અમદાવાદ મહાનગરપાલિકાના TP વિભાગનો ATDO 20 લાખની લાંચ લેતા ઝડપાયો

અમદાવાદ મહાનગરપાલિકાના ટીપી વિભાગના આસિસ્ટન્ટ ટીડીઓ હર્ષદ ભોજકને તેના મળતિયા સાથે રૂપિયા 20 લાખની લાંચ લેતો એસીબીએ રંગેહાથ ઝડપી પાડ્યો છે.

AMCએ તોડી પાડેલા મકાનો અને દુકાનોના ભાડુઆતને વૈકલ્પિક વ્યવસ્થા માટેની કામગીરી પૂર્ણ કરવાની અવેજીમાં ATDOએ રૂપિયા 50 લાખની લાંચ માગી હતી.

ફરિયાદીએ કરેલી રકઝકના અંતે રૂપિયા 20 લાખ નક્કી થયા બાદ એસીબીએ ગોઠવેલા છટકામાં આસિસ્ટન્ડ ટીડીઓ હર્ષદ ભોજક અને તેના મળતિયા આશિષ પટેલને રૂપિયા 20 લાખની લાંચ લેતા ઝડપી લીધા હતા. એસીબીએ બંને સામે ગુનો નોંધી વધુ તપાસ હાથ ધરી છે.   

એસીબીના સૂત્રો પાસેથી મળેલી માહિતી મુજબ અમદાવાદ શહેરમાં વડીલોપાર્જિત જમીનમાં મકાનો અને દુકાનોને અમદાવાદ મ્યુનિસિપલ કોર્પોરેશને તોડી પાડી હતી.

તેથી મકાનો અને દુકાનોના ભાડુઆતોએ કાયદાકીય પ્રક્રિયા કરી હતી. વૈકલ્પિક વ્યવસ્થા માટે જરૂરી પુરાવા રજૂ કરાશે તો અમદાવાદ મ્યુનિસિપલ કોર્પોરેશન વ્યવસ્થા કરી આપશે તેવું નિર્ણય કરાયો હતો. તેથી ફરીયાદીએ ગવર્નમેન્ટ એપ્રુવલ એન્જિનિયર આશીષ પટેલનો સંપર્ક કર્યો હતો.

એન્જિનિયર આશિષ પટેલે અમદાવાદ મ્યુનિસિપલ કોર્પોરેશનના આસિસ્ટન્ટ ટાઉન ડેવલપમેન્ટ ઓફિસર (TDO) હર્ષદ ભોજક સાથે મુલાકાત કરાવી હતી. હર્ષદ ભોજકે કામગીરી કરવા રૂપિયા 50 લાખ લાંચની માગણી કરીને આરોપી આશિષને 10 લાખ આપવા કહ્યુ હતુ.

ફરીયાદીએ રકઝક કરતા 20 લાખ આપવાના નક્કી થયા હતા.  ફરિયાદી લાંચની રકમ આપવા માંગતા ન હોવાથી ACBનો સંપર્ક કર્યો હતો. તેથી એસીબીની ટીમે આશ્રમ રોડ પર ચિનુભાઈ ટાવરમાં અક્ષર સ્પેસ ઇન્ટરેસ્ટ પ્રાઇવેટ લિમિટેડની ઓફિસમાં લાંચનું છટકું ગોઠવ્યું હતું.

એસીબીના છટકામાં આસિસ્ટન્ટ ટીડીઓ હર્ષદ ભોજક અને એન્જિનિયર આશિષ પટેલ રૂપિયા 20 લાખની લાંચ સ્વીકારતા રંગેહાથ ઝડપાઈ ગયા હતા.

હર્ષદ ભોજકના ઘરમાંથી 73 લાખની રોકડ રકમ મળી :
અમદાવાદ મ્યુનિસિપલ કોર્પોરેશનના વર્ગ-2ના અધિકારી અને ટાઉન પ્લાનિંગ વિભાગના આસિસ્ટન્ટ ટીડીઓ હર્ષદ મનહરલાલ ભોજકના પ્રગતિનગર ખાતેના રહેણાંકના ફ્લેટમાં એસીબીની ટીમે તપાસ કરતાં 73 લાખની રોકડ અને સોનાનું બિસ્કીટ મળી આવ્યુ હતુ. તેથી એસીબીએ રૂપિયા 73 લાખની રોકડ અને અંદાજે સાડા ચાર લાખની કિંમતનું સોનાનું બિસ્કીટ મળીને કુલ 77 લાખનો મુદ્દામાલ કબજે લઈ વધુ તપાસ હાથ ધરી છે. હાલમાં એસીબીએ એટીડીઓના દસ્તાવેજો અને અન્ય મિલકતો બાબતે તપાસ શરૂ કરી છે.