નરોડામાં પગના તળિયા લાલ થવાનું ખૂલ્યું રહસ્ય

અમદાવાદ શહેરના નરોડા વિસ્તારમાં આવેલી ઈન્દ્રપ્રસ્થ સોસાયટીના રહેવાસીઓમાં છેલ્લા 2 દિવસથી અનોખું અને રહસ્યમય કૂતુહલ છવાયું હતું. સોસાયટીના અનેક લોકોના પગના તળિયા લાલ થઈ રહ્યા હતા. અચાનક પગના તળિયા લાલ થવાને કારણે લોકોમાં અનેક પ્રકારની ચર્ચાઓ શરૂ થઈ ગઈ હતી, અને કેટલાક લોકોએ તો તેને માતાજીનો પરચો માનીને અંધશ્રદ્ધા ફેલાવવાનું શરૂ કરી દીધું હતું. આ બાબતના કેટલાક વીડિયો સોશિયલ મીડિયામાં પણ વાયરલ થયા હતા, જેના કારણે નરોડામાં ભારે ખળભળાટ મચ્યો હતો.

કેમિકલ લિકેજની આશંકા

જ્યારે આ વાતની તપાસ કરવામાં આવી ત્યારે જાણવા મળ્યું કે, પગના તળિયા લાલ થવા પાછળ કોઈ ચમત્કાર કે માતાજીનો પરચો નહિ, પરંતુ કોઈ કેમિકલ જવાબદાર છે. સ્થાનિક લોકોએ મત વ્યક્ત કર્યો હતો કે, આ કેમિકલ ક્યાંક પાણીમાં કે અન્ય કોઈ રીતે વિસ્તારમાં ફેલાયું છે, જેના સંપર્કમાં આવવાથી લોકોના પગના તળિયા લાલ થઈ રહ્યા છે.

આ પણ વાંચો: Surat: બંગલા વિસ્તારમાં ડ્રેનેજમાંથી કેમિકલ અને કલરવાળું પાણી બહાર આવ્યું!

આરોગ્ય અને સ્વાસ્થ્ય પર અસર

આ માત્ર પગના તળિયા લાલ થવા સુધી સીમિત નથી. છેલ્લા 2 દિવસથી સોસાયટીના બાળકો અને વૃદ્ધોને શ્વાસ લેવામાં પણ સમસ્યા થઈ રહી હોવાનું જાણવા મળ્યું છે, જે કેમિકલના જોખમી પ્રભાવ તરફ ઈશારો કરે છે. આ ઘટનાએ લોકોના સ્વાસ્થ્ય માટે ગંભીર ચિંતા ઊભી કરી છે. સોસાયટીના રહીશોની માંગ છે કે, આરોગ્ય વિભાગ અને સંબંધિત સરકારી વિભાગો આ સમગ્ર મામલે યોગ્ય તપાસ કરે અને આ જોખમી કેમિકલના સ્ત્રોતને શોધીને તાત્કાલિક પગલાં લે, જેથી લોકોના સ્વાસ્થ્યની સુરક્ષા થઈ શકે. આમ, માતાજીના પરચાની અંધશ્રદ્ધા સોશિયલ મીડિયામાં ફેલાઈ હતી, પરંતુ હકીકત કેમિકલની અસર હોવાનું સાબિત થયું છે.