વિધાનસભામાં વિરોધ પ્રદર્શન કરવા બદલ કોંગ્રેસના ધારાસભ્યો એક દિવસ માટે સસ્પેન્ડ

ગુજરાત વિધાનસભાના ચોમાસુ સત્રના બીજા દિવસે કોંગ્રેસના ધારાસભ્યોએ ટૂંકી મુદતના પ્રશ્નો દાખલ નહી કરવા મુદ્દે દેખાવ કર્યા હતા. વિધાનસભામાં દેખાવ કરવા મુદ્દે અધ્યક્ષે ટકોર કરતાં વિરોધપક્ષના નેતા અમિત ચાવડા સહિતના કોંગ્રેસના ધારાસભ્યોએ વોકઆઉટ કર્યો હતો. ત્યારબાદ સંસદીય મંત્રી ઋષિકેશ પટેલે કોંગ્રેસના ધારાસભ્યોને સસ્પેન્ડ કરવાની દરખાસ્ત કરતાં અધ્યક્ષે નિયમોના નિયમ 52 મુજબ કોંગ્રેસના ધારાસભ્યોને સસ્પેન્ડ કર્યા હતા.

ચોમાસુ સત્રના બીજા દિવસે બેઠક શરૂ થતાની સાથે વિધાનસભા વિરોધપક્ષના નેતા અમિત ચાવડાએ ટૂંકી મુદતના પ્રશ્નો દાખલ નહી કરવા મુદ્દે પોતાનો વિરોધ કર્યો હતો. અમિત ચાવડાની સાથે કોંગ્રેસના ધારાસભ્યોએ પણ વિવિધ કાગળો સાથે વિરોધ કરતાં વિધાનસભા અધ્યક્ષ શંકર ચૌધરીએ અટકાવ્યા હતા.

કોંગ્રેસના ધારાસભ્યો પાસેથી વિરોધ કરતાં કાગળો લઈ લેવા સાર્જન્ટોને આદેશ કર્યો હતો. તે સમયે અમિત ચાવડા સહિત કોંગ્રેસના ધારાસભ્યોએ હોબાળો કર્યો હતો. જ્યારે ટૂંકી મુદતના પ્રશ્નો મંજૂરી કે નામંજૂરીની નોટિસ આપ્યા વગર દાખલ નહી કરતા હોવાનો આક્ષેપ કર્યો હતો.

તેના પગલે અધ્યક્ષે ધારાસભ્યોની સંખ્યા મુજબ પ્રશ્નો લેવાતા હોવાની તેમજ જે તે વિભાગના મંત્રીની પરવાનગી વગર ટૂંકી મુદતના પ્રશ્નો લેવામાં આવતા નહી હોવાની સ્પષ્ટતા કરી હતી. ત્યારબાદ કોંગ્રેસના ધારાસભ્ય શૈલેષ પરમારે મંત્રીઓ જવાબ આપતા કેમ ડરે છે તેવો કટાક્ષ કરી બે દિવસમાં ઘણા પ્રશ્નો દાખલ નહી કર્યા હોવાનું જણાવ્યુ હતુ.

તે સમયે દેખાવ કરી રહેલા કોંગ્રેસના ધારાસભ્યો પાસેથી કાગળો લઈ લેવા સાર્જન્ટોને આદેશ કરતાં કોંગ્રેસના ધારાસભ્યોએ વિધાનસભામાંથી વોક આઉટ કર્યો હતો. જ્યારે વિરોધપક્ષમાં બેસેલા આમ આદમી પાર્ટીના 4 ધારાસભ્યો પાટલી ઉપર બેસી રહ્યા હતા.

કોંગ્રેસના ધારાસભ્યો વોકઆઉટ કરી ગયા બાદ સંસદીય મંત્રી ઋષિકેશ પટેલે કોંગ્રેસના ધારાસભ્યો વિરૂદ્ધ વિધાનસભાના નિયમના ભંગ બદલ કાર્યવાહી કરવા દરખાસ્ત કરી હતી. ઋષિકેશ પટેલની દરખાસ્તને ગૃહ રાજ્યમંત્રી હર્ષ સંઘવીએ ટેકો આપ્યો હતો.

સંસદીય મંત્રીની દરખાસ્તના પગલે વિધાનસભાના અધ્યક્ષે વિધાનસભાના નિયમોના નિયમ 52 મુજબ કોંગ્રેસના તમામ ધારાસભ્યોને એક દિવસની કાર્યવાહીથી સસ્પેન્ડ કર્યા હતા. ત્યારબાદ ગૃહ રાજ્યમંત્રી હર્ષ સંઘવીએ વ્યાજખોરો સામે કરાયેલી કાર્યવાહી અંગે વિધાનસભામાં જવાબ રજૂ કર્યો હતો. જેમાં તેમણે છેલ્લા બે માસમાં 565 વ્યાજખોરો સામે કાર્યવાહી કરવામાં આવી હોવાનો દાવો કર્યો હતો.