બોટાદ જિલ્લાના હડદડ ગામે ખેડૂતો અને પોલીસ વચ્ચે થયેલા ઘર્ષણ બાદ ગુજરાતનું રાજકારણ ફરી એકવાર ગરમાયું છે. 'કડદાપ્રથા' બંધ કરવાની અને ખેડૂતોને ન્યાય અપાવવાની માંગ સાથે આમ આદમી પાર્ટી (AAP)ના નેતા રાજુ કરપડા અને પ્રવીણ રામે અમદાવાદ કાર્યાલય ખાતે આમરણાંત ઉપવાસ પર બેસવાની જાહેરાત કરી હતી, પરંતુ પોલીસે આજે ગુરુવારે (16 ઓક્ટોબર) તેમની ધરપકડ કરી છે.
ઉપવાસ પહેલાં ધરપકડ
મળતી માહિતી મુજબ, અમદાવાદ સ્થિત AAPના કાર્યાલય ખાતે નેતાઓ ઉપવાસ પર બેસે તે પહેલાં જ પોલીસે સ્થળ પર ચાંપતો બંદોબસ્ત ગોઠવી દીધો હતો અને કરપડા અને પ્રવીણ રામની ધરપકડ કરી હતી.
હડદડ ઘર્ષણનો મામલો
બોટાદના હડદડમાં 12 ઓક્ટોબરે કિસાન મહા પંચાયતનું આયોજન કરાયું હતું. પોલીસનો દાવો હતો કે આ આયોજન મંજૂરી વિના કરાયું હતું. જ્યારે પોલીસ આયોજન રોકવા પહોંચી, ત્યારે ઉશ્કેરાયેલા ટોળાએ પોલીસના વાહનો પર પથ્થરમારો કર્યો હતો. સ્થિતિને કાબુમાં લેવા માટે પોલીસે ટિયર ગેસના શેલ છોડવાની ફરજ પડી હતી.
આ ગંભીર મામલામાં પોલીસે અત્યાર સુધીમાં કુલ 85 લોકો સામે ફરિયાદ નોંધી છે. પોલીસે 65 આરોપીઓની ધરપકડ કરીને કોર્ટમાં રજૂ કર્યા હતા. જેમાંથી કોર્ટે 18 આરોપીઓને આગામી 20 ઓક્ટોબર સુધી, એટલે કે છ દિવસના પોલીસ રિમાન્ડ પર સોંપવાનો આદેશ કર્યો છે, જ્યારે બાકીના 47 આરોપીઓને જેલ હવાલે કરવામાં આવ્યા છે.
કડદાપ્રથા વિરુદ્ધ આંદોલન
આ સમગ્ર વિવાદની શરૂઆત બોટાદ માર્કેટયાર્ડ (APMC) ખાતે કપાસના વેપારીઓ દ્વારા વજનમાં કરાતા 'કડદા' વિરુદ્ધ ખેડૂતોના આંદોલનથી થઈ હતી. 10 ઓક્ટોબરે મોડી રાત્રે ખેડૂતોએ યાર્ડમાં ભજન-કીર્તન કરીને વિરોધ નોંધાવ્યો હતો, જે બાદ મામલો વધુ વકર્યો હતો.

આમરણ ઉપવાસ પર બેસે તે પહેલા કાર્યવાહી

બોટાદ ખેડૂત આંદોલન: 'કડદાપ્રથા' વિરુદ્ધ ઉપવાસ પહેલાં રાજુ કરપડા અને પ્રવીણ રામ ઝડપાયા

October 17, 2025 | 24:06 IST