અમદાવાદમાં વરસાદી પાણી ભરાવાના સ્થળોમાં વધારો, 147 સ્પોટ પર પાણી ભરાવાની શક્યતા

વર્ષ 2024માં અમદાવાદ શહેરમાં વરસાદી પાણી ભરાવાના 124 સ્પોટ નોંધાયા હતા, પરંતુ આ વર્ષે મ્યુનિસિપલ કોર્પોરેશન દ્વારા સમયસર કામગીરી પૂરી ન કરવામાં આવતા આ સંખ્યા વધીને 147 થઈ ગઈ છે. આવી સ્થિતિમાં, ભારે વરસાદ પડતા આ તમામ સ્થળોએ ફરીથી પાણી ભરાવાની શક્યતા છે અને નાગરિકોને મોટા પાયે હાલાકી ભોગવવી પડી શકે છે.

શહેરમાં પાણી ભરાવાની સ્થિતિ સૌથી વધુ હોવાની શક્યતા ધરાવતા વિસ્તારોમાં વ્યાસવાડી રોડ (નરોડા), ગોદાણી સર્કલ (સરસપુર), જનરલ હોસ્પિટલ રોડ (સરસપુર), મંછાની મસ્જિદ (સરસપુર), 137 બસ સ્ટેન્ડ (બાપુનગર), શ્રીનંદનગર (સોનલ રોડ), મકરબા પોલીસ હેડ ક્વાર્ટર્સ, એઈસી નારણપુરા, નવરંગ સર્કલ (નારણપુરા), માણેકબાગ, મોટેરા, હીરાબાગ (પાલડી), ઉત્તમ નગર, ચમકયુના રોડ, ત્રિકમલાલ ચાર રસ્તા, હાટકેશ્વર ચાર રસ્તા, મધુમાલતી (નિકોલ), ઓઢવ ફાયર સ્ટેશન, છોટાલાલની ચાલી, ગોતા તળાવ, હેલમેટ સર્કલ, સરકારી વસાહત અને બોડકદેવ સહિતના વિસ્તારોનો સમાવેશ થાય છે.

જેમ જેમ ચોમાસું નજીક આવી રહ્યું છે, તેમ નાગરિકોની ચિંતાઓ પણ વધી રહી છે, ખાસ કરીને ત્યારે જ્યારે તંત્ર પોતાની કામગીરીમાં વિલંબ કરી રહ્યું છે. આ સ્થિતિને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) દ્વારા નાગરિકો માટે વિવિધ ઝોન પ્રમાણે ફરિયાદ માટેના ફોન નંબર જાહેર કરવામાં આવ્યા છે. શહેરના મધ્ય ઝોન માટે 9099064167, પૂર્વ ઝોન માટે 9099063856, પશ્ચિમ ઝોન માટે 6359980916, ઉત્તર પશ્ચિમ ઝોન માટે 9726416112, દક્ષિણ પશ્ચિમ ઝોન માટે 6359980913, ઉત્તર ઝોન માટે 9326415552 અને દક્ષિણ ઝોન માટે 9099063239 નંબર આપવામાં આવ્યા છે. આ ઉપરાંત, કન્ટ્રોલ રૂમનો સંપર્ક નંબર 9978355303 છે, જે પર નાગરિકો માટે 24 કલાક ઉપલ્બધ રહેશે.

આ નંબર પર નાગરિકો વરસાદ દરમિયાન વૃક્ષ પડવું, મકાન કે હોર્ડિંગ્સ તૂટી જવા, પાણી ભરાવું કે કોઈ પણ પ્રકારની ભયજનક પરિસ્થિતિ માટે તાત્કાલિક મદદ માટે ફરિયાદ નોંધાવી શકે છે. AMC દ્વારા આ પગલાં એ ખાતરી કરવા માટે લેવાયા છે કે, ચોમાસા દરમિયાન શહેરના નાગરિકોને તાકીદે સહાય મળી શકે અને જાનમાલના નુકસાનને ટાળી શકાય.