વડોદરામાં સમસ્યાથી ઘેરાયેલા લોકોએ કોર્પોરેટરોનો ઘેરાવ કર્યો

વડોદરાવાસીઓ હવે કોર્પોરેટરો અને કોર્પોરેશનના શાસકોથી એટલી હદે ત્રાસી ગયા છે કે તેઓ હવે પોતાને નડતી સમસ્યા માટે ખુલ્લેઆમ કોર્પોરેટરોનો વિરોધ કરી રહ્યા છે. શહેરના કારેલીબાગ વિસ્તારમાં બનેલી આજે બનેલી ઘટનાએ શહેર ભાજપ અને કોર્પોરેશનના શાસકોની પોલ ખોલી દીધી છે. કોર્પોરેશનની ચૂંટણીને આડે હવે માડ 6 મહિના બચ્યા છે ત્યારે જ શહેરમાં કામ ના કરનારા કોર્પોરેટરોનો ઉગ્ર વિરોધ શરુ થયો છે. આજે કારેલીબાગમાં શહેર પ્રમુખ ડો. જયપ્રકાશ સોનીની હાજરીમાં જ લોકોએ ભાજપના કોર્પોરેટર બંદિશ શાહ , મનોજ પટેલ મંછો અને શ્વેતા ઉત્તેકરનો સ્થાનિકોએ ઘેરાવ કરીને ઉગ્ર વિરોધ કર્યો હતો.

વડોદરા મહાનગર ભાજપ દ્વારા જળશક્તિ અભિયાન અંતર્ગત આજે વડોદરા શહેરના કારેલીબાગ વિસ્તારમાં અંબાલાલ પાર્ક ગ્રાઉન્ડની બાજુમાં કાર્યક્રમ યોજાયો હતો. આ કાર્યક્રમમાં વડોદરામાં સૌ પ્રથમ “ સ્પોન્જ પોન્ડ ” નું ઉદ્ઘાટન અને “હોમ કંમ્પોસ્ટ કીટ " વિતરણનો કાર્યક્રમ યોજાયો હતો. જ્યાં કોર્પોરેટર સ્થાનિકોના રોષનો ભોગ બન્યા હતા. વરસાદી પાણી ભરાય ત્યારે કોઈ જોવા આવતું નથી અને આજે ઉદ્ઘાટન માટે અહીંયા આવ્યા છો તેમ કહી આક્રોશિત લોકોએ કોર્પોરેટર બંદિશ શાહને ઘેરી લીધા હતા.

આ અંગે સ્થાનિકોએ કોર્પોરેટરોને સ્પષ્ટપણે જણાવ્યું હતું કે, અમે અહીંયા રહીએ છીએ અને અહીંયા 560 મકાનો આવેલા છે. ઇલેક્શન આવે છે ત્યારે બધા આવે છે પરંતુ પાણી ભરાય ત્યારે કોઈ આવતું નથી. આ બધી મહિલાઓને પૂછો, આ બોર બનાવ્યો તેનો અમને વિરોધ નથી. પરંતુ અહીંયા લાઇન ચોકઅપ છે તો પાણી પોતાનો રસ્તો કઈ રીતે કરશે. અમે અનેક રજૂઆત કરી ત્યારે કોઈ આવતું નથી. વર્ષ 2019માં પાણી ભરાયું હતું ત્યારે કોઈ આવ્યું ન હતું. આ તો ઉદ્ઘાટન કરવા આવ્યા છે. અમારી માંગણી એટલી જ છે કે અમને બાંહેધરી આપે કે આ વર્ષે અહીંયા પાણી નહીં ભરાય. જ્યારે વરસાદનું પાણી આવે છે ત્યારે બધાનું અનાજ બગડે છે. પાછળથી ગટરનું પાણી આવે છે આગળથી વરસાદનું પાણી. કોઈ જોવા માટે આવતું નથી વોટ લેવા હોય તો બધા દોડી દોડી આવે છે. આ કાર્યક્રમ છે એટલે અહીંયા બધા આવ્યા છે. બે દિવસ અગાઉ જ લાઇન બંધ થઈ હતી તો પાણી જતું ન હતું. વોટ લેવાના ટાઇમ બધા હાથ જોડે છે પછી કોઈ આવતું નથી.

આ પણ વાંચો--- VADODARA : વકીલને લાફા મારવાના પ્રકરણમાં પીઆઇની બદલી