સાબરકાંઠાના પ્રાંતિજ નજીક ગંભીર માર્ગ અકસ્માત, 3ના મૃત્યુ અને 7 ઈજાગ્રસ્ત

ગુજરાત રાજ્યમાં માર્ગ અકસ્માતોની ઘટનાઓમાં સતત વધારો જોવા મળી રહ્યો છે. તાજેતરમાં સાબરકાંઠા જિલ્લાના પ્રાંતિજના કાટવાડ ગામના નજીક એક ગંભીર માર્ગ અકસ્માત સર્જાયો હતો, જેમાં ખાનગી બસ અને ટ્રક વચ્ચે જોરદાર અથડામણ થઈ હતી. આ દુર્ઘટનામાં 3 મુસાફરોના મૃત્યુ થયા છે, જ્યારે 7 લોકો ગંભીર રીતે ઈજાગ્રસ્ત થયા છે.

રાજસ્થાન જતી બસ ટ્રક સાથે અથડાઈ

આ ઘટના સોમવારે, 23મી જૂનના રોજ સવારે બની હતી. મળતી માહિતી અનુસાર, મુસાફરો સાથે ભરેલી ખાનગી બસ મુંબઈથી રાજસ્થાન તરફ જઈ રહી હતી ત્યારે અમદાવાદ-ઉદયપુર નેશનલ હાઈવે પર કાટવાડ નજીક અચાનક બસ સામેથી આવતા ટ્રક સાથે અથડાઈ હતી. અથડામણ એટલી ભયાનક હતી કે, બસની ડાબી બાજુનો મોટો હિસ્સો ચિરાઈ ગયો હતો.

પતરા કાપીને મૃતદેહ બહાર કાઢ્યા

અથડાયા પછી બસમાં ફસાઈ ગયેલા મુસાફરોને બહાર કાઢવા માટે ફાયર બ્રિગેડને ઘસાણ કામ કરવું પડ્યું હતું. બસના પતરા કાપીને 3 મૃતદેહોને બહાર કાઢવામાં આવ્યા, જેમાં 1 મહિલા અને 2 પુરુષોનો સમાવેશ થાય છે.

108 એમ્બ્યુલન્સ અને ફાયર બ્રિગેડ પહોંચ્યા

આ ઘટના બાદ તરત જ પ્રાંતિજ પોલીસ, હાઈવે ટ્રાફિક સ્ટાફ, 4 108 એમ્બ્યુલન્સ અને પ્રાંતિજ તથા હિંમતનગરની ફાયર બ્રિગેડની ટીમો ઘટનાસ્થળે પહોંચી ગઈ હતી. ઈજાગ્રસ્તો થયેલા મુસાફરોને તાત્કાલિક સારવાર માટે હોસ્પિટલમાં ખસેડવામાં આવ્યા હતા, જ્યારે મૃતદેહોને પોસ્ટપોર્ટમ માટે પ્રાંતિજ સરકારી હોસ્પિટલ ખાતે મોકલવામાં આવ્યા.

હાઈવે પર ભીડ જામી

આ ગંભીર અકસ્માતના કારણે હાઈવે પર વાહન વ્યવહાર અટકી પડ્યો હતો અને આસપાસના લોકો પણ મોટી સંખ્યામાં ઘટનાસ્થળે ઉમટી પડ્યા હતા. પોલીસ દ્વારા સમગ્ર ઘટનાની તપાસ શરૂ કરવામાં આવી છે.