Gujarat માં ચોમાસાનું ધમાકેદાર આગમન: ધોધમાર વરસાદથી જળબંબાકાર

ગુજરાતમાં ઉનાળાના અસહ્ય બફારા બાદ ચોમાસાની ઋતુએ ધમાકેદાર એન્ટ્રી કરી છે. રાજ્યના અનેક વિસ્તારોમાં ધોધમાર વરસાદે ખેડૂતોના ચહેરા પર ખુશી લાવી છે, પરંતુ કેટલાક વિસ્તારોમાં જળબંબાકારની સ્થિતિ પણ સર્જાઈ છે. ગત મોડી રાત્રે બોટાદમાં માત્ર બે કલાકમાં 4 ઈંચ વરસાદ ખાબક્યો હતો, જ્યારે છેલ્લા 24 કલાકમાં રાજ્યના 221 તાલુકાઓમાં વરસાદે હાજરી પુરાવી હતી. સૌથી વધુ વરસાદ ગઢડામાં 14 ઈંચ, પાલીતાણામાં 12 ઈંચ, સિહોરમાં 11.6 ઈંચ, બોટાદમાં 11 ઈંચ, જેસરમાં 10.7 ઈંચ અને ઉમરાળામાં 10.4 ઈંચ નોંધાયો હતો.   રાજ્યમાં વહેલી સવારે 6 વાગ્યાથી 10 વાગ્યા સુધીના વરસાદના આંકડા   રાજ્યના 97 તાલુકાઓમા નોંધાયો સામાન્યથી મધ્યમ વરસાદ

ભાવનગર ના ઉમરાલા તાલુકામાં 3.66 ઇંચ વરસાદ

બોટાદના બરવાલા તાલુકામાં 3 ઇંચ વરસાદ

અમદાવાદના ઘોળકા તાલુકામાં 2.24 ઇંચ વરસાદ

અમદાવાદના ધંધુકા તાલુકામાં 2.09 ઇંચ વરસાદ

ભાવનગરના  વલ્લભીપુરત તાલુકામાં 2 ઇંચ વરસાદ

રાજકોટ શહેરમાં 1.73 ઇંચ વરસાદ

આણંદના પેટલાદ તાલુકામાં 1.65 ઇંચ વરસાદ

આણંદના ખંભાત તાલુકામાં 1.34 ઇંચ વરસાદ

હવામાન વિભાગની ચેતવણી: રેડ, ઓરેન્જ અને યલો એલર્ટ
  હવામાન વિભાગે 17 જૂનના રોજ જૂનાગઢ અને ગીર સોમનાથ જિલ્લામાં મેઘગર્જના સાથે અત્યંત ભારે વરસાદની આગાહીને પગલે રેડ એલર્ટ જાહેર કર્યું છે. આ ઉપરાંત, પોરબંદર, રાજકોટ, અમરેલી, ભાવનગર, ભરુચ, સુરત, નવસારી અને વલસાડમાં અતિભારે વરસાદને લીધે ઓરેન્જ એલર્ટ, જ્યારે દેવભૂમિ દ્વારકા, જામનગર, આણંદ, વડોદરા, છોટા ઉદેપુર, નર્મદા, તાપી અને ડાંગમાં ગાજવીજ સાથે ભારે વરસાદને કારણે યલો એલર્ટ જાહેર કરવામાં આવ્યું છે.   18 અને 19 જૂન દરમિયાન સૌરાષ્ટ્ર અને દક્ષિણ ગુજરાતના 12થી વધુ જિલ્લાઓમાં ભારેથી અતિભારે વરસાદની શક્યતા છે. જામનગર, રાજકોટ, દેવભૂમિ દ્વારકા, પોરબંદર, જૂનાગઢ, ગીર સોમનાથ, અમરેલી, ભાવનગર, ભરુચ, સુરત, તાપી, નવસારી, વલસાડ, ડાંગ, દાહોદ અને છોટા ઉદેપુર જેવા જિલ્લાઓમાં ગાજવીજ સાથે ધોધમાર વરસાદની આગાહી છે.   અમરેલીમાં જળબંબાકારની સ્થિતિ
  અમરેલી જિલ્લાના ગ્રામ્ય વિસ્તારોમાં અનરાધાર વરસાદે જનજીવનને અસર કરી છે. અમરેલી-ધારી હાઇવે પર ધોધમાર વરસાદને કારણે રસ્તાઓ પર પાણી ફરી વળ્યા છે. નાના માશીયાળા ગામ નજીક એક વૃક્ષ ધરાશાયી થઈને એસટી બસ પર પડ્યું, જેના કારણે વાહનવ્યવહાર થોડા સમય માટે ખોરવાયો હતો. દેવરાજીયા-માણીલા રોડ પર ખેતરોનું પાણી રસ્તા પર આવી જતાં માર્ગો પાણીથી ભરાઈ ગયા, જેના લીધે વાહનચાલકોને ભારે મુશ્કેલીનો સામનો કરવો પડ્યો.
ચોમાસાના આગમનથી ગુજરાતમાં ખેડૂતોમાં ખુશીની લહેર ફરી વળી છે, પરંતુ ભારે વરસાદને કારણે જળબંબાકાર અને વાહનવ્યવહારમાં અવરોધ જેવી સમસ્યાઓ પણ ઊભી થઈ છે. હવામાન વિભાગની ચેતવણીને ધ્યાનમાં રાખીને નાગરિકોએ સાવચેતી રાખવી જરૂરી છે, જેથી કોઈ અનિચ્છનીય ઘટના ટળી શકે.