રાજકોટના નવા કલેક્ટર તરીકે ડૉ. ઓમ પ્રકાશે સંભાળ્યો ચાર્જ

રાજકોટ જિલ્લાના નવા કલેક્ટર તરીકે ડૉ. ઓમ પ્રકાશે મવારે તારીખે 23 જૂનના રોજ ચાર્જ સંભાળ્યો હતો. ચાર્જના પ્રથમ દિવસે જ તેમણે મહત્વના નિર્ણયો અને દિશાનિર્દેશો આપ્યા હતા. ખાસ કરીને રેસકોર્સ મેદાનમાં યોજાનારા લોકમેળા અંગે રાજ્ય સરકારની SOP (સ્ટાન્ડર્ડ ઑપરેટિંગ પ્રોસિજર) મુજબ કોઈપણ બાંધછોડ વિના આયોજન કરવા બાબતે બેઠક બોલાવવાનું નક્કી કર્યું છે. તેમણે કહ્યું કે, જરૂર પડે તો રાઈડ ધારકો સાથે પણ બેઠક યોજાશે.

તેઓએ વધુમાં જણાવ્યું કે, રાજકોટ-જેતપુર હાઈવે પર બ્રિજનું કામ ચાલતું હોવાને કારણે ટ્રાફિક સમસ્યા સર્જાઈ છે, જેને લઈને તેઓએ પોતે પણ આ તકલીફનો અનુભવ કર્યો છે. આ સમસ્યા હલ કરવા માટે નેશનલ હાઈ-વે ઓથોરિટી અને લોકલ પોલીસ સાથે સંકલન કરીને ઝડપી કામ કરાવાશે અને લોકોને ઓછામાં ઓછી તકલીફ થાય તે માટે પ્રયત્ન કરાશે.

તેમણે કહ્યું કે, રાજકોટ જિલ્લો ઔદ્યોગિક હબ છે અને અહીંના ઉદ્યોગોને આગળ ધપાવવા અને ઊભરતા સેક્ટરોના વિકાસ માટે પણ વિશેષ ધ્યાન અપાશે. તેઓએ જણાવી લીધું કે, તેઓ અગાઉ દોઢ વર્ષ સુધી રાજકોટ ગ્રામ્યમાં પ્રાંત અધિકારી તરીકે કામગીરી કરી ચૂક્યા છે અને શહેરના તમામ ડેપ્યુટી કલેક્ટર તરીકે પણ ફરજ બજાવી છે. તેથી તેમને સ્થાનિક વાતાવરણ અને પ્રશાસન અંગે સારી સમજ છે, જેનો ઉપયોગ હવે કલેક્ટર તરીકે થશે.

લોકમેળા અંગે SOP અને હાઈકોર્ટના આદેશો અનુસાર યોજના બનાવાશે. તેમણે સ્પષ્ટ જણાવ્યું કે, લોકમેળા સામાન્ય જનતાના મનોરંજનનું મહત્વપૂર્ણ સાધન છે અને તમામ લોકોની અપેક્ષાઓનો વિચાર કરીને અને SOPનું પાલન કરીને આયોજન કરવામાં આવશે. આ સાથે લોકમેળા માટે ફોર્મ ભરવાની મુદ્દત પણ વિસ્તારી શકાશે.

હેલ્થ અને એજ્યુકેશન તેમના ફેવરિટ ક્ષેત્ર છે એવું જણાવી તેઓએ જણાવ્યું કે, ગામડાના ગરીબ લોકો સુધી સરકારી સેવાઓ પહોંચે તે માટે પ્રયત્ન કરવામાં આવશે. દબાણ દૂર કરવાની કામગીરી પણ ઝડપી કરાશે.