લોકરક્ષક પરીક્ષાઓમાં દેખાયો ઉત્સાહ: કહ્યું- પેપર સરળ હતું

ગુજરાત રાજ્ય પોલીસ ભરતી બોર્ડ દ્વારા લોકરક્ષક દળ કેડરની કોન્સ્ટેબલની 12,000 જગ્યાઓ માટે આજે, 15 જૂન 2025ના રોજ રાજ્યના સાત જિલ્લાઓ – અમદાવાદ, વડોદરા, સુરત, રાજકોટ, ગાંધીનગર, આણંદ અને ભાવનગરમાં લેખિત પરીક્ષા યોજાઈ હતી. આ પરીક્ષા માટે રાજ્યભરમાંથી કુલ 2.48 લાખ ઉમેદવારોએ ફોર્મ ભર્યા હતા. જોકે, કેટલા ઉમેદવારોએ વાસ્તવમાં પરીક્ષા આપી તેનો સત્તાવાર આંકડો હવે બોર્ડ દ્વારા જાહેર કરવામાં આવશે.   825 પરીક્ષા કેન્દ્રો પર ચુસ્ત વ્યવસ્થા
  આ પરીક્ષા રાજ્યના અમદાવાદ, સુરત, વડોદરા, રાજકોટ, ભાવનગર, આણંદ અને ગાંધીનગરમાં કુલ 825 શાળાઓ અને કેન્દ્રો પર યોજવામાં આવી હતી. વહેલી સવારથી જ ઉમેદવારો પરીક્ષા કેન્દ્રો પર પહોંચી ગયા હતા. પરીક્ષા કેન્દ્રો પર બાયોમેટ્રિક વેરિફિકેશન અને સ્કેનિંગ પ્રક્રિયા દ્વારા ઉમેદવારોને પ્રવેશ આપવામાં આવ્યો હતો. પોલીસ દ્વારા ચુસ્ત બંદોબસ્ત ગોઠવવામાં આવ્યો હતો, જેના કારણે પરીક્ષા શાંતિપૂર્ણ અને સુવ્યવસ્થિત રીતે પૂર્ણ થઈ.   ઉમેદવારોનો પ્રતિભાવ: પેપર સરળ રહ્યું
  પરીક્ષા આપીને બહાર આવેલા ઉમેદવારોએ જણાવ્યું હતું કે, જેમણે નિયમિત તૈયારીઓ કરી હતી, તેમના માટે પેપર ઘણું સરળ હતું. ઉમેદવારોના મતે, પ્રશ્નપત્ર સંતુલિત હતું અને મોટાભાગના પ્રશ્નો તેમની તૈયારીના અભ્યાસક્રમને આવરી લેતા હતા.
હવે પરીક્ષાના પરિણામો અને ઉમેદવારોની હાજરીના આંકડા ગુજરાત રાજ્ય પોલીસ ભરતી બોર્ડ દ્વારા જાહેર કરવામાં આવશે. લેખિત પરીક્ષામાં ઉત્તીર્ણ થનારા ઉમેદવારોને શારીરિક કસોટી અને અન્ય તબક્કઓ માટે બોલાવવામાં આવશે.   આ પરીક્ષા ગુજરાત પોલીસ ભરતી પ્રક્રિયામાં એક મહત્વનું પગલું છે, જે રાજ્યના યુવાનોને પોલીસ દળમાં સેવા આપવાની તક પૂરી કરે છે. ઉમેદવારો આગળના પરિણામોની રાહ જોઈ રહ્યા છે, અને રાજ્યભરમાં આ ભરતી પ્રક્રિયા ચર્ચાનો વિષય બની છે.