પંબન બ્રિજ 'દેશનો પ્રથમ વર્ટિકલ લિફ્ટ અપ બ્રિજ ફરી'

પંબન પુલ તામિલનાડુના મંડપમ અને તીર્થસ્થાન રામેશ્વરમને જોડતો 115 વર્ષ જુનો સમુદ્રી પુલ છે. બ્રિટિશ કાર્યકાળ દરમિયાન 1914માં પંબન બ્રિજનું નિર્માણ થયું હતું. પરંતુ તેનો અમુક ભાગ જર્જરિત થતાં અને ખામી સર્જાતાં 2022માં આ ટ્રેન બ્રિજને સમારકામ અર્થે બંધ કરવામાં આવ્યો હતો. હવે તેનું સમારકામ પૂર્ણ થઈ ચૂક્યું છે. જેથી ફરી એકવાર રામેશ્વરમ જતાં શ્રદ્ધાળુઓ અને મુલાકાતીઓ ટ્રેન મારફતે મુસાફરી કરી શકશે. નવો તૈયાર બ્રિજ આગામી 100 વર્ષ સુધી સુરક્ષિત રહેશે.

જૂનો પુલ 1914 થી 1988 સુધી, જ્યારે તેની બાજુમાં રોડ પુલ શરૂ કરવામાં આવ્યો હતો, ત્યાં સુધી તીર્થસ્થાન રામેશ્વરમ અને લોકપ્રિય પર્યટન સ્થળ ધનુષકોડી સાથે એકમાત્ર જોડાણ હતું. નવો પંબન પુલ એશિયાનો પ્રથમ વર્ટિકલ લિફ્ટ પુલ છે, ટ્રાફિક માટે ખોલ્યા પછી રેલવે નક્કી કરશે કે 111 વર્ષ જૂના પ્રતિષ્ઠિત પંબન પુલને તોડી પાડવો કે નહીં!

ડિસેમ્બર, 2022થી જૂના પંબન બ્રિજ પર સંપૂર્ણ અવરજવર બંધ કરાતાં રામેશ્વરમ જતી ટ્રેનો અટકાવાઈ હતી. રામેશ્વરમ અને ધનુષકોડી જેવા ઐતિહાસિક સ્થળોની મુલાકાત માટે રોજની 20 ટ્રેનો સંચાલિત હતી. રોજના 9000થી વધુ મુલાકાતીઓ ટ્રેન મારફતે મુલાકાત લેતા હતા. 1988 સુધી મંડપમ અને રામેશ્વરમ વચ્ચેનું એકમાત્ર ટ્રેન કનેક્શન પંબન બ્રિજ હતું. બાદમાં અન્નાઈ ઇન્દિરા ગાંધી રોડ બ્રિજ નામનો રોડ બ્રિજ પુલ નજીક બનાવવામાં આવ્યો હતો. મંડપમ રામેશ્વરમથી 20 કિમી દૂર છે, તદુપરાંત રામેશ્વરમમાં અત્યંત પૂરઝડપે વહેતી હવાઓનું આંકલન કરતું સિગ્નલ પણ મુકવામાં આવ્યું છે. વિન્ડ સ્પીડ સિગ્નલ 50 કિમીથી વધુ સ્પીડે ચાલતી હવા અંગે માહિતી આપશે, જેથી તુરંત જ ટ્રેન અટકી જશે. આ બ્રિજની લંબાઈ 2.2 કિમી છે. જે સમુદ્ર તટથી 22 મીટરની ઊંચાઈએ સ્થિત છે.

જૂના બ્રિજનું વર્ટિકલ ક્લિયરન્સ ઊંચી ભરતીના સ્તર અને ગર્ડરના તળિયા વચ્ચે માત્ર 1.5 મીટર હતું, જેના પરિણામે ગર્ડર પર દરિયાઈ પાણી છલકાઈ રહ્યું હતું. નવા બ્રિજમાં 18.3 મીટરના 100 સ્પાન અને 63 મીટરનો એક નેવિગેશનલ સ્પાન હશે. તે હાલના પુલ કરતા 3 મીટર ઊંચો હશે, અને સમુદ્ર સપાટીથી 22 મીટર ઉપર નેવિગેશનલ એર ક્લિયરન્સ હશે.

પુલનું સબસ્ટ્રક્ચર ડબલ લાઈનોને સમાવવા માટે બનાવવામાં આવ્યું છે, અને નેવિગેશનલ સ્પાનમાં ડબલ ટ્રેક માટે પણ જોગવાઈઓ હશે. નેવિગેશનલ સ્પાન સહિત સમગ્ર પુલ, રેલ્વે ઇલેક્ટ્રિફિકેશનને ધ્યાનમાં રાખીને ડિઝાઇન કરવામાં આવ્યો છે. મેન્યુઅલી સંચાલિત અને નિયંત્રિત હાલના પુલથી વિપરીત, નવા પુલમાં ટ્રેન નિયંત્રણ સિસ્ટમ્સ સાથે જોડાયેલ ઇલેક્ટ્રો-મિકેનિકલ કંટ્રોલ સિસ્ટમ હશે.

આ બ્રિજ સાથે સ્થાનિક લોકોની લાગણીઓ પણ જોડાયેલી છે. ઐતિહાસિક હોવા સાથે આ બ્રિજ એક એન્જિનિયરિંગનો અને આધુનિક ટેક્નોલોજીનો અદ્ભૂત સમન્વય છે. લોકોની માંગ છે કે, જુના પુલને તોડવામાં ન આવે અને તેને વૈશ્વિક સ્મારક તરીકે રક્ષણ કરવામાં આવે.