ગુજરાતમાં SIRનો અમલ, મતદાર યાદી સુધારણાની તૈયારી!

કેન્દ્રીય ચૂંટણીપંચે મતદાર યાદીમાં સુધારણા અને ડુપ્લિકેટ મતદારોની ઓળખ કરવા માટે કવાયત હાથ ધરી છે. બિહાર બાદ ગુજરાત સહિતના રાજ્યોમાં કામગીરી શરૂ કરવામાં આવે તેવી શક્યતા છે.  ગુજરાતમાં પણ મોટાપાયે સ્પેશિયલ ઇન્ટેન્સિવ રિવિઝન (SIR) અભિયાન હાથ ધરવામાં આવે તેવી સંભાવના છે. કેન્દ્રીય ચૂંટણીપંચ ટૂંક સમયમાં SIR અંગે જાહેરાત કરે તેવું સૂત્રોએ જણાવ્યું છે.

ડુપ્લિકેટ અને ગેરકાયદે મતદારોને દૂર કરવાનો હેતુ

SIR પ્રક્રિયાનો મુખ્ય હેતુ મતદાર યાદીને સંપૂર્ણપણે અપડેટ કરી ડુપ્લિકેટ મતદારોને દૂર કરવાનો છે. ગેરકાયદે વસાહતોની ઓળખ કરી વિદેશી નાગરિકોને મતદાર યાદીમાંથી દૂર કરવાની કામગીરી પણ કરાશે. સમગ્ર પ્રક્રિયા પાછળનો હેતુ એ સુનિશ્ચિત કરવાનો છે કે મતદાર મૂળ ભારતીય નાગરિક છે કે નહીં. ગુજરાતમાં SIR પ્રક્રિયા હેઠળ મતદાર યાદી સુધારણા માટે તંત્ર દ્વારા તડામાર તૈયારીઓ શરૂ કરી દેવામાં આવી હોવાનું જાણવા મળ્યું છે.

મતદાર યાદી સુધારણા અભિયાન માટે ચૂંટણીપંચ સક્રિય 

ગુજરાતની તમામ વિધાનસભા બેઠકોમાં બૂથ લેવલ ઑફિસરની નિમણૂક કરવાની કવાયત શરૂ કરી દેવામાં આવી છે. બૂથ લેવલ ઓફિસર દરેક મતદારના ઘર સુધી પહોંચીને મતદારની ઓળખ કરી નવા મતદારોને યાદીમાં સામેલ કરવાની કામગીરી કરશે. મતદાર યાદી સુધારણાને લઈને અધિકારીઓને તાલીમ આપવાની કામગીરી શરૂ કરી દેવામાં આવી છે.

કોંગ્રેસના આક્ષેપ બાદ કાર્યવાહીના સંકેત

રાહુલ ગાંધીએ વોટ ચોરી અભિયાન હેઠળ કર્ણાટક અને મહારાષ્ટ્રની ચૂંટણીમાં બોગસ મતદારોનો આક્ષેપ કર્યો હતો. ત્યારબાદ બિહારમાં SIR નો મુદ્દો સુપ્રીમકોર્ટ સુધી પહોંચ્યો છે. ગુજરાતમાં પણ કોંગ્રેસે આક્ષેપ કર્યો છે કે, રાજ્યમાં 62 લાખથી વધુ મતદારો શંકાના ઘેરામાં છે. 84 બેઠકો ઉપર 6.9 લાખ મતદારો પૈકી 30 હજાર મતદારો 'ભૂતિયા' હોવાનો પુરાવો રજૂ કર્યો હતો.

વ્યક્તિના નામના સ્પેલિંગમાં ભૂલ કરીને, એપિક નંબર બદલીને અથવા જુદા-જુદા સરનામા દર્શાવીને ડુપ્લિકેટ મતદારો બનાવવામાં આવ્યા હોવાનો કોંગ્રેસનો આરોપ છે. કોંગ્રેસના આક્ષેપના પગલે રાજ્ય ચૂંટણીપંચ સામે આંગળી ચિંધાઈ છે. ટૂંક સમયમાં ચૂંટણીપંચ પત્રકાર પરિષદ કરે તેવી શક્યતા છે. જેમાં 10 થી 15 રાજ્યોમાં મતદાર સુધારણા અભિયાનની જાહેરાત કરવામાં આવે તેવી સંભાવના છે. જેમાં ગુજરાતનો સમાવેશ કરીને SIR શરૂ કરે તેવા સંકેતો મળી રહ્યા છે.