સચિન GIDCમાં ઝેરી પાણીનો ખેલ, મિંઢોલા નદી જોખમમાં!

સચિન GIDCમાં ઝેરી પાણી છોડવાના આક્ષેપોથી ચિંતા

સુરતના સચિન GIDC વિસ્તારમાં કેટલાક કેમિકલ યુનિટો સામે પર્યાવરણને નુકસાન પહોંચાડતા ગંભીર આક્ષેપો થયા છે. સ્થાનિક કક્ષાએ ફરિયાદો ઉઠી રહી છે કે, રાત્રિના સમયે કેમિકલ ફેક્ટરીના કેટલાક સંચાલકો દ્વારા પ્રદૂષિત પાણી મિંઢોલા નદી અને ડ્રેનેજ લાઇનમાં છોડવામાં આવી રહ્યું છે. જેના કારણે આસપાસના વિસ્તારોમાં રહેતા લોકોમાં ચિંતા વધી છે. લાખો રૂપિયાની કમાણી કરતાં ઉદ્યોગપતિઓ પર્યાવરણની જાળવણી કરવાના બદલે મફતમાં ઝેર વહેવડાવી રહ્યા છે. જેના કારણે આસપાસના ગામડાંઓમાં લોકોનું જીવવું દુષ્કર બની ગયું છે.

ટ્રીટમેન્ટ ખર્ચ બચાવવા ગેરરીતિ થતી હોવાનો દાવો

સ્થાનિક સૂત્રો અને લોકોના જણાવ્યા મુજબ, કેમિકલયુક્ત પાણીને કોમન એફ્લુએન્ટ ટ્રીટમેન્ટ પ્લાન્ટ (CETP) સુધી પહોંચાડીને તેની પ્રક્રિયા કરાવવા માટે મોટો ખર્ચ થાય છે. આ ખર્ચ ટાળવા માટે કેટલાક લોકો દ્વારા નિયમોનું ઉલ્લંઘન કરીને સીધો નિકાલ કરવામાં આવતો હોવાના આક્ષેપો થઈ રહ્યા છે. ઉપરાંત, ટેન્કર મારફતે ગેરકાયદેસર નિકાલના રેકેટ અંગે પણ ચર્ચા ચાલી રહી છે.

GPCB અને તંત્રની કામગીરી પર ઉઠ્યા સવાલ

આ વિસ્તારમાં બે મોટા CETP પ્લાન્ટ કાર્યરત હોવા છતાં પ્રદૂષિત પાણી બહાર કેવી રીતે પહોંચે છે તે મુદ્દે લોકોમાં સવાલો ઉઠી રહ્યા છે. ગુજરાત પ્રદૂષણ નિયંત્રણ બોર્ડ (GPCB) અને સંબંધિત વિભાગોની દેખરેખ અને કાર્યવાહી અંગે પણ લોકોમાં તરેહ તરેહની ચર્ચા થઈ રહી છે.

આસપાસના ગામોમાં લોકોમાં આરોગ્ય અંગે ચિંતા

ગભેણી, તલંગપુર, ઉંબર, શિવનગર અને રામેશ્વર સહિતના વિસ્તારોના સ્થાનિક રહેવાસીઓનું કહેવું છે કે જમીનમાંથી મળતું પાણી હવે અગાઉ જેટલું ઉપયોગી રહ્યું નથી. પાણીના રંગ, સ્વાદ અને દુર્ગંધ અંગે લોકો ફરિયાદ કરી રહ્યા છે. સ્થાનિક લોકોના જણાવ્યા પ્રમાણે, નદીમાં પ્રદૂષણ કારણે આરોગ્ય સંબંધિત સમસ્યાઓમાં વધારો થતો હોવાની આશંકા વ્યક્ત કરવામાં આવી છે.

અગાઉની કાર્યવાહી બાદ ફરી સમસ્યા યથાવત

ગત વર્ષે સુરત મહાનગરપાલિકા દ્વારા કેટલાક પગલાં લેવામાં આવ્યા હતાં. જેના કારણે થોડા સમય માટે સ્થિતિમાં સુધારો જોવા મળ્યો હતો. જોકે હવે ફરીથી પ્રદૂષણનો મુદ્દો ચર્ચામાં આવ્યો છે. સ્થાનિક લોકોનું માનવું છે કે કાયમી ઉકેલ માટે વધુ અસરકારક અને કડક પગલાં જરૂરી છે.

તાત્કાલિક કાર્યવાહી કરવાની માંગ ઉઠી

સ્થાનિકો અને પર્યાવરણ પ્રત્યે ચિંતિત લોકોની માંગ છે કે, નિયમોનું ઉલ્લંઘન કરનારા કેમિકલ યુનિટો સામે કડક કાર્યવાહી કરવામાં આવે અને જવાબદાર તંત્ર દ્વારા સમગ્ર મામલે પારદર્શક તપાસ હાથ ધરવામાં આવે. તેઓનું કહેવું છે કે સમયસર અસરકારક પગલાં નહીં લેવામાં આવે તો ભવિષ્યમાં પર્યાવરણ અને લોકોના સ્વાસ્થ્ય માટે વધુ ગંભીર પડકારો ઊભા થઈ શકે તેમ છે.