સુરતમાં ચાઇનીઝ દોરી ભરેલો આખો ટ્રક ઝડપાયો

રાજ્યમાં પ્રતિબંધ હોવા છતાં દર વર્ષે ઉત્તરાયણ પર્વમાં કેટલાક તત્વો બિન્દાસ્ત બની ચાઇનીઝ દોરીનું વેચાણ કરી રહ્યા છે. ચાઇનીઝ દોરીના વેચાણ સામે પોલીસે અત્યારથી કાર્યવાહી શરુ કરી છે. સુરત પોલીસે પ્રતિબંધીત ચાઇનીઝ દોરીથી ભરેલો આખો ટ્વક ઝડપી પાડ્યો છે. 

સુરતમાંથી પ્રતિબંધીત ચાઇનીઝ દોરીનો મોટો જથ્થો ઝડપી લેવાયો છે. સુરત પોલીસની ઝોન 2 એલસીબી શાખાએ ડીંડોલી વિસ્તારમાં સાંઇ પોઇન્ટ ચાર રસ્તા પાસે બાતમીના આધારે એક કન્ટેનર અટકાવ્યું હતું. પોલીસે કન્ટેનરમાં તપાસ કરતાં 60 બોક્સમાં 2880 ચાઇનીઝ દોરીના બોબીન મળ્યા હતા જેની કિંમત 11.52 લાખ રુપિયા અંદાજવામાં આવી છે. 

પોલીસે ચાઇનીઝ દોરી સાથે કન્ટેનર લઇને આવી રહેલા ચાલક અનિલ શંકરલાલ મીણાને ઝડપી લઇ તપાસ કરતાં તે સુરતથી આ ચાઇનીઝ દોરીનો જથ્થો લઇને અમદાવાદ જઇ રહ્યો હોવાનું જાણવા મળ્યું હતું જેથી પોલીસે ચાઇનીઝ દોરીનો જથ્થો જપ્ત કરીને ચાલકની અટકાયત કરી હતી અને અમદાવાદમાં આ જથ્થો કોને આપવાનો હતો અને કોણ સપ્લાય કરતું હતું તે સહિતના મુદ્દા પર તપાસ શરુ કરી છે