નગરપાલિકાઓમાં અગ્નિશમન સાધનો અને વાહનોની ખરીદી કરવા 63 કરોડ ફાળવાયા

મુખ્યમંત્રી ભૂપેન્દ્ર પટેલે નગરપાલિકાઓમાં આકસ્મિક જરૂરી અગ્નિશમન વાહનો અને સાધનોની ખરીદી માટે 63 કરોડ રૂપિયાની ગ્રાન્ટ ફાળવવા સૈદ્ધાંતિક મંજૂરી આપી છે.

રાજ્યમાં શહેરીકરણ અને ઔદ્યોગિકરણનો વ્યાપ વધતાં ફાયર સેફ્ટીની જરૂરિયાતો વધી છે. મુખ્યમંત્રી સમક્ષ આ સંદર્ભે પ્રજાકીય પ્રતિનિધિઓ અને સ્થાનિક અગ્રણીઓએ રજૂઆતો કરી હતી.

તેના પરિણામે મુખ્યમંત્રીએ સ્થાનિક શહેરી સત્તા તંત્ર અદ્યતન ફાયર સેફ્ટી સાધનોથી સજ્જ રહે તે માટે સ્વર્ણિમ જયંતી મુખ્યમંત્રી શહેરી વિકાસ યોજનામાંથી આ રકમ મંજૂર કરી છે.

નગરપાલિકાઓની અગ્નિશમન વાહનો અને સાધનોની જરૂરીયાતો અનુસાર ગુજરાત શહેરી વિકાસ કંપની(GUDC) ખરીદી કરીને નગરપાલિકાઓને ફાળવણી કરશે.

મુખ્યમંત્રીએ નગરપાલિકાઓમાં 18 મીની ફાયર ટેન્ડર, 21 વોટર બાઉઝર, 29 વોટર કમ ફોમ ટેન્ડર અને 2 ઈલેકટ્રીક રેસ્ક્યુ બોટ મળી નગરપાલિકાઓ માટે 71 વાહનોની ખરીદી માટે 63.02 કરોડની ગ્રાન્ટ ફાળવવા  સૈદ્ધાંતિક મંજૂરી આપી છે. 

રાજ્ય સરકારે 2020 થી 2024 સુધીમાં નગરપાલિકાઓને 85 વાહનો ફાળવ્યા હતા. તેમજ 19 વાહનો ફાળવણીની પ્રક્રિયામાં છે. મુખ્યમંત્રીએ નગરપાલિકાઓને ફાળવનારા અગ્નિશમન વાહનોમાં GPS ટ્રેકિંગ સિસ્ટમના ઉપયોગ તથા તેના ડેટાને સીએમ ડેશબોર્ડ સાથે લીંક કરવા સૂચના આપી છે.