રાજકોટ TRP ગેમઝોન અગ્નિકાંડમાં 1 લાખથી વધુ પેજની ચાર્જશીટ રજૂ કરાઈ

રાજકોટના નાના મવા રોડ ઉપર TRP ગેમઝોનમાં 25 મેના રોજ આગ લાગતાં 27 નિર્દોષ લોકોના મોત થયા હતા. આગની ઘટનામાં મહાનગરપાલિકા તંત્રની ગંભીર બેદરકારી સામે આવી હતી. RMCના તત્કાલિન ટીપીઓ, ચીફ ફાયર ઓફિસર અને ગેમઝોનના સંચાલકો સહિત 15 આરોપીઓ સામે રાજકોટ તાલુકા પોલીસ સ્ટેશનમાં ગુનો નોંધી ધરપકડ કરવામાં આવી હતી. આગની ઘટનાને 60 દિવસ થયા બાદ ચાર્જશીટ મૂકવામાં આવી છે. ચાર્જશીટમાં 365 સાક્ષીઓના નિવેદન લઈ 15 હજારથી વધુ પાનાના પુરાવા રજૂ કરાયા છે. 15 આરોપીઓ સામે 1 લાખથી વધુ પાનાની ચાર્જશીટ 3 થેલામાં ભરી કોર્ટમાં રજૂ કરવામાં આવી હતી. હાલમાં તમામ આરોપીઓ જેલ હવાલે છે.   વેલ્ડિંગ કરતાં સમયે ફોમ અને વુડન સીટના કારણે આગ વિકરાળ બની :

 

રાજકોટના TRP ગેમઝોનમાં 25 મેના આગ લાગી હતી. આ દુર્ઘટનામાં 27 લોકોના મોત થયા હતા. વેલ્ડિંગ કરતા સમયે નીચે પડેલી ફોમ સીટ તેમજ વૂડન સીટ પર તણખા પડ્યા હતા. ફોમ સીટના કારણે માત્ર 5 મિનિટમાં આગે વિકરાળ સ્વરૂપ ધારણ કર્યું હતું.

પોલીસે હાથ ધરેલી તપાસમાં CCTV ફૂટેજમાં સ્પષ્ટ થયું હતું. આ કેસમાં રાજકોટ તાલુકા પોલીસ સ્ટેશનમાં ધવલ ઠક્કર, અશોકસિંહ જાડેજા, કિરીટસિંહ જાડેજા, પ્રકાશચંદ હિરણ, યુવરાજસિંહ સોલંકી અને રાહુલ રાઠોડ સહિત 6 લોકો સામે નામજોગ અને તપાસમાં ખૂલે તે અન્ય લોકો સામે ગુનો નોંધવામાં આવ્યો હતો.

ગેમ ઝોનના સંચાલકો અને કામમાં બેદરકારી દાખવનાર RMCના અધિકારીઓ સહિત 15 લોકોની ધરપકડ કરી ચાર્જશીટ રજૂ કરવામાં આવી છે.

365 સાક્ષીઓના નિવેદન લેવામાં આવ્યા :

પોલીસે 15 આરોપીઓ સામે પુરાવા એકત્રિત કરી ચાર્જશીટમાં રજૂ કર્યા છે. 365 લોકોના સાક્ષી તરીકે નિવેદન લેવામાં આવ્યા છે. જેમાંથી 30 લોકોના જ્યુડિશિયલ કન્ફેશન્સ મેળવાયા છે. 3 થેલામાં 1 લાખથી વધુ પાનાની ચાર્જશીટ રજૂ કરાઈ છે. ચાર્જશીટમાં મુખ્ય સાક્ષીઓમાં નજરે જોનારા વ્યક્તિઓ, ગેમઝોનના કર્મચારીઓ, ઇજાગ્રસ્ત લોકોના નિવેદન લેવામાં આવ્યા છે.

ભાજપના કોર્પોરેટર નીતિન રામાણીનું પણ નિવેદન લેવાયુ :

TRP ગેમઝોનના મુખ્ય સંચાલક પ્રકાશ હિરણનું દુર્ઘટનામાં મોત થયું છે. આ કેસમાં CAની નિમણૂંક કરી સાથે રાખી સંચાલકોના બેન્કિંગ વ્યવહારો, ટ્રાન્ઝેક્શન, આઇટી રિટર્ન, GDT રિટર્ન અંગે તપાસ કરવામાં આવી રહી છે.

તપાસ બાદ પુરાવા રૂપે સમાવેશ કરાશે. ભાજપના કોર્પોરેટર નીતિન રામાણીએ ગેમઝોન બાબતે ભલામણ કરી હોવાનું બહાર આવતા પોલીસે તેમનું નિવેદન નોંધી કાર્યવાહી હાથ ધરી હોવાનો ચાર્જશીટમાં ઉલ્લેખ કરાયો છે. 

સાપરાધ મનુષ્યવધ સહિતની કલમો હેઠળ ગુનો નોંધાયો હતો:

TRP ગેમઝોન અગ્નિકાંડમાં 27 લોકોના મોત થતાં સાપરાધ મનુષ્યવધ સહિતની કલમો હેઠળ ધવલ ઠક્કર, યુવરાજસિંહ સોલંકી, રાહુલ રાઠોડ, નીતિન જૈન, અશોકસિંહ જાડેજા, કિરીટસિંહ જાડેજા, વેલ્ડિંગ કોન્ટ્રાક્ટર મહેશ રાઠોડ અને RMCના પૂર્વ ટીપીઓ મનસુખ સાગઠિયા, RMCના અન્ય અધિકારીઓ ગૌતમ જોષી, મુકેશ મકવાણા, જયદિપ ચૌધરી, રાજેશ મકવાણા, ફાયર બ્રિગેડના તત્કાલિન ચીફ ફાયર ઓફિસર ઇલેશ ખેર, ડેપ્યુટી ચીફ ફાયર ઓફિસર ભીખાભાઈ ઠેબા અને સ્ટેશન ઓફિસર રોહિત વિગોરા સહિત 15 આરોપીઓ સામે ચાર્જશીટ રજૂ કરાઈ છે.

રાજ્ય સરકારે તપાસ માટે SIT ની રચના કરી હતી :

TRP ગેમઝોન અગ્નિકાંડની તપાસ માટે રાજ્ય સરકારે એસઆઈટીની રચના કરી હતી. પાંચ સભ્યોની એસઆઈટીમાં સીઆઈડી ક્રાઈમના પોલીસ મહાનિર્દેશક સુભાષ ત્રિવેદીને અધ્યક્ષ બનાવાયા હતા.

જેમાં ટેકનિકલ એજ્યુકેશનના કમિશનરના બંછાનિધિ પાની, FSLના ડાયરેક્ટર એચ.પી.સંઘવી, અમદાવાદના ચીફ ફાયર ઓફિસર જે.એન.ખડિયા અને માર્ગ અને મકાનના ક્વોલિટી કંટ્રોલ વિભાગના સુપ્રિટેન્ડિંગ એન્જિનિયર એમ.બી.દેસાઈનો સમાવેશ કરાયો હતો.

એસઆઈટીએ ક્યા સંજોગોમાં આગનો બનાવ બન્યો, ગેમિંગ ઝોનને મંજૂરી આપવામાં આવી હતી કે કેમ, મંજૂરી આપતી વખતે કઈ બાબતોને ધ્યાનમાં લેવાઈ હતી,

બાંધકામ નિયમાનુસાર હતુ કે કેમ, ફાયર વિભાગની એનઓસી હતી કે કેમ, ઈમરજન્સી એક્ઝિટ માટે વ્યવસ્થા હતી કે કેમ, સ્થાનિક તંત્ર અને ગેમિંગ ઝોનના સંચાલકોની બેદરકારી શું હતી અને ભવિષ્યમાં આ પ્રકારની ઘટના બને નહી તે માટે કેવા પગલા લેવા જોઈએ સહિતની બાબતો અંગે તપાસ કરીને રાજ્ય સરકારને અહેવાલ આપ્યો હતો.