ગુજરાતમાં 70 લાખ હેક્ટર જમીનમાં ખરીફ પાકનું વાવેતર

ગુજરાતમાં વાવણી લાયક વરસાદ થઈ જતાં ખેડૂતોએ ખરીફ પાકનું વાવેતર કર્યું છે. રાજ્યમાં અત્યાર સુધીમાં સરેરાશ 60 ટકાથી વધુ વરસાદ નોંધાયો છે. સમયસર વરસાદ થતાં વાવેતર વિસ્તારમાં વધારો થશે તેમજ સારી ઉપજ મળવાનો ખેડૂતોએ આશાવાદ વ્યક્ત કર્યો છે.

રાજ્યમાં સાર્વત્રિક વરસાદ થતા ખરીફ પાકનું સારૂ વાવેતર થયુ છે. અત્યાર સુધીમાં અંદાજે 70 લાખ હેક્ટર જમીનમાં ખરીફ પાકોનું વાવેતર થયું છે. ગત વર્ષે આ સમયગાળા દરમિયાન 74 લાખ હેક્ટરમાં ખરીફ પાકોનું વાવેતર થયું હતું. છેલ્લા 3 વર્ષની સરેરાશ જોઈએ તો રાજ્યમાં કુલ 85 લાખ હેક્ટર વાવેતર વિસ્તારની સામે આ વર્ષે 81 ટકા વિસ્તારમાં વાવેતર થઇ ગયું છે.

કપાસના ઉત્પાદનમાં ગુજરાત દેશમાં અગ્રેસર છે. દર વર્ષે ખરીફ ઋતુ દરમિયાન રાજ્યમાં કપાસનું સૌથી વધારે વાવેતર થાય છે. આ વર્ષે પણ રાજ્યમાં સૌથી વધુ 23 લાખ હેક્ટરથી વધુ જમીનમાં કપાસનું વાવેતર કરવામાં આવ્યું છે.

કપાસ બાદ રાજ્યમાં સૌથી વધુ તેલિબિયા પાકનું વાવેતર કરવામાં આવ્યું છે. કુલ 22.90 લાખ હેક્ટર જમીનમાં તેલિબિયા પાકનું વાવેતર થયું છે. ગત વર્ષે આ સમયગાળા દરમિયાન 21.80 લાખ હેક્ટર હતું. ગત વર્ષની સરખામણીએ તેલિબિયા પાકના વાવેતર વિસ્તારમાં 1 લાખ હેકટરનો વધારો થયો છે.

રાજ્યના મુખ્ય તેલીબીયા પાક મગફળીનું પુષ્કળ પ્રમાણમાં વાવેતર થયું છે. રાજ્યમાં ગત વર્ષે મગફળીનું આ સમયગાળા દરમિયાન આશરે 16 લાખ હેક્ટરમાં વાવેતર થયું હતું. જેની સામે આ વર્ષે અત્યાર સુધીમાં આશરે 2.5 લાખ હેકટરના વધારા સાથે 18.80 લાખ હેકટરથી વધુ જમીનમાં મગફળીનું વાવેતર થયું છે.

મોટાભાગના જિલ્લાઓમાં સમયસર વરસાદ આવતા ખેડૂતોએ કપાસ, મગફળી, એરંડા, તલ, સોયાબીન, ડાંગર, જુવાર સહિતના ખરીફ પાકનું વાવેતર કરી દીધું છે.