"કોપર વાયર ચોરીથી મેટ્રો સેવા ખોરવાઈ: એલસીબીની સફળતા"

ગાંધીનગર એલસીબીની ટીમને મોટી સફળતા મળી છે જેમાં મેટ્રોના સામાનની ચોરી કરી આંતરરાજ્ય ગેંગ ઝડપાઈ છે, ગાંધીનગર LCB ટીમે ગેંગના 4 આરોપીની ધરપકડ કરીને અમદાવાદ-ગાંધીનગર મેટ્રો સ્ટેશન ચોરીનો ભેદ ઉકેલાયો છે, આરોપીઓ મુસાફરના સ્વાંગમાં ચોરી કરીને ફરાર થતા હતા અને અલગ-અલગ જગ્યાએ ચોરી કરી હોવાની વાત સામે આવી છે.

આરોપીઓએ 9 જેટલી ચોરી કર્યાની કબૂલાત કરી

ગાંધીનગર એલસીબીએ મેટ્રો ટ્રેનના સામાનની ચોરી કરતી ગેંગ ઝડપી પાડી છે જેમાં આરોપીઓ મુસાફરોના સ્વાંગમાં આવી ચોરીને અંજામ આપતા હતા અને મેટ્રો ટ્રેનના કોપરના વાયર-સામાનની ચોરી કરતા હતા, મેટ્રો ટ્રેનના કોપરના વાયરની કિંમત બજારમાં ઉંચી છે અને તે વાયર વેચી નાખતા હોવાની વાત પણ સામે આવી છે, ત્યારે પોલીસે બાતમીના આધારે આ તસ્કર ગેંગને ઝડપી પાડી છે. પોલીસની તપાસમાં 9 ગુનાનો ભેદ ઉકેલાયો છે.

મેટ્રોના સામાન ની ચોરી કરી આંતરરાજ્ય ગેંગ ઝડપાઈ

ગુજરાતમાં મેટ્રો ટ્રેનના કોપર વાયર અને સામાનની ચોરી કરી તરખાટ મચાવતી ગેંગ પોલીસે ઝડપી પાડી છે, ગાંધીનગર એલ.સી.બી ટીમે આંતર રાજ્ય ગેંગના ચાર આરોપીની ધરપકડ કરી છે જેમાં ખુલાસો થયો છે કે, ગાંધીનગર અને અમદાવાદના મેટ્રો સ્ટેશનમાં વાયર અને સામાનની ચોરી કરી હતી. અમદાવાદ શહેરમાં પણ થોડા સમય પહેલા મેટ્રો ટ્રેનના કોપરના વાયરની ચોરી થતા મેટ્રો ટ્રેનમાં મુસાફરી કરતા મુસાફરો રઝળી પડયા હતા અને ટ્રેન પણ રદ કરવામાં આવી હતી.

ગાંધીનગરમાં મેટ્રો ટ્રેન પાસે રાખેલા સામાનની પણ થઈ હતી ચોરી

ગાંધીનગરમાં મેટ્રો ટ્રેનની નીચે ટ્રેકના ભાગે સામાન રાખવામાં આવ્યો હતો તે સામાનની પણ ચોરી કરવામાં આવી હતી, અલગ-અલગ લાકડાની પેટીમાં આ સામાન મૂકવામાં આવ્યો હતો અને તેની ચોરી થઈ હતી. ચોરાયેલા સામાનમાં 480 નોન-સ્ટાન્ડર્ડ ગેસ્કેટ, 456 એંકર બોલ્ટ અને 912 હેક્ઝ નટ હતા. ઉપરાંત 912 હેવી ટાઇપ સ્પ્રિંગ વોશર, 456 સિવિલ ગાસ્કેટ અને 500 ટ્રીમીંગ ગાસ્કેટની ચોરી થઈ હતી.