ તેમજ પ્રોટેક્શન દિવાલ છે.ત્યારે ચોમાસાની શરૂઆતમાં જ સમગ્ર દિવાલ ધોવાઈ ગઈ છે.જો કે,પ્રારંભે જ વ્યાપક ભ્રષ્ટાચાર થયા હોવાનું ખુલ્યું છે.

સાતથી આઠ માસ અગાઉ પાલિકા તંત્ર દ્વારા વહીવટદાર શાસનમાં સંપની ફરતે બનાવાયેલી પ્રોટેક્શન દિવાલ વરસાદી પાણીમાં ધોવાયાને પગલે સંપમાં રહેલી ઇલેક્ટ્રિક મશીનરી તેમજ સંપના પાણીમાં નુકસાની થવા પામી હતી.પાલિકા દ્વારા પોણા બે લાખના ખર્ચે નિર્માણ કરાયેલ પ્રોટેક્શન દિવાલ બનાવી હતી.પાણીના પ્રોટક્શન માટે બનાવાયેલી આ દિવાલ ધરાશાયી થવાના પગલે સમગ્ર ખેડબ્રહ્મા શહેર આજે પાણી વિના વલખા મારે છે.ત્યારે આવનારા સમયમાં આ મામલે ચોક્કસ તપાસ કરવામાં આવે તો દીવાલના ભ્રષ્ટાચાર સહિત સ્થાનિક કક્ષાએ પણ વ્યાપક ભ્રષ્ટાચાર ખૂલે તેમ છે.