Ahmedabad વિમાન દુર્ઘટના: ટેક-ઓફ બાદ ક્રેશ, 242 મુસાફરો સવાર, સંપૂર્ણ ઘટનાક્રમ

અમદાવાદથી લંડન જઈ રહેલું એર ઈન્ડિયાનું ફ્લાઈટ AI-171 ગુરુવારે બપોરે ટેક-ઓફ થયાની થોડી જ ક્ષણોમાં ક્રેશ થયું. આ દુર્ઘટનામાં વિમાનમાં 242 લોકો સવાર હતા, જેમાં 2 પાયલોટ અને 10 કેબિન ક્રૂનો સમાવેશ થાય છે. અકસ્માતના દ્રશ્યો દર્શાવતા હૃદયદ્રાવક વીડિયો સોશિયલ મીડિયા પર વાયરલ થયા છે. અહીં અમે આ ઘટનાનો સંપૂર્ણ ઘટનાક્રમ રજૂ કરીએ છીએ. ઘટનાક્રમ

• ઉડાન અને ક્રેશ: એર ટ્રાફિક કંટ્રોલ (ATC) અનુસાર, ફ્લાઈટ AI-171 એ બપોરે 1:39 વાગ્યે અમદાવાદના સરદાર વલ્લભભાઈ પટેલ આંતરરાષ્ટ્રીય વિમાનમથક (SVPIA) ના રનવે 23 પરથી ઉડાન ભરી. થોડી જ વારમાં વિમાન એરપોર્ટની સીમા બહાર મેઘાણીનગર આઈજીપી કેમ્પસ નજીક જમીન પર પડ્યું. ક્રેશ બાદ સ્થળ પરથી ગાઢ કાળો ધુમાડો ઉઠતો જોવા મળ્યો.
• વિમાનની વિગતો: વિમાનનું સંચાલન કેપ્ટન સુમિત સભરવાલ (LTC, 8,200 કલાકનો ઉડાન અનુભવ) અને ફર્સ્ટ ઓફિસર ક્લાઇવ કુંદર (1,100 કલાકનો અનુભવ) કરી રહ્યા હતા. વિમાનમાં 169 ભારતીય, 53 બ્રિટિશ, 1 કેનેડિયન અને 7 પોર્ટુગીઝ નાગરિકો સવાર હતા. ગુજરાતના ભૂતપૂર્વ મુખ્યમંત્રી વિજય રૂપાણી પણ આ ફ્લાઈટમાં હોવાની અટકળો છે, જોકે આની સત્તાવાર પુષ્ટિ થઈ નથી.

તાત્કાલિક પગલાં

• બચાવ કામગીરી: દુર્ઘટના બાદ ઘટનાસ્થળની આસપાસના રસ્તાઓ બંધ કરી દેવાયા. ફાયર બ્રિગેડ, પોલીસ અને બચાવ ટીમો તાત્કાલિક રાહત કામગીરી માટે પહોંચી. હોસ્પિટલોમાં 1,200 બેડની વ્યવસ્થા કરવામાં આવી.
• સરકારી પ્રતિસાદ: કેન્દ્રીય નાગરિક ઉડ્ડયન મંત્રી રામ મોહન નાયડુ વિજયવાડાથી તાત્કાલિક અમદાવાદ રવાના થયા. કેન્દ્રીય ગૃહમંત્રી અમિત શાહે ગુજરાતના મુખ્યમંત્રી ભૂપેન્દ્ર પટેલ અને અમદાવાદ પોલીસ કમિશનર સાથે વાતચીત કરી, શક્ય તમામ સહાયની ખાતરી આપી. વડાપ્રધાન નરેન્દ્ર મોદીએ પણ શાહ અને નાયડુ સાથે ચર્ચા કરી અને અસરગ્રસ્તોને તમામ મદદ પૂરી પાડવા સૂચના આપી.
• એરપોર્ટ બંધ: SVPIA પ્રવક્તાએ જણાવ્યું કે, દુર્ઘટનાને પગલે એરપોર્ટ પર તમામ ફ્લાઈટ કામગીરી અસ્થાયી રૂપે સ્થગિત કરાઈ છે.

એર ઈન્ડિયાનું નિવેદન એર ઈન્ડિયાએ જણાવ્યું, "અમદાવાદથી લંડન ગેટવિક જતી ફ્લાઈટ AI-171 નો 12 જૂને અકસ્માત થયો છે. અમે ઘટનાની વિગતોની તપાસ કરી રહ્યા છીએ. વધુ માહિતી અમારા સોશિયલ મીડિયા હેન્ડલ 'X' અને વેબસાઈટ પર શેર કરવામાં આવશે."   સૂત્રોના જણાવ્યા અનુસાર, પાયલોટે ટેક-ઓફ બાદ તરત જ 'મે ડે' કોલ જારી કર્યો હતો, જે દર્શાવે છે કે વિમાનમાં કોઈ ગંભીર તકનીકી ખામી સર્જાઈ હશે. દુર્ઘટનાના ચોક્કસ કારણો જાણવા માટે તપાસ શરૂ કરાઈ છે.   આ ઘટનાએ અમદાવાદ અને દેશભરમાં શોકનું મોજું ફેલાવ્યું છે. બચાવ કામગીરી હજુ ચાલુ છે, અને ઘાયલોને તાત્કાલિક સારવાર આપવામાં આવી રહી છે.