વડાપ્રધાન નરેન્દ્ર મોદીએ આજે ભાવનગરની મુલાકાત લીધી હતી, જ્યાં તેમણે એક ભવ્ય રોડ શો કર્યો અને 'સમુદ્ર સે સમૃદ્ધિ' કાર્યક્રમમાં ભાગ લીધો. આ કાર્યક્રમમાં તેમણે ગુજરાતને 1 લાખ કરોડથી વધુના વિકાસકાર્યોની ભેટ આપી. ભાવનગર પહોંચતા જ તેમનું ભવ્ય સ્વાગત કરવામાં આવ્યું હતું, જેમાં મોટી સંખ્યામાં સમર્થકો અને વિદ્યાર્થીઓ હાજર રહ્યા હતા. વડાપ્રધાને જણાવ્યું હતું કે, વર્ષ 2047 સુધીમાં વિકસિત રાષ્ટ્ર બનવા માટે ભારતનું આત્મનિર્ભર બનવું અનિવાર્ય છે. આ માટે તેમણે "ચીપ હોય કે શીપ, આપણે ભારતમાં જ બનાવવા પડશે"નો નારો આપ્યો હતો અને કહ્યું કે, આ જ વિચાર સાથે ભારત મેરિટાઈમ સેક્ટરમાં નેક્સ્ટ જનરેશન રિફોર્મ કરવા જઈ રહ્યું છે.&nbsp;
આત્મનિર્ભર ભારત અને કોંગ્રેસ પર પ્રહાર
PM મોદીએ 'આત્મનિર્ભર ભારત'ના મહત્વ પર ભાર મૂકતા તેને '100 દુઃખોની એક દવા' તરીકે ગણાવ્યું. તેમણે કહ્યું કે, સાચો દુશ્મન બીજા દેશો પરની નિર્ભરતા છે અને આ નિર્ભરતાને હરાવવા માટે આપણે સૌએ સાથે મળીને કામ કરવું પડશે. તેમણે કોંગ્રેસ સરકાર પર આકરા પ્રહાર કરતા કહ્યું કે આઝાદી પછી કોંગ્રેસે ભારતની ક્ષમતાઓને નજરઅંદાજ કરી, જેના કારણે દેશને લાંબા સમય સુધી લાયસન્સ-કોટા રાજમાં ફસાવી રાખ્યો અને વૈશ્વિક બજારથી અલગ રાખ્યો. વડાપ્રધાને તાજેતરના મોનસૂન સત્રમાં જૂના કાયદાઓ બદલવાની અને મેરિટાઈમ સેક્ટરમાં સુધારા લાવવાની વાત પણ કરી.
આ પણ વાંચો: <a href="https://www.benefitnews24.com/gujarati/politics/pm-75-a-celebration-of-service-message-and-dedication/19415" target="_blank" rel="noopener">PM @ 75 : સેવા, સંદેશ અને સમર્પણનો ઉત્સવ</a>
ગુજરાતને મોટી ભેટ અને વિકાસકાર્યો
ભાવનગરમાં વડાપ્રધાને 34,200 કરોડથી વધુની અનેક વિકાસ યોજનાઓનું ઉદ્ઘાટન અને શિલાન્યાસ કર્યા. તેમણે 22 પ્રોજેક્ટ્સનો શિલાન્યાસ અને 9 પ્રોજેક્ટ્સનું લોકાર્પણ કર્યું. આમાં મુખ્યત્વે પોર્ટ્સ, શિપિંગ અને વોટરવેઝ મંત્રાલય હેઠળના 7,870 કરોડના પ્રોજેક્ટ્સ, તેમજ ગુજરાત સરકારના વિવિધ વિભાગો હેઠળના 2,524 કરોડના વિકાસકાર્યોનો સમાવેશ થાય છે.&nbsp;
મહત્વના પ્રોજેક્ટ્સનો શિલાન્યાસ
આ ઉપરાંત, તેમણે પાલિતાણામાં સોલાર પ્રોજેક્ટ, ભાવનગરની સર ટી. હોસ્પિટલ માટે ટીચિંગ હોસ્પિટલ અને એમસીએચ બ્લોકનું નિર્માણ, તેમજ સુએજ ટ્રીટમેન્ટ પ્લાન્ટ જેવા મહત્વના પ્રોજેક્ટ્સનો શિલાન્યાસ કર્યો. વડાપ્રધાને ભાવનગર, બોટાદ, અમરેલી અને સુરેન્દ્રનગર જિલ્લામાં વીજળીની લાઈનોને બદલવાના પ્રોજેક્ટ્સનું પણ ખાતમુહૂર્ત કર્યું.
પ્રવાસન અને યુવાનોમાં ઉત્સાહ
વડાપ્રધાનની આ મુલાકાત દરમિયાન કચ્છના ધોરડો ગામને યુનાઈટેડ નેશન્સ વર્લ્ડ ટુરિઝમ ઓર્ગેનાઈઝેશન દ્વારા 'બેસ્ટ ટુરિઝમ વિલેજ' તરીકે સ્થાન મળ્યું હોવાનું પણ જાહેર કરવામાં આવ્યું. વડાપ્રધાન મોદીના હસ્તે સૌર ઊર્જા સંચાલિત ધોરડો ગામનું પણ લોકાર્પણ કરવામાં આવ્યું. ભાવનગરમાં યોજાયેલા રોડ શો દરમિયાન યુવાનોમાં અનોખો ઉત્સાહ જોવા મળ્યો હતો, ખાસ કરીને વિદ્યાર્થીઓએ 'માય ભારત'ના લોગોવાળા ટી-શર્ટ પહેરીને વડાપ્રધાનનું અભિવાદન કર્યું હતું.

PM મોદીએ ભાવનગરમાં 1 લાખ કરોડથી વધુના વિકાસ કાર્યોની ભેટ આપી

September 20, 2025 | 19:24 IST