ભાદરવી પૂનમના પાવન અવસર પર, 191 વર્ષની ઐતિહાસિક પરંપરા ધરાવતો લાલ દંડા સંઘમાં અંબાના પવિત્ર ધામ અંબાજી પહોંચ્યો. આ સંઘમાં 51 બ્રાહ્મણો અને 450થી વધુ પદયાત્રીઓ જોડાયા હતા. અમદાવાદથી શરૂ થયેલી આ પદયાત્રા, 10 દિવસની કઠિન મુસાફરી બાદ ભાદરવા સુદ બારસના દિવસે પૂર્ણ થઈ.
સંઘનો ઉદ્દેશ્ય ધર્મનું જતન અને માં અંબાની ભક્તિ
આ સંઘનો મુખ્ય ઉદ્દેશ્ય ધર્મનું જતન કરવું અને માં અંબાની ભક્તિ કરવાનો છે. આ સંઘ ભાદરવી પૂનમના મેળામાં આવતા સંઘોમાં સૌથી વધુ આકર્ષણનું કેન્દ્ર અને ઐતિહાસિક મહત્વ ધરાવે છે. આ ઐતિહાસિક લાલ દંડા સંઘનું આગમન માત્ર ભક્તો માટે જ નહીં, પરંતુ દાંતાના રાજવી પરિવાર અને સ્થાનિક વહીવટી તંત્ર માટે પણ એક ખાસ પ્રસંગ હોય છે.
દાંતાના રાજવી પરિવારે કર્યું ભવ્ય સ્વાગત&nbsp;
અમદાવાદથી અંબાજીની આ પદયાત્રા દરમિયાન, ઠેર-ઠેર લાલ દંડા સંઘનું ઉમળકાભેર સ્વાગત કરવામાં આવ્યું હતું. દાંતાના રાજવી પરિવારે પણ તેમનું ભવ્ય સ્વાગત કર્યું હતું. અંબાજીના ચાચર ચોકમાં જિલ્લા કલેક્ટર મિહિર પટેલ અને મંદિરના વહીવટદાર કૌશિક મોદી દ્વારા પણ તેમનું સન્માન કરવામાં આવ્યું હતું. આ સંઘના મહારાજ દ્વારા સૌને આશીર્વાદના 'થપ્પા' લગાવવામાં આવ્યા હતા.
મોટાભાગના પદયાત્રીઓની ઉંમર 50થી 85 વર્ષ
આ લાલ દંડા સંઘની સૌથી નોંધપાત્ર વાત એ છે કે, તેમાં મોટાભાગના પદયાત્રીઓની ઉંમર 50થી 85 વર્ષની હોય છે, છતાં પણ તેઓ માં અંબાની ભક્તિમાં લીન થઈને પગપાળા આટલો લાંબો પ્રવાસ ખેડે છે. ભક્તોનું કહેવું છે કે, માં અંબાની કૃપાથી જ તેમને આ શક્તિ મળે છે. આ સંઘે માં અંબાના દર્શન કરીને ધન્યતા અનુભવી અને આ પદયાત્રાએ ફરી એકવાર શ્રદ્ધા અને ભક્તિનો જીવંત ઉદાહરણ પૂરું પાડ્યું છે.

લાલ દંડા સંઘ પહોંચ્યો અંબાજી

191 વર્ષ જૂનો લાલ દંડા સંઘ અમદાવાદથી 10 દિવસની પદયાત્રા બાદમાં અંબાજી પહોંચ્યો

September 4, 2025 | 22:18 IST