રાજ્યમાં 24 કલાકમાં 102 તાલુકામાં મેઘમહેર

રાજ્યમાં છેલ્લા 24 કલાકમાં 102 તાલુકામાં મેઘમહેર થઇ. છેલ્લા 24 કલાકમાં સૌથી વધુ પોરબંદરમાં 14 ઈંચ અને કલ્યાણપુરમાં 10 ઈંચ વરસાદ ખાબક્યો. જૂનાગઢના કેશોદ અને વંથલીમાં બે કલાકમાં સવા ત્રણ ઈંચ વરસાદ વરસ્યો.

પોરબંદરના રાણાવાવમાં સાડા નવ ઈંચ, કુતિયાણામાં પોણા છ ઈંચ, ગીર સોમનાથના વેરાવળમાં પોણા આઠ ઈંચ, સૂત્રાપાડામાં સાડા છ ઈંચ,  તાલાલામાં ચાર ઈંચ, જૂનાગઢના કેશોદમાં પોણા આઠ ઈંચ, વંથલીમાં સાત ઈંચ, માણાવદરમાં સાડા છ ઈંચ, વિસાવદરમાં પોણા પાંચ ઈંચ, માંગરોળમાં પોણા પાંચ ઈંચ, માળીયાહાટીનામાં સાડા ચાર ઈંચ, જામનગરના જામજોધપુરમાં પોણા છ ઈંચ, કાલાવડમાં પોણા ચાર ઈંચ, રાજકોટના ઉપલેટામાં પોણા પાંચ ઈંચ, ધોરાજીમાં સવા ચાર ઈંચ વરસાદ ખાબક્યો હતો.

આ ઉપરાંત જૂનાગઢ તાલુકામાં સાડા ત્રણ ઈંચ, અમરેલીના ખાંભામાં સવા ત્રણ ઈંચ, ગીર ગઢડામાં ત્રણ ઈંચ, અમરેલીના કુકાવાવમાં ત્રણ ઈંચ, ગીર સોમનાથના કોડીનારમાં ત્રણ ઈંચ, જૂનાગઢના મેંદરડામાં ત્રણ ઈંચ, દ્વારકાના ભાણવડમાં અઢી ઈંચ, વલસાડ તાલુકામાં અઢી ઈંચ, ભાવનગરના સિહોરમાં અઢી ઈંચ, અમરેલીના બગસરામાં સવા બે ઈંચ, ગીર સોમનાથના ઉનામાં સવા બે ઈંચ, જામનગરના ધ્રોલમાં સવા બે ઈંચ, દ્વારકાના ખંભાળીયામાં બે ઈંચ, વલસાડના ઉમરગામમાં બે ઈંચ, દ્વારકા તાલુકામાં પોણા બે ઈંચ, જૂનાગઢના ભેંસાણમાં પોણા બે ઈંચ, નવસારીના જલાલપોરમાં દોઢ ઈંચ, મોરબી તાલુકામાં દોઢ ઈંચ, રાજકોટના જેતપુરમાં દોઢ ઈંચ, મોરબીના ટંકારામાં દોઢ ઈંચ, કચ્છના ભૂજમાં દોઢ ઈંચ, નવસારી, જામકંડોરણા, ગણદેવી, જાફરાબાદમાં સવા ઈંચ ધારી, ગોંડલ, સાવરકુંડલા, એક-એક ઈંચ વરસાદ વરસ્યો હતો.

હવામાન વિભાગે અમરેલી, ગીર સોમનાથ, દીવ, જૂનાગઢ, પોરબંદર, દ્વારકા અને કચ્છમાં ભારે વરસાદની પાટણ, જામનગર, રાજકોટ, ભાવનગર, સાબરકાંઠામાં મધ્યમ વરસાદની અને બનાસકાંઠા, મહેસાણા, સુરેન્દ્રનગર, મોરબી, બોટાદ, અમદાવાદ, ગાંધીનગરમાં હળવા વરસાદની આગાહી કરી છે.

ત્રણ જિલ્લામાં હવામાન વિભાગનું રેડ એલર્ટ 

દેવભૂમિ દ્વારકા, પોરબંદર અને વલસાડમાં અતિ ભારે વરસાદ થવાની શક્યતાએ હવામાન વિભાગે રેડ એલર્ટ આપ્યુ છે. જ્યારે જૂનાગઢ, ગીર સોમનાથ અને અમરેલી, સુરત અને નવસારીમાં ઓરેન્જ એલર્ટ જાહેર કર્યુ છે. કચ્છ, જામનગર, રાજકોટ, ભાવનગર, વડોદરા, છોટાઉદેપુર, ભરૂચ, નર્મદા, તાપી, ડાંગ સહિત 10 જિલ્લામાં યલો એલર્ટ આપ્યુ છે.

પોરબંદરમાં આભ ફાટતાં જળબંબાકાર જેવી સ્થિતિ

પોરબંદર પંથકમાં 14 ઈંચ વરસાદથી જળબંબાકાર જેવી સ્થિતિ જોવા મળી રહી છે. પોરબંદર શહેર, ગ્રામ્ય અને બરડા પંથક જળમગ્ન થઈ ગયો છે. વરસાદી પાણીથી પોરબંદર-રાણાવાવ વચ્ચેનો રેલવે ટ્રેક ધોવાઈ ગયો છે. છાયા ચોકી, સુદામા ચોક સહિતના વિસ્તારોમાં વરસાદી પાણી ઘૂસી ગયા છે.

રવિ પાર્ક સોસાયટીમાં ઘૂંટણસમા પાણી ભરાયા છે. નિચાણવાળા વિસ્તારોમાં વરસાદી પાણી ભરાતા હાલાકી સર્જાઈ છે. વરસાદી પાણીના યોગ્ય નિકાલની વ્યવસ્થા નહી હોવાથી સ્થાનિકોમાં રોષ જોવા મળ્યો છે. મુશળધાર વરસાદથી ભારવાડા ગામના વાડી વિસ્તારમાં કેટલાક ખેતમજૂરો ફસાયા હતા.

ફાયર બ્રિગેડને જાણ કરાતા રાત્રિના સમયે રેસ્ક્યુ ઓપરેશન કરી મકાનની છત પર આશ્રય લઈ રહેલા એક જ પરિવારના 6 લોકોનું રેસ્ક્યુ કર્યુ હતું. ફાયરના જવાનોએ વાડી વિસ્તારમાં ફસાયેલા 11 લોકોનું રેસ્ક્યુ કરીને જીવ બચાવ્યો હતો.

રાજ્યના અત્યાર સુધીના વરસાદની વિગત

ઝોન              સરેરાશ વરસાદ  કુલ વરસાદ(મીમી) ટકાવારી

કચ્છ                    485        220.30          46.43

ઉત્તર ગુજરાત          730        174.14           23.86

મધ્ય ગુજરાત          811         186.73           22.90

સૌરાષ્ટ્ર                 738        368.35           49.91

દક્ષિણ ગુજરાત         1492       574.96           38.54

રાજ્યનો કુલ            883        314.26           35.59