સુરતના ઓલપાડમાં પરવાના વગર આયુર્વેદિક દવા બનાવતી ફેક્ટરી ઝડપાઈ

સુરતના ઓલપાડ ખાતે ગેરકાયદે આયુર્વેદિક દવાનું ઉત્પાદન કરતી ફેક્ટરી પર રાજ્યના ખોરાક અને ઔષધ નિયમન વિભાગે દરોડા પાડ્યા હતા. શંકાસ્પદ આયુર્વેદિક દવાના 15 સેમ્પલ લઇ રૂપિયા 11.60 લાખનો જથ્થો જપ્ત કરવામાં આવ્યો છે.

ખોરાક અને ઔષધ નિયમન તંત્રના કમિશનર ડો.એચ.જી.કોશિયાએ જણાવ્યુ કે, ઓલપાડમાં આયુર્વેદિક બનાવટોનું ઉત્પાદન અને વેચાણ કરતી ફેક્ટરી ખાતે ડ્રગ ઓફીસરોની ટીમે દરોડા પાડતા સ્થળ પર કવાથ, ચૂર્ણ તથા જોઇન્ટ રીલિફ ઓઈલ નામની આયુર્વેદિક દવાનું ઉત્પાદન થતું જોવા મળ્યું હતું.

જોગી હર્બાસ્યૂટીકલ પ્રા.લિ. દ્વારા પરવાના કે લાયસન્સ મેળવ્યા વગર દવાઓનું  ઉત્પાદન કરતા હોવાનું જણાતા ઉત્પાદન બંધ કરાવી ફેક્ટરી સીલ કરવામાં આવી છે.

પેઢીના ડિરેક્ટર નિલેશભાઈ જોગલ તેમજ ડૉ. દેવાંગી જોગલ સામે કાયદેસરની કાર્યવાહી કરવા ફેક્ટરીમાંથી 2 લાખની કિંમતનું રો-મટેરિયલ, 70 હજારની કિંમતનું પેકિંગ મટેરિયલ, 2.90 લાખની કિંમતની ફિનિશ્ડ પ્રોડક્ટ તેમજ 6 લાખની કિંમતની કવાથ, ચૂર્ણ તથા ઓઈલ બનાવવાની મશીનરી મળી અંદાજે 11.60 લાખ કિંમતનો મુદ્દામાલ જપ્ત કરાયો છે.

ખોરાક અને ઔષધ નિયમન તંત્રએ ફેક્ટરીમાં ઉત્પાદિત શંકાસ્પદ આયુર્વેદિક દવાના 5 તથા રો-મટિરીયલના 10 મળી 15 સેમ્પલ લઈ પૃથક્કરણ માટે વડોદરાની સરકારી પ્રયોગશાળામાં મોકલી આપવામાં આવ્યા છે. પૃથ્થકરણ રિપોર્ટ આવ્યા બાદ આગળની કાર્યવાહી હાથ ધરાશે.

ખોરાક અને ઔષધ નિયમન વિભાગે તાજેતરમાં ગાંધીનગર ખાતે લાયસન્સ વગર સ્પુરિયસ એલોપેથિક દવાનું ઉત્પાદન કરતી બનાવટી ફેક્ટરી શ્રી હેલ્થકેર અને સુરત ખાતે કોસ્મેટિકની આડમાં એલોપેથિક દવા એમેઝોનના માધ્યમથી બનાવટી દવાનું ઓનલાઈન વેચાણ કરતી ફેક્ટરી પકડી હતી.

આ ઉપરાંત ભાવનગરમાં ઓનલાઈન એમેઝોનના માધ્યમથી કોસ્મેટીક બનાવટ માટેના લાયસન્‍સ વગર દવાનું ઉત્પાદન કરતી પેઢીઓ પર દરોડા પાડી લોકોના સ્વાસ્થ્ય સાથે ચેડાં કરનાર સામે કાર્યવાહી કરી હતી.