ભાવનગર: સ્પીડબ્રેકરના કારણે અકસ્માતનો ભય

ભાવનગર : શહેરના બિસ્માર રસ્તા ઉપરાંત સર્કલ પાસે નજીકના ચાર રસ્તે સ્પીડબ્રેકરના અભાવે આ વિસ્તારો અકસ્માતના ઝોન બની ગયા છે. હાલ ચારે તરફ રોડ નવિનીકરણના કામો ચાલી રહ્યા છે.ત્યારે ભરતનગર લાલાબાપા ચોક અને લીલાસર્કલના ચાર રસ્તા પર સ્પીડ બ્રેકર મુકવા ત્યાંનાં રહીશોએ માંગણી કરી છે.
શહેરનો હદ વિસ્તાર વિસ્તરતો જાય છે અને શહેરના છેવાડામાં પણ રહેણાકો બનવા લાગ્યા છે.ત્યારે શહેરમાં ટ્રાફિકની સમસ્યા પણ વકરી છે.એક તરફ શહેરમાં વિકાસ કામોના નામે આડેધડ ખોદકામ કરી નાંખવામાં આવ્યું છે જેના કારણે શહેરનો મુખ્ય કહી શકાય તેવો એકપણ રસ્તો સારો રહ્યો નથી.બિસ્માર રસ્તાના કારણે વાહનચાલકોમાં નાના-મોટા અકસ્માતના ભોગ બની રહ્યા છે તેવામાં શહેરના સીદસર રોડ પર આવેલ લીલા સર્કલને જોડતાં ચાર રસ્તા પર સતત વધી રહેલાં ટ્રાફિકના કારણે આ સર્કલ નાના-મોટા અકસ્માતાને લઈ દિવસેને દિવસે જોખમી સાબિત થઈ રહ્યું છે. તળાજા જકાતનાકાથી સ્પોર્ટસ કોમ્પ્લેક્ષ અને ટોપ થ્રી સર્કલથી વિરાણી સર્કલ જતા વચ્ચે આવતા આ લીલા સર્કલના ચોકને જોડતાં રસ્તા પર એકપણ સ્પીડ બ્રેકર ન હોવાના કારણે પુરપાટ ઝડપે આવતા ટૂ વ્હીલ કે ફોર વ્હીલ વાહન કાબુ ગુમાવતા હોવાથી નાના-મોટા અકસ્માતો કાયમી સમસ્યા બની ગયા છે.તે જ સ્થિતિ ભરતનગર જતા લાલાબાપા ચોકની પણ છે.જ્યા અકસ્માતો નિયમિત બન્યા છે.ત્યારે રોડ વિભાગ દ્વારા આ વિસ્તારોમાંસ્પીડ બ્રેકર મુકવામાં આવે તો વાહનોની ગતિ ધીમી કરી શકાય અને અકસ્માતો પણ અટકાવી શકાય તેવી સ્થાનિક રહિશોએ માંગ કરી છે.