રફ્તારના રાજાએ ફરી કોઈની જીંદગી રોળી, બાઈકચાલકનું ઘટનાસ્થળે મોત

સુરતમાં ફરી એકવાર ઓવરબ્રિજ પર અકસ્માતની ઘટના બની છે. ઉધના દરવાજા ઓવરબ્રિજ પર આજે  એક પૂરપાટ દોડતી કારે બાઇકચાલકને અડફેટે લેતા તેનું ઘટનાસ્થળે જ મોત નીપજ્યું હતું. કારચાલક દારૂના નશામાં હોવાની આશંકાઓ વ્યક્ત કરાઈ રહી છે. અકસ્માત સર્જેલ કારમાંથી એક ભાજપનો ખેસ, ગ્લાસ, થમ્સ અપ અને સિગારેટનું પેકેટ પણ મળી આવ્યું હતું.અકસ્માત સ્થળે બાઈકચાલકનું લોહિ વહેતા રોડ પર રેલો ચાલ્યો હતો. હાલ આ મામલે સલાબતપુરા પોલીસ દ્વારા વધુ તપાસ હાથ ધરવામાં આવી છે.

 

વહેલી સવારે  ઉધના દરવાજા ઓવરબ્રિજ પર પૂરપાટ ઝડપે જતા કારચાલકે બાઈકચાલકને અડફેટે લીધો હતો. કારચાલકે બાઈકને અડફેટે લેતા બાઈક ચાલકનું ઘટનાસ્થળે જ મોત નીપજ્યું હતું. કારચાલક નશામાં હોવાની આશંકા વ્યક્ત કરાઇ રહી છે. કારણ કે, કારમાં થમ્સ અપની બોટલ, ગ્લાસ અને સિગારેટનું પેકેટ મળી આવ્યું હતું. આ સાથે કારમાં ભાજપનો ખેસ પણ મળી આવ્યો હતો. હવે તે ભાજપનો કાર્યકર્તા હતો કે ખાલી ખેસનો વપરાશ કરતો હતો તે પણ એક સવાલ છે. પોલીસે સ્કોડા ચાલક દેવની ધરપકડ કરી લીધી છે. દેવ ભાજપનો કાર્યકર્તા હોવાની વાત ચર્ચામાં છે. કેમ કે દેવની કારમાંથી ભાજપનો ખેસ મળી આવ્યો હતો.

સ્કોડા કાર રજીસ્ટર નંબર GJ 05 JS 5161એ બાઈક હોન્ડા કંપનીની પેશન ગાડીને અડફેટે લીધી છે. કાર ફૂલ સ્પીડમાં હોવાથી અકસ્માત બાદ કાર ડિવાઇડર ઉપર ચડી ગઈ હતી. જ્યારે ધડાકાભેર થયેલા અકસ્માતને પગલે કારની એર બેગ ખુલી ગઈ હતી. ઘટનાની જાણ થતા સલાબતપૂરા પોલીસ ઘટનાસ્થળે પહોંચી વધુ તપાસ હાથ ધરી હતી. પોલીસની તપાસમાં બાઈકચાલક કાપડ વેપારી હોવાનું સામે આવ્યું છે.