હવામાન વિભાગે ગુજરાતમાં આગામી દિવસોમાં હળવાથી મધ્યમ વરસાદની આગાહી કરી છે. ગુરુવાર ને 30 ઓક્ટોબરે પોરબંદર, જૂનાગઢ, ગીર સોમનાથ, અમરેલી, ભાવનગર અને દીવમાં છૂટાછવાયા સ્થળોએ અતિભારે વરસાદની આગાહીને પગલે ઓરેન્જ એલર્ટ જારી કરવામાં આવ્યું છે.
સૌરાષ્ટ્ર અને દક્ષિણ ગુજરાતના વિસ્તારોમાં યલો એલર્ટ જારી કરવામાં આવ્યું છે. દ્વારકા, રાજકોટ, બોટાદ, આણંદ, વડોદરા, છોટાઉદેપુર, પંચમહાલ, દાહોદ, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલીમાં છુટાછવાયા સ્થળોએ ભારે વરસાદની શક્યતા છે.
શુક્રવાર, 31 ઓક્ટોબરના રોજ દ્વારકા, પોરબંદર અને જૂનાગઢમાં છુટાછવાયા સ્થળોએ અતિ ભારે વરસાદની આગાહીને લઈને ફરીથી ઓરેન્જ એલર્ટ આપવામાં આવ્યું છે. જામનગર, રાજકોટ, અમરેલી, ગીર-સોમનાથ, દીવ, ભાવનગર, આણંદ, વડોદરા, નર્મદા, ભરૂચ, સુરત, નવસારી, તાપી, ડાંગ, વલસાડ, દમણ અને દાદરા નગર હવેલીમાં પણ છૂટાછવાયા સ્થળોએ ભારે વરસાદની શક્યતા રહેશે.
હવામાન વિભાગના ડાયરેક્ટર ડો. એ.કે. દાસે જણાવ્યું કે, આગામી 5 દિવસ માછીમારોને દરિયો ન ખેડવાની સૂચના આપવામાં આવી છે અને પોર્ટ પર એલસીએસ 3 નંબરનું સિગ્નલ લગાવવામાં આવ્યું છે. અરબી સમુદ્રમાં ડિપ્રેશનના કારણે વરસાદની આગાહી કરવામાં આવી છે. અમદાવાદમાં પણ હળવા વરસાદની શક્યતા છે.
રાષ્ટ્રીય સ્તરે વરસાદની આગાહી
ચક્રવાતી તોફાન મોન્થા મંગળવારે આંધ્ર પ્રદેશના દરિયાકિનારેથી પસાર થયું, જેના કારણે અનેક રાજ્યોમાં વરસાદ પડ્યો છે. IMDએ આગાહી કરી છે કે 29 થી 31 ઓક્ટોબર દરમિયાન ગંગાના મેદાની પ્રદેશના પશ્ચિમ બંગાળમાં થોડાક અથવા અલગ-અલગ સ્થળોએ હળવાથી મધ્યમ વરસાદ અથવા વાદળછાયા વીજળી સાથેનો વરસાદ પડવાની સંભાવના છે.
IMDએ 30 અને 31 ઓક્ટોબરે બિહાર અને ઝારખંડમાં અને 30 ઓક્ટોબરથી 1 નવેમ્બર દરમિયાન હિમાલયના પર્વતીય પ્રદેશના પશ્ચિમ બંગાળ અને સિક્કિમમાં હળવાથી મધ્યમ વરસાદની આગાહી પણ કરી છે. તેની અસર ફક્ત આ રાજ્યો સુધી સીમિત નહીં રહે કારણ કે છત્તીસગઢ, કર્ણાટક, કેરળ, તમિલનાડુ, ઝારખંડ અને પશ્ચિમ બંગાળ માટે ભારે વરસાદની ચેતવણી જારી કરવામાં આવી છે.
ભારતીય હવામાન વિભાગ (IMD)એ જણાવ્યું કે ચક્રવાત મોન્થાની લેન્ડફોલ પ્રક્રિયા સાંજે લગભગ 7 વાગ્યે શરૂ થઈ હતી. બંગાળની ખાડીમાં આવેલી આ હવામાન પ્રણાલી કાકીનાડાની આસપાસ માછલીપટ્ટનમ અને કાલિંગપટ્ટનમ વચ્ચે આંધ્ર પ્રદેશના દરિયાકિનારેથી પસાર થઈ છે. આ ચક્રવાત 90 થી 100 કિમી પ્રતિ કલાકની મહત્તમ સતત પવનની ગતિ અને 110 કિમી પ્રતિ કલાક સુધીની ઝડપી પવનો સાથે પસાર થયું હતું.
આંધ્ર પ્રદેશના મુખ્યમંત્રી નાયડુએ અધિકૃત પ્રેસ વિજ્ઞપ્તિમાં જણાવ્યું કે, "જો આપણે બીજા બે દિવસ પણ એ જ રીતે કામ કરીશું, તો આપણે લોકોને ઘણી રાહત આપી શકીશું. ચક્રવાતને કારણે બે વ્યક્તિઓના મોત થયા છે."

ગુજરાતમાં કમોસમી વરસાદથી પાકને નુકસાન

મોન્થા ચક્રવાતના પગલે દેશમાં વરસાદની આગાહી, ગુજરાતમાં ઓરેન્જ એલર્ટ

October 30, 2025 | 14:33 IST