રથયાત્રાને લઈને પોલીસે જાહેર કર્યો ‘નો પાર્કિંગ ઝોન’, આવતીકાલે રાત્રે 12 વાગ્યાથી આ રસ્તાઓ રહેશે બંધ

ભગવાન જગન્નાથની 148મી રથયાત્રાને લઈને અમદાવાદ શહેરમાં પૂર્ણ તૈયારીઓ કરી દેવામાં આવી છે. આવતી કાલે શુક્રવાર, 27 જૂનના રોજ ભગવાન જગન્નાથ નગરયાત્રાએ નીકળશે. ભક્તો માટે સુગમ દર્શન વ્યવસ્થા અને સુરક્ષા સુનિશ્ચિત કરવા માટે પોલીસ તંત્ર પણ સક્રિય થયું છે. ત્યારે ટ્રાફિકના સરવાળાને ધ્યાનમાં રાખીને અમદાવાદ પોલીસ કમિશ્નર જી. એસ. મલિક દ્વારા 26 જૂન રાત્રે 12 વાગ્યાથી અમુક વિસ્તારોને ‘નો પાર્કિંગ ઝોન’ જાહેર કરી જાહેરનામું બહાર પાડવામાં આવ્યું છે.

જાહેરનામા મુજબ, જમાલપુર દરવાજા બહાર જગન્નાથ મંદિરથી લઈ જમાલપુર ચકલા, વૈશ્યસભા, ખમાસા, ગોળલીમડા, ઓસ્ટોડિયા ચકલા (BRTS રૂટ સહિત), મદનગોપાલની હવેલી, રાયપુર ચકલા, ખાડિયા જુનીગેટ, ખાડિયા ચાર રસ્તા, પાંચકુવા, કાલુપુર સર્કલ, કાલુપુર ઓવરબ્રિજ, સરસપુર, પ્રેમ દરવાજા, જોર્ડન રોડ, બેચર લશ્કરની હવેલી, દિલ્હી ચકલા, હલીમની ખડકી, શાહપુર દરવાજા, શાહપુર ચકલા, રંગીલા યોકી, ઔત્તમ પોળ, આર.સી. હાઈસ્કૂલ, ઘી કાંટા રોડ, પાનકોર નાંકા, ચાંદલા ઓળ, ફુવારો, સાંકડી શેરીનો નાકો, માણેકચોક શાક માર્કેટ, દાણાપીઠ અને ખમાસાથી જગન્નાથ મંદિર સુધીના વિસ્તારોનો સમાવેશ થાય છે.

આ વિસ્તારોમાં વાહન પાર્કિંગ બંધ રહેશે. જાહેરનામું ગુજરાત પોલીસ અધિનિયમ, 1951ની કલમ-33 હેઠળ બહાર પાડવામાં આવ્યું છે અને તે રથયાત્રા પૂરી ન થાય ત્યાં સુધી અમલમાં રહેશે. જે કોઈ પણ વ્યકિત આ જાહેરનામાનું ઉલ્લંઘન કરશે, તેની સામે કાયદાકીય કાર્યવાહી કરવામાં આવશે. આ નિર્ણય ભક્તો માટે સલામતી અને વ્યવસ્થિત યાત્રા સુનિશ્ચિત કરવા માટે લેવામાં આવ્યો છે.