Ahmedabad : AMC ની બેઠકબાજી, ચોમાસું માથે અને તંત્ર હજુ ઊંઘમાં!

Ahmedabad : ચોમાસાના આગમનને ગણતરીના દિવસો જ બાકી છે, ત્યારે અમદાવાદ મ્યુનિસિપલ કોર્પોરેશન (AMC) દ્વારા પ્રી-મોન્સુન એક્શન પ્લાન અંગે બેઠકનું આયોજન કરવામાં આવ્યું છે. કોર્પોરેશનના અધિકારીઓ અને પદાધિકારીઓની આ બેઠક પર શહેરીજનોમાં આક્રોશ વ્યાપી ગયો છે. થોડા દિવસો પહેલા જ પડેલા સામાન્ય વરસાદમાં શહેરના રસ્તાઓ જળબંબાકાર થઈ ગયા હતા, ત્યારે AMC ની આ "બેઠકબાજી" સામે સવાલ ઉઠી રહ્યા છે કે, શું કોર્પોરેશન માત્ર કાગળ પર જ કામગીરી કરશે?

મોડું જાગ્યું કોર્પોરેશન, વહેલો વરસાદ!

શહેરની જનતાને પ્રશ્ન થઈ રહ્યો છે કે, જ્યારે ચોમાસાને માંડ થોડા દિવસ જ બાકી છે, ત્યારે AMC મીટીંગ-મીટીંગ રમવામાં વ્યસ્ત છે. વરસાદી નાળાઓ, કન્સો અને ગટરલાઇનની સફાઈ જેવી અતિમહત્વની કામગીરી ક્યારે પૂર્ણ થશે? ખરેખર તો આ કામગીરી ચોમાસાના એક મહિના પહેલા જ પતાવી દેવાની જરૂર હતી. પરંતુ, AMC ની આ નિષ્ક્રિયતા દર્શાવે છે કે, કોર્પોરેશન મોડું જાગ્યું છે અને વહેલો વરસાદ છે.

ગયા વર્ષની જેમ આ વખતે પણ શહેર જળબંબાકાર થશે?

છેલ્લા કેટલાક વર્ષોથી અમદાવાદ (Ahmedabad) માં ચોમાસા દરમિયાન જળબંબાકારની સ્થિતિ સામાન્ય બની ગઈ છે. સહેજ પણ વરસાદ પડે તો શહેરના મુખ્ય માર્ગો, અંડરપાસ અને નીચાણવાળા વિસ્તારો પાણીમાં ગરકાવ થઈ જાય છે. લોકોના ઘરો અને દુકાનોમાં પાણી ઘૂસી જાય છે, કરોડો રૂપિયાનું નુકસાન થાય છે અને જનજીવન અસ્તવ્યસ્ત થઈ જાય છે. AMC ની આ ઢીલી નીતિ જોતા લાગે છે કે, આ વખતે પણ શહેરને જળબંબાકાર થતું કોઈ રોકી શકશે નહીં.

ફક્ત બેઠકો નહીં, નક્કર કામગીરીની જરૂર!

AMC ના અધિકારીઓ અને પદાધિકારીઓએ હવે માત્ર બેઠકો કરીને સમય બગાડવાને બદલે તાત્કાલિક ધોરણે યુદ્ધના ધોરણે કામગીરી શરૂ કરવી જોઈએ. વરસાદી પાણીના નિકાલની વ્યવસ્થા સુધારવા, ગટરલાઇનોની સફાઈ કરવા અને નીચાણવાળા વિસ્તારોમાં પાણી ભરાવાની સમસ્યાનો કાયમી ઉકેલ લાવવા માટે નક્કર પગલાં ભરવા અનિવાર્ય છે. જો આમ નહીં થાય, તો આગામી ચોમાસું અમદાવાદ (Ahmedabad) શહેર માટે વધુ એક આફત બનીને આવશે. શું તમને લાગે છે કે AMC સમયસર પ્રી-મોન્સુન કામગીરી પૂર્ણ કરી શકશે?