સુરતના પોલીસકર્મીનું હાર્ટ એટેકની શંકાથી મોત

સુરત શહેરના પોલીસબેડામાં શોકની લાગણી છવાઈ ગઈ છે. કારણ કે, પાંડેસરા પોલીસ સ્ટેશનમાં ફરજ બજાવતા હેડ કોન્સ્ટેબલ વિજય દલપતભાઈ વાણીનું અચાનક મોત થયું છે. મૂળ મહારાષ્ટ્રના જલગાવના વતની અને હાલ પાંડેસરા, પીયૂષ પોઈન્ટ નજીક આવેલી સાઈબાબા સોસાયટીમાં રહેતા 53 વર્ષીય વિજય વાણીનું મૃત્યુ છાતીમાં દુ:ખાવા બાદ થયું હતું. તેઓ છેલ્લા 33 વર્ષથી પોલીસ ખાતામાં નિષ્ઠાપૂર્વક ફરજ બજાવતા હતા અને પાંડેસરા પોલીસ સ્ટેશનમાં છેલ્લા 3 વર્ષથી હેડ કોન્સ્ટેબલ તરીકે સમન્સ વોરંટની બજવણીનું કાર્ય સંભાળતા હતા. તેમનો પરિવાર પત્ની અને ત્રણ સંતાનોનો છે.

જમ્યા બાદ ઉપડ્યો દુખાવો, હાર્ટ એટેકની આશંકા

રવિવારે સવારે વિજયભાઈ વાણી નિયમિતપણે પોલીસ સ્ટેશને નોકરી પર હાજર થયા હતા અને બપોરના સમયે તેઓ ઘરે જમવા માટે આવ્યા હતા. ઘરે જમ્યા બાદ તેમને એકાએક છાતીમાં અને પેટમાં દુખાવો ઉપડ્યો હતો, જેના કારણે તેઓ બેભાન થઈ ગયા હતા. તાત્કાલિક તેમને 108 દ્વારા સારવાર માટે એક ખાનગી હોસ્પિટલમાં ખસેડવામાં આવ્યા હતા.

આ પણ વાંચો: હાર્ટએટેક બાદ કંપની દ્વારા સમયસર સારવાર ન મળતા મોત

પરિવારમાં દુઃખની લાગણી પ્રસરી

જોકે, ટૂંકી સારવાર બાદ ફરજ પરના તબીબે તેમને મૃત જાહેર કર્યા હતા. પ્રાથમિક માહિતી અને લક્ષણોના આધારે, સુરત પોલીસકર્મી વિજયભાઈ વાણીનું મોત હાર્ટ એટેકના કારણે થયું હોવાની આશંકા વ્યક્ત કરવામાં આવી રહી છે. સુરત પોલીસકર્મીના અકાળે અવસાનથી પોલીસ પરિવારમાં દુઃખની લાગણી પ્રસરી ગઈ છે.

સિવિલ હોસ્પિટલમાં ગાર્ડ ઓફ ઓનર

વિજય વાણીના નિધન બાદ આજે સોમવારે સવારે સિવિલ હોસ્પિટલમાં તેમને ગાર્ડ ઓફ ઓનર આપીને શ્રદ્ધાંજલિ આપવામાં આવશે. આ સુરત પોલીસકર્મીનું જીવન અચાનક સમાપ્ત થતાં તેમના સાથી પોલીસ મિત્રો અને પરિવારજનોમાં ઊંડો શોક પ્રવર્તી રહ્યો છે. આ ઘટના ફરી એકવાર પોલીસ જેવા તણાવપૂર્ણ વ્યવસાયમાં ફરજ બજાવતા કર્મચારીઓના સ્વાસ્થ્ય અને હૃદયરોગના વધતાં જોખમ તરફ ધ્યાન દોરે છે.