ગુજરાતના જાણીતા પોપ્યુલર બિલ્ડર ગૃપના માલિક રમણ પટેલની મુશ્કેલીમાં વધારો થયો છે. સાણંદ તાલુકાના ચેખલા ગામની કરોડોની જમીન કૌભાંડ કેસમાં સાણંદ કોર્ટએ તેમને દોષિત જાહેર કર્યા છે. હવે કોર્ટ રમણ પટેલને સજા સંભળાવશે.
આ કેસમાં રમણ પટેલ સામે આરોપ છે કે તેમણે ખોટા દસ્તાવેજો બનાવી ચેખલા ગામની પ્રતિબંધિત જમીન પોતાના કબજામાં લીધી હતી. વર્ષ 1995&ndash;96 દરમિયાન જીવાભાઈ પટેલની માલિકીની જમીન ખોટા મામલતદારના ઓર્ડર દ્વારા બિનખેતી બતાવીને 52 અલગ અલગ કંપનીઓના નામે પચાવી પાડવામાં આવી હતી, જેમાં તમામ કંપનીઓના ભાગીદાર તરીકે રમણ પટેલનું નામ સામે આવ્યું હતું.
જીવાભાઈ પટેલના અવસાન બાદ તેમના પુત્ર કનુભાઈ પટેલે આ ઠગાઈનો પર્દાફાશ કર્યો અને સાણંદ પોલીસ સ્ટેશનમાં ફરિયાદ નોંધાવી. તપાસ દરમ્યાન જાણવા મળ્યું કે જમીનના રોકડ ચુકવણીના ખોટા રેકોર્ડ તૈયાર કરાયા હતા, પરંતુ વાસ્તવમાં કોઈ ચૂકવણી થઈ નહોતી. 52માંથી 41 કંપનીઓના સરનામા રમણ પટેલ અને તેમના સાથીદારોના ઘરના જ સરનામે નોંધાયેલા હતા, જેનાથી ગેરરીતિની પુષ્ટિ થઈ.
પોલીસે નાણાકીય વ્યવહારોની તપાસ કરી અને રમણ પટેલ સહિતના 17 લોકોના નિવેદન લીધા હતા. સુપ્રીમ કોર્ટએ આ કેસ ચાર મહિનામાં પૂરો કરવાનો આદેશ આપ્યો હતો, ત્યારબાદ સાણંદ કોર્ટએ ચુકાદો આપીને રમણ પટેલને દોષિત ઠરાવ્યા છે.
હાલ આ કેસમાં ચાર આરોપી હજુ પણ ફરાર છે &mdash; છગનભાઈ ભોળીદાસ પટેલ, દશરથભાઈ ભોળીદાસ પટેલ, સતિષ જયંતીભાઈ પટેલ અને કાંતિભાઈ મફતભાઈ પટેલને વોન્ટેડ જાહેર કરવામાં આવ્યા છે.
રમણ પટેલ, જે ભૂમાફિયા તરીકે કુખ્યાત છે, તેમની સામે અગાઉ પણ અનેક જમીન કૌભાંડ અને ઠગાઈના કેસ નોંધાયા છે. સાણંદ કોર્ટનો આ ચુકાદો ગુજરાતના રિયલ એસ્ટેટ ક્ષેત્ર માટે મહત્વપૂર્ણ ગણાય છે અને કાયદા સામે મોટા બિલ્ડરો પણ બચી શકતા નથી તેવો સંદેશ આપે છે.

સાણંદ કોર્ટ અને આરોપી રમણ પટેલ

ચેખલા ગામના જમીન કૌભાંડ કેસમાં સાણંદ કોર્ટનો મોટો ચુકાદો, હવે સજા સંભળાવશે

October 30, 2025 | 21:32 IST