ગુજરાતમાં મેઘરાજાએ લીધો વિરામ

Gujarat Weather Update: રાજ્યમાં છેલ્લા કેટલાક દિવસોથી ચાલી રહેલા સાર્વત્રિક અને ભારે વરસાદી માહોલ બાદ હવે મેઘરાજાનું જોર ધીમે ધીમે ઘટી રહ્યું છે. સ્ટેટ ઈમરજન્સી ઓપરેશન સેન્ટર (SEOC), ગાંધીનગર દ્વારા જાહેર કરવામાં આવેલા તાજા આંકડા મુજબ, છેલ્લા 24 કલાક દરમિયાન રાજ્યના 109 તાલુકામાં વરસાદ નોંધાયો હતો. જોકે, રાહતની વાત એ છે કે મોટાભાગના વિસ્તારોમાં માત્ર હળવા ઝાપટાં કે ધીમી ધાર જ જોવા મળી હતી. રાજ્યના 100 તાલુકા એવા રહ્યા હતા જ્યાં 1 ઇંચથી પણ ઓછો વરસાદ નોંધાયો છે. આ સાથે જ રાજ્યમાં સીઝનનો કુલ સરેરાશ વરસાદ 97.7% સુધી પહોંચી ગયો છે, જે સામાન્ય કરતાં 20% વધુ છે.

દક્ષિણ ગુજરાતમાં મેઘમહેર યથાવત
ભલે રાજ્યભરમાં વરસાદનું જોર ઘટ્યું હોય, પરંતુ દક્ષિણ ગુજરાતના વિસ્તારોમાં હજુ પણ મેઘમહેર જોવા મળી રહી છે. છેલ્લા 24 કલાકમાં વલસાડ જિલ્લો રાજ્યમાં સૌથી વધુ વરસાદ ધરાવતો જિલ્લો બન્યો છે. વલસાડના કપરાડા તાલુકામાં સૌથી વધુ 2.52 ઇંચ વરસાદ ખાબક્યો હતો. આ સિવાય નાનાપોંઢામાં 2.13 ઇંચ અને ધરપુરમાં 1.65 ઇંચ વરસાદ નોંધાયો હતો. અન્ય વિસ્તારોની વાત કરીએ તો, ડાંગ અને ખંભાતમાં 1.42 ઇંચ, ભરૂચમાં 1.26 ઇંચ, પાદરા અને વાપીમાં 1.06 ઇંચ અને ખેરગામમાં 1.02 ઇંચ વરસાદ નોંધાયો હતો. રાજ્યના બાકીના 100 તાલુકાઓમાં માત્ર હળવા વરસાદી ઝાપટાં જ પડ્યા હતા, જેનાથી વિરામ વચ્ચે વાતાવરણમાં આહલાદક ઠંડક પ્રસરી ગઈ છે.

9 ઓગસ્ટ સુધી કેવો રહેશે માહોલ?
હવામાન વિભાગના જણાવ્યા અનુસાર, 9 ઓગસ્ટ સુધી ગુજરાત તેમજ સૌરાષ્ટ્ર અને કચ્છના વિવિધ ભાગોમાં છૂટાછવાયા સ્થળોએ હળવાથી મધ્યમ વરસાદની શક્યતા રહેલી છે. અમદાવાદ સહિતના આસપાસના વિસ્તારોમાં વાદળછાયું વાતાવરણ રહેશે અને કેટલાક સ્થળે મધ્યમ ઝાપટાં પડી શકે છે. રાજ્યમાં સિનોપ્ટિક સિસ્ટમ્સ અંગે માહિતી આપતાં હવામાન વિભાગે  જણાવ્યું હતું કે, પૂર્વ-દક્ષિણપશ્ચિમ રાજસ્થાન પર 1.5 કિલોમીટરથી 3.1 કિલોમીટરની ઊંચાઈએ સાયક્લોનિક સરક્યુલેશન સક્રિય છે. આ સિવાય મોન્સૂન ટ્રફ હાલમાં લખનઉ, પટના થઈને પૂર્વ દિશામાં મણિપુર તરફથી પસાર થઈ રહ્યું છે. જમ્મુ ડિવિઝનમાં પણ 5.8 કિલોમીટરથી 7.6 કિલોમીટર વચ્ચે એક ઉચ્ચ સ્તરીય સાયક્લોનિક સરક્યુલેશન બનેલું છે.

દરિયાકાંઠે 25 નોટની ઝડપે પવન ફૂંકાશે
ઉત્તર અને દક્ષિણ ગુજરાતના દરિયાકાંઠાના વિસ્તારોમાં પવનની દિશા દક્ષિણ-પશ્ચિમથી પશ્ચિમ તરફ રહેવાની શક્યતા વ્યક્ત કરવામાં આવી છે. સ્ટીપ પ્રેશર ગ્રેડિયન્ટની અસરને કારણે દરિયાકાંઠે 15 થી 20 નોટની ઝડપે મજબૂત પવનો ફૂંકાશે, જે વધીને 25 નોટ સુધી પહોંચી શકે છે. પવનની ગતિને કારણે દરિયો મધ્યમથી રફ રહેવાની સંભાવના છે. જોકે, હવામાનમાં સુધારો થતાં તંત્ર દ્વારા પૂર્વમાં જારી કરવામાં આવેલી 'Port Warning LC3' ને હવે હટાવી લેવામાં આવી છે. આ ઉપરાંત માછીમારો માટે આગામી 5 દિવસ સુધી દરિયો ન ખેડવાની કોઈ વિશેષ ચેતવણી આપવામાં આવી નથી, છતાં દરિયાની સ્થિતિ જોતાં સાવચેતી રાખવા જણાવાયું છે.

ચોમાસાની સીઝનનો 20% વધુ વરસાદ
ચાલુ ચોમાસાની સીઝનમાં ગુજરાતમાં અત્યાર સુધીમાં આંકડાકીય દ્રષ્ટિએ ખૂબ જ સારો વરસાદ થયો છે. સામાન્ય ગણતરી મુજબ આ સમયગાળા સુધીમાં રાજ્યમાં 397.7 મિમી વરસાદ વરસવો જોઈતો હતો, જેની સામે અત્યાર સુધીમાં 477.7 મિમી વરસાદ નોંધાઈ ચૂક્યો છે. આ આંકડો સરેરાશ કરતાં +20% વધુ દર્શાવે છે. અત્યાર સુધીમાં મોસમનો એકંદર કુલ વરસાદ 97.7% નોંધાઈ ચૂક્યો હોવાથી રાજ્યના જળાશયોમાં પાણીની આવક મજબૂત થઈ છે.