BZ પોન્ઝી સ્કેમમાં ભૂપેન્દ્રસિંહની 100 કરોડથી વધુની કિંમતની 18 મિલકત મળી

રાજ્યમાં ભારે ખળભળાટ મચાવનારા બી ઝેડ પોન્ઝી સ્કીમમાં 27 લોકો સામે 3 ફરિયાદ નોંધાઇ છે. તપાસમાં જાણવા મળ્યું છે કે કૌંભાડમાં મુખ્ય 16 એકાઉન્ટમાંથી 360 કરોડ ક્રેડિટ થયા છે. સીઆઇડી(ક્રાઇમ)ના એસપી હિમાંશુ વર્માએ પત્રકાર પરિષદમાં શુક્રવારે આ માહિતી આપી હતી. 

શુક્રવારે બી ઝેડ પોન્ઝી સ્કેમ કૌભાંડ અંગે સીઆઇડી ક્રાઇમના એસપી હિમાંશુ વર્માની પત્રકાર પરિષદ યોજાઇ હતી. તેમણે કહ્યું કે આ કૌભાંડમાં 27 લોકો સામે 3 ફરિયાદ નોંધાઇ છે. આ ફરિયાદમાં પાછળથી 8 આરોપીના નામ ઉમેરવામાં આવ્યા છે. તપાસમાં જે લોકોની સંડોવણી જણાઇ આવે છે તેમના નામ ફરિયાદમાં ઉમેરવામાં આવી રહ્યા છે. 

તેમણે એમ પણ કહ્યું કે મુખ્ય કૌંભાડી ભુપેન્દ્રસિંહ ઝાલા ફરાર છે અને તેને પકડવા માટે વિવિધ રાજ્યોમાં પોલીસની ટીમો પહોંચી છે. 

તેમણે એમ પણ કહ્યું કે તપાસમાં જણાયુ છે કે  મુખ્ય 16 એકાઉન્ટમાંથી 360 કરોડ ક્રેડિટ થયા છે. રેડ દરમિયાન 2 ચોપડા મળ્યા છે જેમાં રોકડમાં  વ્યવહાર કરાયા હોવાનું જાણવા મળ્યું છે. એક ચોપડામાં 50 કરોડના વ્યવહારના પુરાવા મળ્યા હોવાનો ચોંકાવનારો ખુલાસો તેમણે કર્યો હતો. 

એસપી વર્માએ કહ્યું કે આ કેસમાં અમે અરજદારો સહિત 100 થી વધુના નિવેદન નોંધ્યા છે અને જે  વ્યવહાર મળ્યા તે પરથી અરજદારોનો સંપર્ક કરી રહ્યા છીએ. તેમણે કહ્યું કે ભૂપેન્દ્ર ઝાલાને પકડવા દેશ વિદેશમાં બધે જ તપાસ ચાલુ છે અને ઝડપથી તે પકડાશે તેવી આશા છે.

તેમણે એમ પણ કહ્યું કે  આંગડિયા પેઢીના વ્યવહાર અંગે પણ તપાસ ચાલી રહી છે અને ચોપડામાં મળેલા વ્યવહાર પણ ચકાસાઈ રહ્યા છે. ઝાલાની 100 કરોડથી વધુની કિંમતની 18 મિલકત મળી છે.  જે હવે ટ્રાન્સફર ન કરી શકાય તેવી જોગવાઈ કરી છે. આ સાથે ઝાલાના એજન્ટ  મયુર દરજીની 2 સહિત 4 વૈભવી ગાડીઓ કબજે કરી છે. 

તેમણે માહિતી આપી કે ભૂપેન્દ્ર ઝાલાની બેનામી સંપત્તિ અંગે પણ તપાસ ચાલુ છે તથા અત્યાર સુધી તપાસમાં  મળેલા તમામ એકાઉન્ટ ફ્રીઝ કરાયા છે. કૌભાંડ સંદર્ભે સીઆઇડી ક્રાઇમે હેલ્પ લાઈન શરૂ કરતાં 25 જેટલા પીડિતોએ સંપર્ક કર્યો હતો.  ભૂપેન્દ્ર ઝાલાનું 8 થી 9 જિલ્લામાં નેટવર્ક ફેલાયેલું હોવાનું સામે આવ્યું છે અને  BZ ગૃપની 26 બ્રાન્ચ ફેલાયેલી હતી