RAJKOT : એકબાજુ બાળકો રમે છે. બીજી બાજુ લુખ્ખા તત્વોનો આતંક

રાજકોટમાં લુખ્ખા તત્વો બેફામ બન્યા છે. શહેરના ઝુલેલાલ નગરમાં લુખ્ખા તત્વોના આતંકની ઘટના સામે આવી છે. ઝૂલેલાલ નગરમાં સામાન્ય બાબતે લુખ્ખા તત્વો લોકોને હેરાન કરતા હોવાના દ્રશ્યો સીસીટીવી કેમેરામાં કેદ થયા છે. ઝૂલેલાલ નગરમાં વાહન અથડાવવા મામલે પથ્થરમારાની ઘટના બનવા પામી. જેમાં સિંધી પરિવારના લોકોને ગંભીર રીતે ઘાયલ થયા હતા. જેના બાદ મામલો પોલીસ સ્ટેશન પહોંચ્યો છે. 

વાહનની અથડામણમાં થયો પથ્થરમારો : 

રાજકોટમાં ઝૂલેલાલ નગરમાં રહેતો સિંધી પરિવાર લુખ્ખા તત્વોની હેરાનગતિનો ભોગ બન્યો. આ ઘટનાના સિસીટીવી સામે આવ્યા છે જેમાં દેખાય છે કે ઝૂલેલાલ નગરમાં એકબાજુ બાળકો રમી રહ્યા છે. અને બીજી બાજુ સામસામેથી બે વાહન પસાર થાય છે. તે દરમિયાન બંને વાહનની અથડામણ થતા વાહનચાલકો વચ્ચે બબાલ થઈ. વાહન અથડાવવાની માથાકૂટ એટલી વણસી ગઈ કે એક વાહનચાલક પર પથ્થરમારો કરવામાં આવ્યો. જેના કારણે તેને ગંભીર ઇજા પહોંચી. પથ્થરમારાની ઘટનામાં ભોગ બનનાર વાહન ચાલક યુવાન સિંધી પરિવારનો છે. 

લુખ્ખા તત્વો વિરુદ્ધ આકરી કાર્યવાહીની માગ :

સિંધી પરિવારે યુવાનને ઇજા પહોંચતા પોલીસમાં લુખ્ખા તત્વો સામે ફરિયાદ નોંધાવી. સિંધી પરિવારનો આક્ષેપ છે કે આ વિસ્તારમાં કાળી ટોળકીએ આતંક મચાવ્યો છે. લુખ્ખા તત્વો લોકોને ખોટી રીતે હેરાન કરી રહ્યા છે. પોતાની દાદાગીરી કરતા આ લુખ્ખા તત્વો બેફામપણે વાહન હંકારે છે અને જો કોઈ ફરિયાદ કરે તો કાર બેફામ દોડાવી અકસ્માતની ધમકી આપે છે. વધુમાં પરિવારે લુખ્ખા તત્વો પર આક્ષેપ કરતાં કહ્યું કે તેઓ પ્રતિબંધિત દારુનો ધંધો કરે છે અને હિંસાત્મક માનસિકતા ધરાવે છે. એટલે આ વિસ્તારમાં રહેતા બાળકો અને મહિલાઓ માટે જોખમ સર્જી શકે છે માટે અમારી માગ છે કે પોલીસ આ મામલામાં લુખ્ખા તત્વો વિરુદ્ધ આકરી કાર્યવાહી કરે.