ગુજરાતમાં મુખ્યમંત્રી ભૂપેન્દ્ર પટેલના નેતૃત્વ હેઠળ સરકારના લાંબા સમયથી રાહ જોવાતા મંત્રીમંડળનું વિસ્તરણ આ અઠવાડિયે થવાની શક્યતા છે, જેના પગલે રાજ્યમાં રાજકીય ગતિવિધિઓ ચરમસીમાએ પહોંચી છે. ભારતીય જનતા પાર્ટી એ તેના તમામ ધારાસભ્યોને 16 અને 17 ઓક્ટોબરના રોજ ગાંધીનગરમાં જ રહેવાનો આદેશ આપ્યો છે, જે સ્પષ્ટ સંકેત આપે છે કે, નવા મંત્રીઓની શપથવિધિ ટૂંક સમયમાં યોજાઈ શકે છે.
રાજ્યપાલે પણ કુરુક્ષેત્રની મુલાકાત ટૂંકાવી
પાર્ટીના આંતરિક સૂત્રો મુજબ, આ વિસ્તરણ શુક્રવારે બપોરે 12:39 વાગ્યે વિજય મુહૂર્ત દરમિયાન થવાની સંભાવના છે અને આ પ્રસંગે કેન્દ્રીય BJPના અનેક નેતાઓ ગુરુવાર રાત સુધીમાં દિલ્હીથી ગાંધીનગર પહોંચે તેવી શક્યતા છે. આ અંગેનો અંતિમ નિર્ણય લેવા માટે મુખ્યમંત્રી ભૂપેન્દ્ર પટેલ ગુરુવારે સવારે મુંબઈની મુલાકાત લઈને બપોરે 3 વાગ્યા સુધીમાં પરત ફરશે અને ત્યાર બાદ રાજ્યપાલ આચાર્ય દેવવ્રત સાથે મુલાકાત કરીને શપથ વિધિનો કાર્યક્રમ નિશ્ચિત કરશે. અહેવાલો મુજબ, રાજ્યપાલ પણ કુરુક્ષેત્રની તેમની મુલાકાત ટૂંકાવીને ગુરુવાર સવાર સુધીમાં ગુજરાત પરત આવી જશે.
આ પણ વાંચો: <a href="https://www.benefitnews24.com/gujarati/politics/cabinet-expansion-whose-diwali-will-improve-or-deteriorate-/20810" target="_blank" rel="noopener">મંત્રીમંડળ વિસ્તરણઃ કોની દિવાળી સુધરશે કે બગડશે?</a>
દિલ્હીમાં યાદી ફાઇનલ
મંત્રીમંડળનું વિસ્તરણ થવાની શક્યતાને પગલે શપથવિધિ માટેની તૈયારીઓ પૂરજોશમાં ચાલી રહી છે. રાજભવનના બેન્ક્વેટ હોલ અને સચિવાલય ખાતે આવેલા સ્વર્ણિમ સંકુલ-2માં સફાઈ અને જરૂરી ગોઠવણ કરવામાં આવી રહી છે, જ્યાં નવા મંત્રીઓને સ્થાન આપવા માટે અગાઉ બંધ કરાયેલી 3 ઓફિસોને પણ ફરીથી ખોલવામાં આવી છે. શપથવિધિ સમારોહ ગાંધીનગરમાં રાજભવન અથવા મહાત્મા મંદિર ખાતે યોજાય તેવી સંભાવના છે. નવા મંત્રીઓની યાદી વડાપ્રધાન નરેન્દ્ર મોદી, ગૃહમંત્રી અમિત શાહ, મુખ્યમંત્રી ભૂપેન્દ્ર પટેલ, પ્રદેશ BJP અધ્યક્ષ જગદીશ વિશ્વકર્મા અને સંગઠન સચિવ રત્નાકર વચ્ચે દિલ્હીમાં યોજાયેલી લગભગ પાંચ કલાકની બેઠક દરમિયાન અંતિમ સ્વરૂપ આપવામાં આવ્યું હતું.
16 નવા ચહેરાને તક
સૂત્રોનું માનીએ તો, આ મંત્રીમંડળના વિસ્તરણમાં લગભગ 16 નવા ચહેરાને તક મળી શકે છે, જ્યારે હાલના 11 મંત્રીઓને પડતા મૂકવામાં આવી શકે છે. આ ફેરબદલ યુવા અને અગ્રણી નેતાઓને સામેલ કરીને આગામી સ્થાનિક સ્વરાજ્યની ચૂંટણીઓ પહેલાં પક્ષને મજબૂત બનાવશે અને 2027ની વિધાનસભા ચૂંટણી માટે પણ પાયો નાખશે.

મંત્રીમંડળનું વિસ્તરણ

ભાજપે તમામ ધારાસભ્યોને 16 અને 17 ઓક્ટોબરના રોજ ગાંધીનગરમાં હાજર રહેવા જણાવ્યું

October 16, 2025 | 01:25 IST