"NMCનો વહીવટ ખાડે ગયો", મેડિકલ કોલેજોની માન્યતા અટકી, વિદ્યાર્થીઓનું ભવિષ્ય અંધકારમાં!

ગુજરાતમાં મેડિકલ ક્ષેત્રે પ્રવેશ પ્રક્રિયાને લઈને ભારે અરાજકતાનો માહોલ છે. કોંગ્રેસ પ્રવક્તા ડો. મનીષ દોશી એ નેશનલ મેડિકલ કમિશન (NMC) ના વહીવટ પર આકરા પ્રહાર કરતા આક્ષેપ કર્યો છે કે, NMC નો વહીવટ સંપૂર્ણપણે ખાડે ગયો છે, જેના કારણે MBBS, ડેન્ટલ, આયુર્વેદ અને હોમિયોપેથી સહિતની તમામ મેડિકલ કોલેજોમાં પ્રવેશ પ્રક્રિયા અટકી પડી છે. આ સ્થિતિના કારણે હજારો વિદ્યાર્થીઓનું ભવિષ્ય અધ્ધરતાલ થઈ ગયું છે.

148 કોલેજોની 16,538 બેઠકોની પ્રવેશ પ્રક્રિયા અટકી...

ડો. મનીષ દોશીએ જણાવ્યું કે, રાજ્યની કુલ 148 કોલેજોની 16,538 બેઠકોની પ્રવેશ પ્રક્રિયા અટકી પડી છે. આ પાછળનું મુખ્ય કારણ NMC દ્વારા મેડિકલ કોલેજ ઇન્સ્પેક્શન ન કરવું છે, જે સ્ટાફના અભાવે અટકી ગયું હોવાનો આક્ષેપ કરાયો છે.

• રાજ્યની 41 મેડિકલ કોલેજોને હજુ સુધી માન્યતા મળી નથી.

• ડેન્ટલની 13 કોલેજો અને આયુર્વેદની 44 કોલેજોને પણ માન્યતા મળી નથી.

• હોમિયોપેથીની 48 કોલેજોની માન્યતાની કાર્યવાહી પણ ખોરંભે પડી છે.

આ તમામ કોલેજોની પ્રવેશ પ્રક્રિયા NEET (નેશનલ એલિજિબિલિટી કમ એન્ટ્રન્સ ટેસ્ટ)ના આધારે કરવામાં આવે છે, જેના માટે ગુજરાતના 81 હજાર વિદ્યાર્થીઓએ પરીક્ષા આપી હતી. NMC ના ખાડે ગયેલા વહીવટને કારણે જ આ સ્થિતિનું નિર્માણ થયું હોવાનો દોશીએ આક્ષેપ કર્યો હતો. NMC એ હજુ સુધી માન્યતા આપવા માટે જરૂરી ઇન્સ્પેક્શન પણ કર્યું ન હોવાથી વિદ્યાર્થીઓ અને વાલીઓમાં ભારે ચિંતા વ્યાપી છે.

આ પણ વાંચો : Ahmedabad માં 148 મી રથયાત્રા, AI ટેક્નોલોજીથી સુરક્ષા સુદ્રઢ, 20 હજાર પોલીસકર્મીઓ તૈનાત!

વિદ્યાર્થીઓ અને વાલીઓ પરેશાન...

આ સ્થિતિને કારણે મેડિકલ ક્ષેત્રમાં કારકિર્દી બનાવવા માંગતા વિદ્યાર્થીઓ અને તેમના વાલીઓ ભારે પરેશાન છે. પ્રવેશ પ્રક્રિયા અટકવાથી તેમનો સમય બરબાદ થઈ રહ્યો છે અને ભવિષ્ય અંગે અનિશ્ચિતતાનો માહોલ છે. રાજ્ય સરકારે અને NMC એ આ મામલે તાત્કાલિક ધ્યાન આપી, વહીવટ સુધારી અને ઝડપથી માન્યતા પ્રક્રિયા પૂર્ણ કરી વિદ્યાર્થીઓને ન્યાય આપવો જોઈએ તેવી માંગ ઉઠી રહી છે.

આ પણ વાંચો : Kutch : SMC ની મોટી કાર્યવાહી, ₹1.28 કરોડનો વિદેશી દારૂ ઝડપાયો, 16 ની ધરપકડ