Gujarat Teachers Protest: રાજ્યમાં ખેડૂતોના વિરોધ પ્રદર્શનો શાંત થાય તે પહેલાં જ હવે શિક્ષકોએ પણ સરકાર અને ન્યાયતંત્ર સામે મોરચો ખોલી દીધો છે. સુપ્રીમ કોર્ટ દ્વારા તમામ સેવામાં ચાલુ રહેલા શિક્ષકો માટે 'ટિચર્સ એલિજિબિલિટી ટેસ્ટ' (TET) પાસ કરવી ફરજિયાત બનાવવાના ચુકાદા સામે અખિલ ભારતીય પ્રાથમિક શિક્ષક સંઘે આરપારની લડાઈનું રણશિંગું ફૂંક્યું છે. સંઘની તાકીદની બેઠકમાં લેવાયેલા નિર્ણય મુજબ, 17 જૂન એટલે કે આવતીકાલથી 20 જૂન, 2026 સુધી ગુજરાતના તમામ 33 જિલ્લાઓમાં ધરણા પ્રદર્શન અને આવેદનપત્ર આપીને ઉગ્ર વિરોધ નોંધાવવામાં આવશે. આ આંદોલનમાં શિક્ષક સંઘ અને રાષ્ટ્રીય શૈક્ષિક મહાસંઘ બંને પોતપોતાની વ્યૂહરચના સાથે જોડાવાના છે.
<img src="https://ibp-benefits.s3.us-east-005.backblazeb2.com/prod/news/uploads/images/1781610948073_WhatsApp%2520Image%25202026-06-16%2520at%25204.40.38%2520PM.jpeg.jpeg" alt="WhatsApp Image 2026-06-16 at 4.40.38 PM.jpeg" width="500" height="702">
સુપ્રીમ કોર્ટનો ચુકાદો: નોકરી બચાવવી હોય તો TET પાસ કરો તાજેતરમાં સુપ્રીમ કોર્ટે શિક્ષણ જગત પર વ્યાપક અસર કરતો એક ઐતિહાસિક પરંતુ કડક ચુકાદો આપ્યો છે. કોર્ટે સ્પષ્ટ નિર્દેશ આપ્યો છે કે, શૈક્ષણિક સેવા સાથે જોડાયેલા તમામ શિક્ષકો માટે નોકરી ચાલુ રાખવા અથવા ભવિષ્યમાં પ્રમોશન (બઢતી) મેળવવા માટે TET પરીક્ષા પાસ કરવી અનિવાર્ય રહેશે. કોર્ટે વયમર્યાદાને ધ્યાનમાં રાખીને એક માપદંડ નક્કી કર્યો છે, જે મુજબ જે શિક્ષકોની નોકરીના હવે 5 વર્ષ કરતાં વધુ સમય બાકી છે, તેમણે આ પરીક્ષા પાસ કરવી જ પડશે. જો કોઈ શિક્ષક આ નિયમનું પાલન નહીં કરે, તો તેમણે કાં તો સ્વેચ્છાએ રાજીનામું આપવું પડશે અથવા સરકારે તેમને ફરજિયાત નિવૃત્તિ (VRS) આપવી પડશે. અદાલતે માત્ર એવા જ વરિષ્ઠ શિક્ષકોને રાહત આપી છે જેમની નિવૃત્તિને આડે માત્ર 5 વર્ષ કે તેથી ઓછો સમય બાકી છે.
<img src="https://ibp-benefits.s3.us-east-005.backblazeb2.com/prod/news/uploads/images/1781610972825_WhatsApp%2520Image%25202026-06-16%2520at%25204.40.40%2520PM.jpeg.jpeg" alt="WhatsApp Image 2026-06-16 at 4.40.40 PM.jpeg" width="500" height="708">
2010 પહેલાના 1 લાખ શિક્ષકોની નોકરી પર સંકટ સુપ્રીમ કોર્ટના આ આદેશના કારણે સમગ્ર રાજ્યના પ્રાથમિક અને માધ્યમિક શિક્ષકોમાં ભારે ફફડાટ અને આક્રોશ વ્યાપી ગયો છે. અખિલ ભારતીય પ્રાથમિક શિક્ષક સંઘના પ્રમુખ ખોડુભાઈ પઢિયારના જણાવ્યા અનુસાર, આ નિર્ણયથી વર્ષ 2010 પહેલાં નિયુક્ત થયેલા અંદાજે 1 લાખ જેટલા અનુભવી શિક્ષકોની નોકરી પર સીધું સંકટ તોળાઈ રહ્યું છે. આ એવા શિક્ષકો છે જેમણે 20 થી 25 વર્ષ સુધી શિક્ષણ ક્ષેત્રે સેવા આપી છે અને જે તે સમયે સરકારના પ્રવર્તમાન સત્તાવાર ભરતી નિયમો અને લાયકાતના ધોરણો મુજબ જ તેઓ કાયદેસર રીતે નોકરીમાં લાગ્યા હતા. હવે આટલા વર્ષોની સેવા બાદ અચાનક નવી પરીક્ષા થોપી દેવા સામે શિક્ષક આલમમાં ભારે રોષ છે.
&lsquo;જે તે સમયે નિયમ જ નહોતો, તો 25 વર્ષે પરીક્ષા કેમ આપીએ?&rsquo; આંદોલનની ભૂમિકા સ્પષ્ટ કરતાં ખોડુભાઈ પઢિયારે જણાવ્યું હતું કે, "અમારા જૂના શિક્ષકોની ભરતી વર્ષ 1997-98 થી લઈને 2010 સુધીના ગાળામાં રાજ્ય સરકારના ચોક્કસ નિયમો હેઠળ થઈ હતી. તે સમયે સમગ્ર દેશ કે રાજ્યમાં TET જેવી કોઈ પરીક્ષાનું અસ્તિત્વ જ નહોતું. આ પરીક્ષા વર્ષ 2010 પછી અમલમાં આવી છે. હવે 25 કે 27 વર્ષની પ્રશંસનીય નોકરી કરી ચૂકેલા વરિષ્ઠ શિક્ષકો પાસે આ ઉંમરે આવી પરીક્ષા પાસ કરવાની અપેક્ષા રાખવી તે સંપૂર્ણપણે અન્યાયી છે. તેથી જ અમારી મુખ્ય માંગ છે કે 2010 પહેલાના તમામ નિયુક્ત શિક્ષકોને આ નિયમમાંથી સંપૂર્ણ મુક્તિ આપવામાં આવે."
તમામ 33 જિલ્લાઓમાં કલેક્ટર કચેરીએ સજ્જડ ધરણા આ વિરોધ પ્રદર્શનને સફળ બનાવવા માટે શિક્ષક સંઘે માઇક્રો-પ્લાનિંગ તૈયાર કર્યું છે. 17 જૂનથી શરૂ કરીને 20 જૂન સુધી સતત ત્રણ દિવસ સુધી રાજ્યના તમામ 33 જિલ્લા મથકો પર કલેક્ટર કચેરીની બહાર વિશાળ ધરણા કાર્યક્રમો યોજાશે. ઉદાહરણ તરીકે, અમદાવાદમાં કલેક્ટર કચેરી ખાતે બપોરે 3:00 વાગ્યાથી સાંજના 5:00 વાગ્યા સુધી શિક્ષકો પ્રતીક ધરણા પર બેસશે અને ત્યારબાદ જિલ્લા કલેક્ટરના માધ્યમથી મુખ્યમંત્રી અને વડાપ્રધાનને સંબોધતું આવેદનપત્ર પાઠવશે.
જૂની પેન્શન યોજના અને ગ્રેડ પે સહિતની અન્ય પડતર માંગણીઓનો ઉમેરો શિક્ષકો માત્ર TET પરીક્ષા જ નહીં, પરંતુ પોતાની લાંબા સમયથી પડતર અન્ય મુખ્ય માંગણીઓને પણ આ આંદોલન ભેગી જોડી રહ્યા છે. સંઘની અન્ય પ્રમુખ માંગણીઓ નીચે મુજબ છે: જૂની પેન્શન યોજના (OPS): 1 એપ્રિલ, 2005 પછી ભરતી થયેલા તમામ શિક્ષકોને નવી વર્ધિત પેન્શન યોજનાના બદલે જૂની પેન્શન યોજનાનો લાભ આપવામાં આવે. ઉચ્ચ ગ્રેડ પે: ધોરણ 6 થી 8 માં ભણાવતા ભાષા, વિજ્ઞાન અને સામાજિક વિજ્ઞાનના શિક્ષકોને યોગ્ય અને જુદો ગ્રેડ પે ફાળવવામાં આવે. વધારાનો ચાર્જ હટાવવો: વર્તમાન સમયમાં રાજ્ય સરકાર દ્વારા હાઈસ્કૂલના આચાર્યો (STAT) ને જે અન્ય શાળાઓનો વધારાનો વહીવટી ચાર્જ સોંપવામાં આવ્યો છે, તે તાત્કાલિક અસરથી પાછો ખેંચીને કાયમી ભરતી કરવામાં આવે.
શૈક્ષણિક કાર્ય પર અસર જોવા મળી શકે આગામી ત્રણ દિવસ સુધી રાજ્યભરના લાખો શિક્ષકો રસ્તા પર ઉતરીને વિરોધ પ્રદર્શન કરવાના હોવાથી શૈક્ષણિક કાર્ય પર તેની થોડીઘણી અસર જોવા મળી શકે છે. હવે જોવાનું એ રહેશે કે શિક્ષકોના આ આક્રમક વલણ સામે રાજ્ય અને કેન્દ્ર સરકાર કોઈ વચગાળાનો રસ્તો કાઢે છે કે કેમ.

TET પરીક્ષાના વિરોધમાં 17 થી 20 જૂન રાજ્યવ્યાપી આંદોલનની જાહેરાત

June 16, 2026 | 17:20 IST