ભ્રષ્ટાચારનો પર્દાફાશ: વહીવટદાર ₹1લાખની લાંચ લેતા ACBના રંગેહાથ ઝડપાયો!

ખેડબ્રહ્મા,ગુજરાતમાં ભ્રષ્ટાચારને ડામવા માટે એસીબી સક્રિય બની છે.ત્યારે સાબરકાંઠા જિલ્લાના ખેડબ્રહ્મા પોલીસ સ્ટેશનમાં જ ભ્રષ્ટાચારનો પર્દાફાશ થયો છે.પોલીસ સ્ટેશનના વહીવટદાર વિકાસ પટેલને ₹1 લાખની લાંચ લેતા અમદાવાદ એસીબીની ટીમે રંગેહાથ ઝડપી પાડ્યો છે.આ ઘટનાથી સમગ્ર પોલીસ બેડામાં અને વિસ્તારમાં ભારે ચકચાર મચી ગઈ છે.

દારૂના કેસમાં મોપેડ છોડાવવા અને ધંધાના હપ્તાની માંગણી : 
પ્રાપ્ત માહિતી અનુસાર,ફરિયાદીનું દારૂના કેસમાં ઝડપાયેલું મોપેડ છોડાવવા માટે વહીવટદાર વિકાસ પટેલે લાંચની માંગણી કરી હતી.આ ઉપરાંત,તેણે દારૂના ધંધાના બે-ત્રણ માસની બાકી રકમ પેટે ₹1.65 લાખની પણ માંગણી કરી હતી,જે દર્શાવે છે કે પોલીસકર્મી ગેરકાયદેસર પ્રવૃત્તિઓમાં સીધો સંડોવાયેલો હતો.

PIની ભૂમિકા શંકાના દાયરામાં: લાંચ માટે વહીવટદારને મળવાની સૂચના?
આ કેસમાં સૌથી ચોંકાવનારી બાબત એ છે કે,ફરિયાદીએ અગાઉ આ બાબતે પોલીસ ઇન્સ્પેક્ટર (PI) સમક્ષ રજૂઆત કરી હતી.તેમ છતાં,PI દ્વારા ફરિયાદીને વહીવટદાર વિકાસ પટેલને મળવાની સૂચના આપવામાં આવી હતી.આનાથી PIની ભૂમિકા પણ શંકાના દાયરામાં આવી ગઈ છે.શું PI પણ આ લાંચ પ્રકરણમાં સામેલ હતા?કે પછી તેમને આ બાબતની જાણ હતી અને તેમણે આંખ આડા કાન કર્યા હતા?એસીબીની તપાસમાં આ રહસ્ય પરથી પડદો ઊંચકાશે.

ACBની સઘન કાર્યવાહી:પોલીસ મથકની બહારથી દબોચ્યો : 
અમદાવાદ એસીબીની ટીમે મળેલી માહિતીના આધારે છટકું ગોઠવ્યું હતું.ફરિયાદી દ્વારા લાંચ રૂપે ₹1લાખની રકમ આપતા જ એસીબીની ટીમે વહીવટદાર વિકાસ પટેલને પોલીસ મથકની બહારથી જ રંગેહાથ દબોચી લીધો હતો.એસીબી દ્વારા તેની વિરુદ્ધ ગુનો નોંધી વધુ તપાસ હાથ ધરવામાં આવી છે.