શાળા અને વાલીઓએ આ બાબતનું રાખવું પડશે ધ્યાન, શાળા પ્રવાસને લઈ નવી ગાઈડલાઈન જાહેર

હરણી બોટ દુર્ઘટના બાદ શાળાઓના શૈક્ષણિક પ્રવાસો પર રોક લગાવાઈ હતી અને શિક્ષણ વિભાગે કડક પગલાં લેતાં તમામ પ્રકારના શૈક્ષણિક પ્રવાસો માટે મંજૂરી વગર બહાર જવાનો પ્રતિબંધ મૂક્યો હતો. આ અનિચ્છનીય ઘટના બાદ, વિદ્યાર્થીઓની સુરક્ષા સુનિશ્ચિત કરવા માટે રાજ્ય સરકારે શૈક્ષણિક પ્રવાસો માટે નવા નિયમો ઘડવા પર ધ્યાન કેન્દ્રિત કર્યું.    રાજ્ય સરકારે સ્કૂલ પ્રવાસને લઇને નવી ગાઇડલાઇન જાહેર કરી છે. જેમાં સ્કૂલો અને વાલીઓએ શું ધ્યાન રાખવું તે અંગે સૂચનો કર્યા છે. હવે તમામ સ્કૂલોએ સમગ્ર પ્રવાસના ડે ટુ ડે કાર્યક્રમની જાણ કરવાની રહેશે. આ સાથે કોઇ પણ વિદ્યાર્થી કે તેના વાલીને પ્રવાસ માટે કોઇ શાળા ફરજ પાડી શકશે નહીં.   આ ગાઈડલાઈન રાજ્યની સરકારી/અનુદાનિત/ખાનગી પ્રાથમિક, માધ્યમિક અને ઉચ્ચતર માધ્યમિક શાળાઓને લાગુ પ઼ડશે. શૈક્ષણિક પ્રવાસ આયોજનમાં આગ, અકસ્માત કે અન્ય અનિચ્છનીય બનાવ કે દુર્ઘટના ન બને તેમજ ભાગ લેનાર તમામ વિદ્યાર્થીઓ, શિક્ષકોની સંપૂર્ણ સલામતી તેમજ સુરક્ષા જળવાય તે માટે આ ગાઈડલાઈનનું સ્કૂલોએ ચૂસ્તપણે પાલન કરવું પડશે.     શૈક્ષણિક હેતુ માટેના કોઈપણ પ્રવાસ માટે શાળાઓએ 15 દિવસ પહેલાં જ સંબંધિત અધિકારીઓને જાણ કરવી પડશે. આમાં શાળા સંચાલકોએ વિદ્યાર્થીઓ અને શિક્ષકોના પ્રવાસ માટે અગાઉથી પરમિશન લેવી જરૂરી રહેશે. જેથી કોઈપણ અનિચ્છનીય ઘટના નિવારી શકાય.   પ્રવાસ દરમિયાન પ્રવાસ માટે લાવવામાં આવતી વાહનોની સુરક્ષા સુનિશ્ચિત કરવા માટે RTO (રોડ ટ્રાન્સપોર્ટ ઓફિસ) ને પણ જરૂરી માહિતી પૂરી પાડવી પડશે. આ ઉપરાંત, સ્થાનિક પોલીસને પણ પ્રવાસ વિશે જાણ કરવામાં આવશે, જેથી તેઓએ માર્ગસુરક્ષા અને અન્ય જરૂરી વ્યવસ્થાઓ કરવા માટે યોગ્ય પગલાં લઈ શકે.   આ ગાઇડલાઇન રાજ્યના તમામ શાળાઓ માટે ફરજિયાત રહેશે. શાળાઓએ આ માર્ગદર્શિકા મુજબ કાર્ય ન કર્યું તો તેમને કાયદેસર કાર્યવાહીનો સામનો કરવો પડી શકે છે. શૈક્ષણિક પ્રવાસને સુરક્ષિત બનાવવાનો આ પ્રયાસ રાજ્ય સરકારની પ્રાથમિકતા છે, અને આ ગાઇડલાઇન જારી થતી સાથે શાળાઓને સ્પષ્ટ ધોરણોનું પાલન કરવાની ફરજ પડશે.