કલાકાર દેવાયત ખવડની મુશ્કેલીમાં વધારો, જામીન રદ!

કલાકાર દેવાયત ખવડની મુશ્કેલીમાં વધારો થયો છે. વેરાવળની સેશન્સ કોર્ટે તાલાલા હુમલા કેસમાં પોલીસની રિવિઝન અરજી માન્ય રાખીને દેવાયત ખવડ અને અન્ય આરોપીઓના જામીન રદ કર્યા છે. જ્યારે દેવાયત ખવડને તાલાલા પોલીસ સમક્ષ હાજર થવા હુકમ કર્યો છે. 

તાજેતરમાં તાલાલા ગીરમાં દેવાયત ખવડ અને તેના સાથીઓએ એક યુવક પર હુમલો કર્યો હતો. આ કેસમાં નીચલી કોર્ટે ખવડ સહિત 15 આરોપીના જામીન મંજૂર કર્યા હતા. તાલાલા પોલીસે જામીન સામે વાંધો ઉઠાવતી રિવિઝન અરજી દાખલ કરી હતી. રિવિઝન અરજીનો નિકાસ કરી વેરાવળ સેશન્સ કોર્ટે  સરકાર પક્ષની દલીલો સાંભળ્યા બાદ કોર્ટે જામીન રદ કરવાનો હુકમ આપ્યો છે. તેથી દેવાયત ખવડે તાલાલા પોલીસ સમક્ષ હાજર થવું પડશે.

દેવાયત ખવડ અને અન્ય સાત આરોપી વિરુદ્ધ હુમલા કેસમાં તાલાલા પોલીસે 18 ઓગષ્ટ 2025ના રોજ દેવાયત ખવડના 7 દિવસના રિમાન્ડની માંગણી કરી હતી. પરંતુ કોર્ટે રિમાન્ડ નામંજૂર કર્યા હતા.  જ્યારે તમામ આરોપીઓના જામીન મંજૂર કર્યા હતા. પોલીસે દેવાયત ખવડ સહિતના આરોપીઓને આપેલા જામીનને પડકાર્યા હતા.

દેવાયત ખવડ સહિતના આરોપીઓ સામે હત્યાનો પ્રયાસ, લૂંટ અને મારામારી સહિતની કલમો હેઠળ ગુનો નોંધવામાં આવ્યો હતો. દેવાયત ખવડ સામે અગાઉ રાજકોટમાં હત્યાની કોશિશ, સનાથલમાં છેતરપિંડી અને આર્મ્સ એક્ટ સહિત 5 ગુના નોંધાયેલા છે. જ્યારે તેની સાથે રહેલા અન્ય સાથીઓ પર જુગાર અને મારામારીના કેસો નોંધાયેલા છે.

સમગ્ર મામલો શું છે?

12 ઓગસ્ટ 2025ના રોજ તાલાલાના ચિત્રોડ પાસે અમદાવાદના સનાથલના ધ્રુવરાજસિંહ ચૌહાણ પર દેવાયત ખવડ અને અન્ય 15 લોકોએ જીવલેણ હુમલો કર્યો હતો. દેવાયત ખવડ અને તેના માણસોએ ફોર્ચ્યુનર અને ક્રેટા કારથી ધ્રુવરાજસિંહની કિયા કારને અનેક વખત ટક્કર મારી હતી. અપશબ્દો બોલી લોખંડના ધોકાથી ગાડીના કાચ તોડી નાખ્યા હતા. દેવાયત ખવડે રિવોલ્વર બતાવીને કેસ ન કરવાની ધમકી આપી 15 તોલા સોનાના દોરાની લૂંટ ચલાવી હતી. ઈજાગ્રસ્ત ધ્રુવરાજસિંહને પહેલા તાલાલા, બાદમાં જૂનાગઢ સિવિલ હોસ્પિટલમાં ખસેડવામાં આવ્યા હતા. મોડીરાત્રે પોલીસે દેવાયત ખવડ સામે ફરિયાદ નોંધી હતી.

અમદાવાદના સનાથલમાં 20 ફેબ્રુઆરી, 2025ના રોજ ડાયરાના કાર્યક્રમમાં દેવાયત ખવડ હાજર ન રહેતાં તેની કાર પર હુમલો થયો હતો. આ મામલે પોલીસે ભગવતસિંહ ચૌહાણ, ધ્રુવરાજસિંહ ચૌહાણ, રામભાઈ ચૌહાણ, મેઘરાજ સિંહ અને અન્ય ચાર લોકો વિરુદ્ધ ગુનો નોંધ્યો હતો. હુમલો કરનાર આરોપી પૈકીના ભગવતસિંહે દેવાયત ખવડ વિરુદ્ધ 8 લાખ રૂપિયાની છેતરપિંડીની ફરિયાદ નોંધાવી હતી. તે દિવસથી બંને જૂથ વચ્ચે વેરનાં બીજ રોપાયાં હતાં.

દેવાયત ખવડના અનેક વિવાદ

રાજકોટના બિલ્ડર મયુરસિંહ રાણા પર દેવાયત ખવડ અને એક અજાણ્યા શખ્સે ધોકા-પાઇપ વડે હુમલો કર્યો હતો. ત્યારબાદ દેવાયત ભૂગર્ભમાં ઊતરી ગયો હતો. 10 દિવસ બાદ દેવાયત ખવડ પોલીસ સમક્ષ હાજર થયો હતો. દેવાયત અને મયુરસિંહનો વચ્ચેનો જૂનો ઝઘડો છે. નવેમ્બર-2021માં મયુરસિંહ રાણા તેમનાં કૌટુંબિક મામાના ઘરે બેસવા ગયા ત્યારે દેવાયત ખવડ સાથે કાર પાર્કિંગ બાબતે ઝઘડો થયો હતો. જે-તે સમયે પોલીસે મામલો થાળે પાડી દીધો હતો. ત્યારબાદ સમાજના આગેવાનોએ બંને વચ્ચે સમાધાન કરાવ્યું હતું. ટિકટોક સ્ટાર કીર્તિ પટેલ અને દેવાયત ખવડ વચ્ચે પણ સોશિયલ મીડિયા પર જંગ જામ્યો હતો. આ વિવાદ સોશિયલ મીડિયા પર ટ્રેન્ડમાં રહ્યો હતો. બાદમાં બંનેએ સમાધાન કરી લીધું હતું.

રૂપાલમાં એક ડાયરામાં કલાકાર બ્રિજરાજદાન ગઢવીએ નામ લીધા વગર દેવાયત ખવડ ઉપર આકરા પ્રહારો કર્યા હતા. તેમણે કહ્યું કે, 'જે દિવસે બ્રિજરાજદાનને માફીનો વીડિયો બનાવવો પડે એ દિવસથી બ્રિજરાજદાન ક્યારેય સ્ટેજ પર નહીં ચઢે, હું ઈસરદાનનું લોહી છું. કેટલાક લોકો સ્ટેજ પર મર્દાનગીની વાતો કરે છે અને પછી નીચે ઊતરીને માફી માગી લે છે.'  તેવો વીડિયો વાયરલ થયા બાદ દેવાયત ખવડે વળતો જવાબ આપતાં કહ્યું હતું કે 'મર્દાનગી અને લોહીના પુરાવા ન આપવાના હોય. કોનું લોહી છે એના પુરાવા માયકાંગલાઓએ આપવા પડે. લોકો મોઢામાં આંગળાં નાખીને બોલાવે છે એટલે જીભ લપસી જાય છે.'  જો કે, બાદમાં મઢડા સોનલધામ ખાતે બંને વચ્ચે સમાધાન થયું હતું.

સરદાર પટેલનું અપમાન કર્યુ હતું

દેવાયત ખવડે સરદાર વલ્લભભાઈ પટેલના પિતાનું નામ લઈને અપમાન કર્યું હતું. વીડિયો વાયરલ થયા બાદ લોકોએ રોષ વ્યક્ત કર્યો હતો. આ મામલે પાટીદાર સહિત અનેક સમાજના લોકોએ દેવાયત ખવડના નિવેદનનો વિરોધ કર્યો હતો.

પૂર્વ મુખ્યમંત્રીની મજાક ઉડાવી હતી

પૂર્વ મુખ્યમંત્રી વિજય રૂપાણીનો એક વીડિયો વાયરલ થયો હતો, જેમાં 'ફ્રાય ફ્રેંચી' શબ્દ ટોક ઓફ ધ ટાઉન બન્યો હતો. એ સમયે દેવાયત ખવડે સોશિયલ મીડિયામાં વીડિયો બનાવ્યો હતો. જેમાં તેણે વિજય રૂપાણી પર કટાક્ષ કરતા કહેતા કહ્યું હતું કે, 'અમને તો એમ હતું કે જમી લીધું હશે. તમે બાકી હોય તો હાલોને ફ્રાય ફ્રેંચી ખવડાવું.'