હળવદ તાલુકાના ઘનશ્યામપુર અને ભલગામડા ગામો વચ્ચે આવેલા નાળામાં વરસાદી પાણી ભરાતા 14 વિદ્યાર્થીઓ ફસાયા હતા. ગ્રામ્ય વિસ્તારમાં ભારે વરસાદ બાદ નાળામાં પાણીનો ભારે પ્રવાહ જોવા મળ્યો હતો. આ દરમિયાન દિધડીયા ગામના 2 સામાજિક આગેવાનો હરદેવસિંહ ઝાલા અને અર્જુનસિંહ ઝાલાએ પોતાનો જીવ જોખમમાં નાખીને તમામ વિદ્યાર્થીઓને સલામત બહાર કાઢ્યા હતા.
ગ્રામજનોએ જણાવ્યુ કે, ઘણા સમયથી આ વિસ્તારમાં રસ્તા અને પુલનું કામ ધીમી ગતિએ ચાલી રહ્યું છે, જેના કારણે વરસાદ પડતા પાણીનું વહન અટકી જાય છે અને વાહનવ્યવહાર તથા સામાન્ય અવરજવર અશક્ય બની જાય છે. સ્થાનિક રહેવાસીઓએ આ અંગે તંત્રને રજૂઆત કરી હોવા છતાં કોઈ પણ અસરકારક પગલાં લેવામાં આવ્યા નથી.
સામાજિક કાર્યકરોએ હાલમાં વિવાદાસ્પદ નિવેદનો આપતાં હળવદ-ધ્રાંગધ્રાના ધારાસભ્ય પ્રકાશભાઈ વરમોરાની ટીકા કરી છે. તેઓએ કહ્યું કે, ધારાસભ્ય AC ચેમ્બરમાં આરામ કરતા જોવા મળે છે, જ્યારે લોકો વ્હાલાના જીવ સાથે સંઘર્ષ કરી રહ્યા છે. તેમની સામે કટાક્ષ કરતી વીડિયો ક્લિપ પણ સોશિયલ મીડિયા પર વાયરલ થઈ છે.
સ્થાનિક લોકો અને સામાજિક આગેવાનોએ તાત્કાલિક ધોરણે પગલાં લેવા અને અધૂરા રોડ અને નાળાનું કામ પૂરું કરવા ધારાસભ્યને રજૂઆત કરી છે જેથી આવી ઘટના ફરી ન બને.

14 વિદ્યાર્થીઓનો રેસ્ક્યૂ

હળવદમાં ભારે વરસાદ બાદ નાળામાં ફસાયેલા 14 વિદ્યાર્થીઓને સ્થાનિક સામાજિક આગેવાનોએ સલામત બહાર કાઢ્યા હતા.

June 18, 2025 | 15:03 IST