અમદાવાદ વિમાન દુર્ઘટનાના મૃતકોની ઓળખ માટે સગા-સંબંધીના DNA લેવાશે

અમદાવાદમાં એર ઇન્ડિયાના વિમાન દુર્ઘટનામાં ક્રુ મેમ્બર્સ સહિત 204થી વધુ લોકોના મોત નિપજ્યા છે. બોઈંગ વિમાનમાં 242 લોકો સવાર હતા. આ દુર્ઘટનામાં મૃત્યુ પામેલા લોકોની ઓળખ માટે તેમના સગાના DNA સેમ્પલ લેવા અમદાવાદ સિવિલ હોસ્પિટલમાં વ્યવસ્થા કરાઈ હોવાનું આરોગ્ય અગ્ર સચિવ ધનંજય દ્વિવેદીએ જણાવ્યા જણાવ્યુ છે.

અમદાવાદ સિવિલ હોસ્પિટલમાં બી.જે. મેડિકલ કોલેજના ગ્રાઉન્ડ ફ્લોર પર કસોટી ભવનમાં મૃતકોના નજીકના સગા સંબંધીઓ માટે DNA સેમ્પલ આપવાની વ્યવસ્થા કરવામાં આવી છે. આ પ્રક્રિયામાં ખાસ કરીને માતા પિતા કે સંતાનોના ડીએનએ સેમ્પલ લેવામાં આવતા હોય છે. અમદાવાદ સિવિલ હોસ્પિટલ ટ્રોમા(ઇમરજન્સી)સેન્ટરમાં દર્દીની સારવાર સંબંધિત માહિતી મેળવવા માટે 6357373831 અને 6357373841 હેલ્પલાઈન નંબર જાહેર કરાયા છે.  

વિમાન દુર્ઘટનાની જાણ થતાં મુખ્યમંત્રી ભૂપેન્દ્ર પટેલ સુરતથી અમદાવાદની સિવિલ હોસ્પિટલ પહોંચ્યા હતા અને ઇજાગ્રસ્તોની મુલાકાત લઇ તેમના ખબર-અંતર પૂછ્યા હતા. મુખ્યમંત્રી ભૂપેન્દ્ર પટેલે ઘટનાને અત્યંત દુર્ભાગ્યપૂર્ણ અને દુઃખદ ગણાવીને ઊંડો શોક વ્યક્ત કર્યો હતો. અકસ્માત બાદ તાત્કાલિક ધોરણે બચાવ અને રાહત કાર્યને વેગ આપવા સૂચના આપી હતી. ઈજાગ્રસ્ત મુસાફરોને ઝડપથી સારવાર માટે હોસ્પિટલ પહોંચાડવા માટે ગ્રીન કોરિડોરની વ્યવસ્થા કરવા અને હોસ્પિટલોમાં યુદ્ધના ધોરણે તબીબી વ્યવસ્થા સુનિશ્ચિત કરવાના પણ નિર્દેશ આપ્યા હતા.

ગુજરાત સરકારે અમદાવાદ પ્લેન ક્રેશ દુર્ઘટના સંદર્ભમાં સ્ટેટ ઈમરજન્સી ઓપરેશન સેન્ટરમાં કંટ્રોલ રૂમ કાર્યરત કર્યો છે. આ કંટ્રોલ રૂમના ફોન નં. 079-232-51900 અને મોબાઈલ નં. 9978405304 ઉપર સંપર્ક કરવા કહેવામાં આવ્યુ છે. ઉલ્લેખનીય છે કે, 50 જેટલાં ઇજાગ્રસ્તોની સિવિલ હોસ્પિટલ ખાતે સારવાર ચાલી રહી છે. તમામ દર્દી હાલમાં સ્થિર હોવાનું કહેવામાં આવી રહ્યું છે.