સુરતના પાલ વિસ્તારમાં આવેલી જાણીતી યુફોરિયા હોટલમાં એક અત્યંત દુઃખદ ઘટના બની છે. પરિવાર સાથે જમવા ગયેલા દોઢ વર્ષના બાળક ક્રિસીવનું પાણીમાં પડી જવાથી મોત થયું છે. બાળક 15 મિનિટ સુધી પાણીમાં તરફડતો રહ્યો હોવાનું સામે આવ્યું છે.
યુફોરિયા હોટલમાં એક પારિવારિક પાર્ટીમાં ગયા હતા
આ ઘટના ત્યારે બની જ્યારે તેના પિતા વિજય સાવલિયા, માતા અને બાળક સાથે હોટલમાં જમવા ગયા હતા. આ ઘટનાએ સુરતમાં શોકનું મોજું ફેલાવી દીધું છે, ખાસ કરીને બાળકોની સુરક્ષાને લઈને ચિંતા ઉભી કરી છે. યોગી ચોકના શુભમ રેસિડેન્સીમાં રહેતા વિજય સાવલિયા પરિવાર સાથે પાલની યુફોરિયા હોટલમાં એક પારિવારિક પાર્ટીમાં હાજરી આપવા ગયા હતા. હોટલના બેન્કવેટ હોલમાં પાર્ટી ચાલી રહી હતી અને જમવાનું શરૂ થવાની તૈયારી હતી.
રમતા બેન્કવેટ હોલની બહાર નીકળી ગયો
તે દરમિયાન, તેમનો નાનો પુત્ર ક્રિસીવ રમતા રમતા બેન્કવેટ હોલની બહાર નીકળી ગયો. તે હોટલના બેન્કવેટ હોલની બહાર આવેલા વોટર પોન્ડમાં પડી ગયો, જે આ હોટલની એક ખાસ ઓળખ છે. બેન્કવેટ હોલમાં કોઈને પણ ખબર નહોતી કે, બાળક ક્યાં ગયો છે, અને તેની શોધખોળ ચાલી રહી હતી.
આ પણ વાંચો: <a href="https://www.benefitnews24.com/gujarati/gujarat/ahmedabad-negligence-of-amc-claims-two-lives/19042" target="_blank" rel="noopener">નારોલમાં પાણીમાં કરંટ લાગતાં દંપતીનું મોત</a>
ફરજ પરના ડૉક્ટરે તેને મૃત જાહેર
તે જ સમયે, બેન્કવેટ હોલની બહાર બેઠેલા એક ગ્રાહકની નજર આ બાળક પર પડી. તેમણે તાત્કાલિક લોકોને જાણ કરી. હોટલના સંચાલકો તરત જ ત્યાં પહોંચ્યા અને બાળકને બહાર કાઢ્યો. જોકે, ત્યાં સુધીમાં તે બેભાન થઈ ગયો હતો. તેને તાત્કાલિક નજીકની હોસ્પિટલમાં લઈ જવામાં આવ્યો, જ્યાં ફરજ પરના ડૉક્ટરોએ તેને મૃત જાહેર કર્યો.
હોટલની સુરક્ષા વ્યવસ્થા પર ગંભીર સવાલો
આ સમગ્ર ઘટના અંગે હોટલના મેનેજર હસનભાઈ રાબડીએ જણાવ્યું કે, 'બાળક વોટર પોન્ડમાં પડી ગયો હતો. બહાર બેઠેલા એક કસ્ટમર દ્વારા અમને જાણ કરવામાં આવી હતી. મેં તરત જ બાળકને બહાર કાઢ્યો અને તેના પરિવારજનો તેને હોસ્પિટલ લઈ ગયા હતા.' આ દુર્ઘટના હોટલની સુરક્ષા વ્યવસ્થા પર ગંભીર સવાલો ઉભા કરી રહી છે.

સુરતમાં પરિવાર સાથે જમવા ગયેલા દોઢ વર્ષના બાળક ક્રિસીવનું પાણીમાં પડી જવાથી મોત થયું

September 16, 2025 | 17:34 IST