અમદાવાદના રખિયાલમાં અસામાજીક તત્વોની દાદાગીરી

અમદાવાદના રખિયાલ વિસ્તારમાં અસામાજીક તત્વોએ પોલીસની શેહશરમ રાખ્યા વગર જ બિન્ધાસ્ત બનીને હાથમાં તલવાર લઇને આતંક મચાવતા ખળભળાટ મચી ગયો છે. અસામાજીક તત્વોના આંતકના આ વીડિયો પણ વાયરલ થયા છે. 

અમદાવાદમાં કાયદો અને વ્યવસ્થાના જાણે કે લીરેલીરા ઉડી રહ્યા છે. રખિયાલ વિસ્તારમાં રાત્રીના સમયે અસામાજીક તત્વોએ કોઇનો પણ ડર રાખ્યા વગર હાથમાં ખુલ્લી તલવાર લઇને રીતસરનો આતંક મચાવ્યો હતો અને સમગ્ર વિસ્તારને બાનમાં લીધો હતો. અસામાજીક તત્વોના આતંકથી સ્થાનિકોમાં ગભરાટ સાથે ડરનો માહોલ છવાઇ ગયો હતો. 

સમગ્ર ઘટનાના વીડિયો સોશિયલ મીડિયામાં વાયરલ પણ થયા છે તેમાં અસામાજીક તત્વો પોલીસની હાજરીમાં પણ ખુલ્લેઆમ તલવાર લઇને ફરતા જોવા મળે છે. સમગ્ર મામલે પોલીસે હવે 2 વ્યક્તિને ઝડપી લીધા છે પણ એક વાત ચોક્કસ છે કે પોલીસનો સહેજ પણ ડર આ દાદાગીરી કરતા તત્વોમાં જોવા મળ્યો ન હતો.