આજથી ગુજરાતની 54 હજાર સ્કૂલોમાં શૈક્ષણિક સત્રનો પ્રારંભ

લાંબા ઉનાળુ વેકેશનની મજા માણીને આજે ગુજરાતભરના વિદ્યાર્થીઓ શાળાએ પરત ફર્યા છે. રાજ્યની 54,000થી વધુ શાળાઓમાં 35 દિવસનું વેકેશન પૂર્ણ થતાંની સાથે જ શૈક્ષણિક સત્રનો શુભારંભ થઈ ગયો છે. વિદ્યાર્થીઓ આજે પ્રથમ દિવસે ઉત્સાહ અને ઉમંગ સાથે શાળાએ પહોંચ્યા હતા અને લાંબા સમય બાદ પોતાના મિત્રો અને શિક્ષકોને મળીને ખુશ થયા હતા.

રાજકોટમાં નાના ભૂલકાઓનું સ્વાગત કરવામાં આવ્યું હતું, જ્યાં તેમને કુમકુમ તિલક કરીને શાળામાં પ્રવેશ અપાયો હતો. શાળાઓમાં બેલ વાગતા જ વિદ્યાર્થીઓએ વર્ગખંડમાં પ્રવેશ લીધો હતો અને પ્રાર્થના સાથે નવા સત્રનો શુભારંભ કરવામાં આવ્યો હતો.

રાજ્ય શિક્ષણ બોર્ડ સાથે સંકળાયેલી સરકારી, ગ્રાન્ટેડ અને ખાનગી શાળાઓમાં 9 જૂનથી શૈક્ષણિક સત્ર શરૂ થતાં જ વિદ્યાર્થીઓ વેકેશનના માહોલમાંથી બહાર નીકળીને અભ્યાસ તરફ પાછા વળ્યા છે. મોટાભાગની માધ્યમિક અને ઉચ્ચતર માધ્યમિક શાળાઓ સવારની પાળીમાં કાર્યરત રહેશે, જ્યારે પ્રાથમિક માધ્યમની શાળાઓ બપોરની પાળીમાં શરૂ થશે.

શાળાઓ શરૂ થવાના છેલ્લા દિવસે બજારોમાં પુસ્તકો, નોટબુક, સ્કૂલ ડ્રેસ, સ્કૂલ બેગ સહિતની વસ્તુઓ ખરીદવા માટે વાલીઓ અને વિદ્યાર્થીઓની ભારે ભીડ જોવા મળી રહી છે.
રાજ્યમાં નવા શૈક્ષણિક વર્ષના પ્રારંભ થયા બાદ 9 જૂનથી 15 ઓક્ટોબર સુધી પ્રથમ સત્રમાં શૈક્ષણિક કાર્ય કરાવશે. ત્યારબાદ 16 ઓક્ટોબરથી દિવાળી વેકેશન આપવાનું આયોજન કરવામાં આવ્યું છે. આમ, પ્રથમ સત્રમાં 105 દિવસ શૈક્ષણિક કાર્ય માટે ફાળવવામાં આવ્યા છે. ત્યારબાદ 16 ઓક્ટોબરથી 5 નવેમ્બર સુધી 21 દિવસનો દિવાળી વેકેશન રહેશે. દિવાળી વેકેશન પૂર્ણ થયા બાદ 6 નવેમ્બરથી બીજા શૈક્ષણિક સત્રનો પ્રારંભ થશે. બીજું શૈક્ષણિક સત્ર 3 મે સુધી કુલ 144 દિવસનું રાખવામાં આવ્યું છે.
પ્રથમ શૈક્ષણિક સત્રમાં ધો.9થી 12ની પ્રથમ પરીક્ષાનો 11 સપ્ટેમ્બરથી પ્રારંભ થશે અને 20 સપ્ટેમ્બરના રોજ પ્રથમ કસોટી પૂર્ણ થશે. પ્રથમ કસોટીમાં જૂન માસથી લઈને ઓગસ્ટ માસ સુધીનો અભ્યાસક્રમ રહેશે. પ્રથમ સત્રમાં જૂનમાં અભ્યાસના 19 દિવસ, જુલાઈમાં 27 દિવસ, ઓગસ્ટમાં 22 દિવસ, સપ્ટેમ્બરમાં 25 દિવસ અને ઓક્ટોબરમાં 12 દિવસ મળી કુલ 105 દિવસનો અભ્યાસ કરાવવામાં આવશે. પ્રથમ સત્રમાં વિદ્યાર્થીઓને 6 જાહેર રજા મળશે. જેમાં ઓગસ્ટમાં 4 અને સપ્ટેમ્બર તથા ઓક્ટોબરમાં 1-1 જાહેર રજા હશે